1 Timothée 4
4
Byotsu bi Nyambi sunde bi biboti
1Dinyuni Diboti gagwambili dikengi re gigumbi gi musukisilu, bemosi begusile gitu gu gubinge menyuni mabi ne ginenzitsi gi awu. 2Begutsimbisu ne bivyangi ne befutsi, beke pikile gere bilonge nzambi. 3Batu bane bagandisi dyonge ne guye biguye bimosi, lavane Nyambi bisunde nonge bane be Nyambi, bayabi bureti, baye ne gu mugabusile diboti. 4Byotsu bisunde Nyambi bi biboti. Gu sandi bi gubume, tumbe dubongi byotsu negumugabusilange diboti, 5mbare musamu Nyambi ne dulembu re gasumuni byotsu.
Gube mudyanzitsi boti Sesu Kirisete
6Nenze bane be Nyambi motsu mane, vane wugube mudyanzitsi boti wu Sesu Kirisete, wugurigitse re wabungulu ne musamu gitu ne ginenzitsi gi ngenze gi wusebinge dikengi. 7Tumbe bumine mambu mese yelemine ne gitu, bilodi bi bidyongi. Kebe gube ginami gu Nyambi. 8Gwikisu nyuru ne mbangu diboti, tumbe mambu megegi. Bunami gu Nyambi re diboti dineni mbare gagwarisi monyu yine muni ne ndagi monyu peke peke. 9Wune re musamu ngenze, wu nyange singe mutu wotsu. 10Gere dwakengi ne gugagene, mbare dutsevere gitu gi etu mu Nyambi yi monyu, yi mukani batu botsu gulugulu be ne gitu. 11Yambile ne gunenze motsu mane.
12Mutu yakwengule ne mbare bulengi bu agu! Tumbe bange girange gu bane be Nyambi, mu gyambitsi, mutsageninu, girondu, gitu ne rereri murime agu. 13Nesi niguruge, gwarise tangune musamu ve piti batu, gu gugaremuse ne gu gunenze. 14Wuyagwengule gidime gi Dinyuni Diboti gi nagu, gi wuvegu ve bebigitsi bambilile ne ve bivunde bekutsabigile mekake. 15Gwarile mu motsu mane, vere murime ne dinyuni mu gibanu gi agu! Nane botsu begulabe dibangugilu di agu. 16Bandekene ndwani mutsageninu agu ne ginenzitsi gi agu. Gwarile mu nzile yine, are nane wugobulile bakulilu ne ndya beni gwandi.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
