1 Timothée 1
1
Gubwegise
1Menu, Pol, gilumbi gi Sesu Kirisete, ne dinyange di Nyambi mwobutsi etu ne Sesu Kirisete gitu gi etu. 2Nyakubwegisi Timote, mwane ami suli mu gitu. Tate Nyambi ne Sesu Kirisete Fumu etu bekuvegi gyesi, gigebe ne polu!
Gubigise gukyelu bukulu bubi
3Neve nikwambilile ve nyendilange gu Masedwan, bange gu Efese. Gu batu gu yadi yine banenzi bukulu bunzusu, begandisi re beyakunde divage! 4Bambili re besili bilombi bi gufure ne mune bukulu! Mane mabegi ke mitsonzige, mi sandi ne musumbu, ke digudyanzile Nyambi yi dwayabi ne gitu. 5Dibandu di mubigisu wuwu gu gutsandule girondu, girondu gyarugili gu murime rereri, pikile tsi boti ne gitu gi ngenze. 6Bemosi besetsyemugilu dibondu, ne gusingene ne bilombi bi sandi ne musumbu. 7Bakwebongi ve mbure birange gukyelu mugage Nyambi, tumbe besagulu me bagwambili, nesi bilombi bi batsigemisi ne mune gitu.
8Dwayabi re mugage wu wuboti, pasi re dwayabi disumu. 9Durangemini anu re mugage wuserendilu batu besungeme, tumbe gukyelu batu bene pendule, be sandi dumi Nyambi ne bidyanze mabi. Mugage wu rendilu batu besagobisi Nyambi ne bisyemu bi andi byotsu, gukyelu bikuye ne botsu baboki taye ne nguye. 10Mugage wu batu babingi monyu bumbesi, wu bebagele bagwendi dyonge ne bebagele nawu, ne miyugu mi bevige. Mugage gwandi wu befutsi, bavagi milevu mi gufure ne botsu badyanzi mambu mese sungeme ne ginenzitsi giboti. 11Labe dyetsemine ne musamu wuboti nivegu, warugili gu Nyambi, yi denge didume, disine di meboti.
Gisingu gu Nyambi
12Nyagabusili Sesu Kirisete Fumu etu diboti, mbare atsepagile gitu gi gumbonge gu gidyanzu gi andi, atsepege ngudu yi guvage gidyanzu gi ami. 13Lavane nyambilange mabi gukyelu andi ve rege, nimukwanange ne gusyengange. Tumbe Nyambi rigitse gigebe gi andi gukyelu ami, mbare nzeyabange di nivagange, nzemuvagilange gitu. 14Fumu etu lundise gyesi gi andi mu menu ne gitu ne girondu byarugili gu dyonge ne Sesu Kirisete. 15Labe musamu ngenze, wu nyange singe mutu wotsu re «Sesu Kirisete ruge mu bulongu guse gobule bevagitsi be mabi.» Ni mebeni tindi muvagitsi mabi ve gari botsu. 16Tumbe dibandu re dine Nyambi rigitsile gigebe gi andi gukyelu ami. Aronde re Sesu Kirisete rigitsi mu menu, ni tindi muvagitsi mabi, givingitsi gi andi gyotsu. Nonge nikube gibagunu gi botsu mugese, beguvere gitu gu yandi ne begudenge monyu peke peke. 17Gu kanangu yi peke peke, yisegafu, yisalabeni ne Nyambi vike, abi didume ne dugitsu mwendu ne mwendu! Dibi nane.
Bandekene gitu
18Timote, mwane ami, nyakuvegi ndongi yiye, yetsemine ne mambu me bebigitsi bambile gukyelu agu. Mambu mane, mabi ngudu agu mu mutsingu boti wu ndyayu wugubene. 19Rare gitu ne pikile yi boti. Bemosi bebuse binge pikile tsi awu vane gitu gi awu gidomine. 20Ve gari awu vabe Imene ne Lekesandere, nibesake gu Sate nonge bekuyabe re bayakunde syengise Nyambi.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES