Rò̌mǎphû̌ 10
10
1He pṳwè̤ sî꤮, ma̤pûhǐ Cǒmara ma̤lû̌htò̌ge Israelphû̌ toǒnudě, he sò̌phlǒsho na̤cè̌ dě he kwisaba mè̤mè̤̌ bǎ asîya hǒ. 2He sî̌ya te̤mǎbò asî awi̤akè̌ akhû̌akhî, he dè pwe̤ǐlṳ bǎ sî ta asî awi̤akè̌ hî̌numî̌ anî̤ pwǎ. Asî sò̌phlǒsho kè̌lǎ lṳ̂ma̤to na̤cè̌ Cǒmara sò̌phlǒ pwǎ̤tadě pato lṳ̂ma̤kû̌ hî̌tènu asî sî̌ya lǒkho tò̤. 3Cǒmara bè̌cǒbè̌tè̤ kò aklè̌aklònu asî sî̌yaphlo tò̤. Mî̌tanu, asî kè̌lǎ ma̤htò̌ tû̌ lǒkho ta asîklè̌asîklò pwǎ. Hǐnudě Cǒmara bè̌cǒbè̌tè̤ kò aklè̌aklò htǒonu asî sò̌phlǒsò̌yṳ gûma̤ kû̌kò dî̌kî̌꤮ tò̤. 4Ma̤pûhǐ Cǒmara bè̌cǒbè̌tè̤bò kòyò htě a yṳǎ Khrî̌stu toǒ ayanudě, Khrî̌stu ma̤hto phlǔbò ta̤sû̌ta̤tòwò a ta̤yè̤lò̤nǎ toǒ hǒ.
Ta̤ma̤lû̌htò̌ge htǒonumî̌ kòyò pṳ̂̌꤮ tapwa̤ aya
5Mǒ̤jè khwè̌ bǎ kòyò htě a lṳ̂ma̤kû̌bò̌ ta̤sû̌ta̤tòwò ta a htûhtò̌ kòyòcǒkòyòtè̤ dě Cǒmara alo̤mo̤ toǒ awi̤akè̌, a khwè̌ dě a hî̌, “Kòyò htě a gûma̤ lǒbe lǒ̤꤮ bò ta̤sû̌ta̤tòwò htǒotoǒnu, a htûpwa̤ tûjûpwa̤ pě,”#Ta̤subusaba 18:5 A khwè̌ dě a hî̌ hǐnu. 6Pwǎ̤tadě kòyò htě Cǒmara bè̌cǒbè̌tè̤ yǎta a ta̤yṳta̤nǎ khû̌khî toǒnu, a tobǎ gwènû̌û ta, “Ûpè glè htò̌ (Kaǎhǎte̤ Khrî̌stu) dě mǒkhû̌pè?”#Ta̤dǒhtû̌ǐ 30:12 hǐnutò̤. 7Htohǒtò̤ a bǎ gwènû̌û ta, “Ûpè glè hǎte̤ dě khokûyo̤ (dě ma̤htûpwa̤gesǒ Khrî̌stu ta ta̤si) pè?”#Ta̤dǒhtû̌ǐ 30:13 hǐnutò̤. 8Pwǎ̤tadě, Cǒmara bè̌cǒbè̌tè̤ kò aklè̌aklò numî̌ a hî̌ hî̌tè? Dě a hî̌, “Cǒmara ale̤ayo̤ ǒphǔtînî̌ ta na hǒ. A ǒpwǎ bǎ na khû̌phělo̤nu pwǎ, a ǒpwǎ bǎ na sò̌phlǒkûnu pwǎ.”#Ta̤dǒhtû̌ǐ 30:14 Hǐnumî̌ ta̤yṳ a ta̤sò̌le̤sò̌lò̤ awi̤akè̌ htě pa dǒhtû̌ǐ bǎ sîhtǒonu hǒ. 9Na dè olò̤ ta nakhû̌phě dě na dè hî̌ ta Ye̤shǔ mî̌ Běcǎ tapwa̤ na dè yṳǎ dě na sò̌phlǒkû ta Cǒmara ma̤htûpwa̤gesǒ Ye̤shǔ ta ta̤si hî̌nu, na nî̤bǎ ta̤lû̌htò̌ge pě. 10Ma̤tè̤hî̌dě, kòyò htě a yṳǎ dě a sò̌phlǒkû toǒnu, Cǒmara bè̌cǒbè̌tè̤ yǎ. Htodě kòyò htě a olò̤ ta akhû̌phě toǒnu, a nî̤bǎ ta̤lû̌htò̌ge hǒ. 11Lî̤cahtǐkû hî̌ Ye̤shǔ awi̤akè̌ ta, “Ûpè bǎbǎ, a yṳǎ nû̌û toǒnu, a glè to̤dě ta̤ la̤sò̌phlǒpî̌ agûla̤nu a ǒ dǐkhò̌꤮ tò̤.”#Isaǐa 28:16 12Ma̤tè̤hî̌dě Yṳ̌daphû̌ ta Yṳ̌daphû̌ mè̤tò̤ toǒnu a khǒ nû̌ûnu, aǒnǒ dǐcǎ꤮ tò̤. Pwa̤yṳǎphû̌ lǒ̤꤮ bò htǒotoǒ numî̌ a Běcǎ ǒplǒnû̌û tapwǎ̤꤮ pa pwǎ. Kòyò htě a kwihtò̌ nû̌û ta̤ma̤jè toǒnu, a howi̤ lǒbe bǎ asî hǒ. 13Ma̤tè̤hî̌dě, pwǐ lî̤cahtǐ hî̌ ta, “Ûpèpè̌ bǎbǎ a kwihtò̌ ta̤ma̤jè dě Běcǎ aǒ toǒnu, Běcǎ Cǒmara ma̤lû̌htò̌ge nû̌û pě.”#Joělè 2:32
14Dè ma̤hǐnudě, asî ta̤yṳ dè ǒtò̤ hî̌dě a cû̌ kwihtò̌jò ta̤ma̤jè dě Běcǎ Ye̤shǔ a ǒ hî̌tè? Asî dè gana̤denǒ tò̤ hî̌dě a cû̌ yṳǎjò Běcǎ Ye̤shǔ hî̌tè? Pwa̤dǒhtû̌ǐ bǎ asî dè ǒtò̤ hî̌dě asî cû̌gana̤dejò hî̌tè? 15Kò dè plûhè bǎ asî pwa̤dǒhtû̌ǐ tò̤ hî̌dě asî cû̌ dǒhtû̌ǐjò bǎ kò hî̌tè? Lî̤cahtǐkû hî̌, “Kòyò htě a phî̌hè ta̤sò̌le̤sò̌lò̤ awi̤akè̌ toǒ akhò̌lopo̤nu awî̤ mè̤mè̤̌.”#Isaǐa 52:7
16Pwǎ̤tadě Israelphû̌ toǒnu a phî̌shǔbò ta̤sò̌le̤sò̌lò̤ awi̤akè̌ pṳ̂̌꤮ tapwa̤ tò̤. Ma̤tè̤hî̌dě, pwa̤po̤ Isaǐa hî̌ ta, “Kǒ Běcǎ, ûpè yṳǎkû̌ pa ta̤wi̤ta̤kè̌ htǒonu pè?”#Isaǐa 53:1 17Ma̤hǐnudě, ta̤yṳ mî̌ a ǒ dě ta̤gana̤de ta̤wi̤ta̤kè̌ alo̤ hè pwǎ. Kò dǒhtû̌ǐ bǎ Khrî̌stu awi̤akè̌ akhû̌akhî, kò gana̤de nǒpwǎ ta̤wi̤ta̤kè̌. 18Pwǎ̤tadě he dè gwè ta, “Mî̌ asî gana̤denǒ kû̌ tò̤ ya?” He glè hî̌ ta, asî gana̤debǎ lè. Lî̤cahtǐkû hî̌,
“Asî yo̤po̤ cû̌bò dě hǎkhû̌teběbò hǒ. Asî ale̤ayo̤ htǒonu a cû̌to̤bò dě hǎkhû̌gutṳ hǒ.”#Ta̤htû̌sò̌ǐ 19:4
19He glè gwèsǒ ta, Israelphû̌ toǒ mî̌ a sî̌yaphlokû̌ nò kò tò̤ ya? Kòyò htě a hî̌shǔ wǐgutṳ̌ kò numî̌ Mǒ̤jè hǒ dě a hî̌ hè̌o,
“Khlilèhǔwa̤ htě sî gènè̤dû̌ yǎ tò̤ toǒnu, he howi̤ asî dě nosò̌khě yǎta sî pě. He howi̤ khlilèhǔwa̤phû̌ htě a sî̌yaphlobò̌ kû̌ he tò̤ toǒ dě he nosò̌phlǒdû̌ yǎta sî pě.”#Ta̤dǒhtû̌ǐ 32:21
20Nǒkò dě pwa̤po̤ Isaǐa hî̌khuhî̌hapo̤ dě a hî̌,
“Yṳ̌daphû̌ mè̤tò̤ htě a jipwi̤ kè̌lǎkû̌ he tò̤ toǒnu, a kè̌shǐ he hǒ, he ǒlṳhtò̌ bǎ Yṳ̌daphû̌ mè̤tò̤ toǒ dě a kè̌lǎ gwèlǎ he tò̤ toǒ hǒ.”#Isaǐa 65:1
21Pwǎ̤tadě, pwa̤po̤ Isaǐa khwè̌ Israelphû̌ toǒ awi̤akè̌ dě a hî̌,
“He tîwî̌tòwò ǒpo̤kè̌shuǐshǔ hekòyò glè gesǒ dě heǒ ti̤nǐ̤mṳhǎ, pwǎ̤tadě asî gana̤de lǒkho heyo̤ tò̤, a hǐkǒshò̌ lǒkho pwǎ.”#Isaǐa 65:2
Wycliffe USA
