RUTI 4
4
I Boasi mamporongo i Ruti
4:1-12
1Njoʼu i Boasi ri kareʼe mpobotusi anu njau ri Baa-baa ngkota. Ri potunda-tundanya njairia, moliumo kojo tuama anu natoʼo i Boasi, siʼa anu mosu mpodago pokasangkomponya pai i Elimele. Napeboo i Boasi tau setu natoʼoka, “Bale, maʼi riunya motunda ireʼi!” Maʼi kojo tau setu motunda njairia. 2Ungkalairia, nasale i Boasi, sampuyu topo mbawanaka ri kota setu, motunda sangkani-ngkani pai tau seʼe njairia. Butu rodomo potunda ntau seʼe, 3mompaumo i Boasi ri tau anu sangkompo pai i Elimele setu, natoʼo, “Taincanimo i Naʼomi mewalilimo ungka ri tana Moabi. Seʼi-seʼi da mampobalu tana anu napotumpu langkainya kasangkompota i Elimele anu matemo setu. 4Kuepe-epe siko nuincani kojo inceʼe. Ane rapanya nupokono da maoli, toʼomo ri suara waʼa ngkabosenya seʼi. Ane bareʼe toʼo mpayoa, maka podo kita radua anu da mampakanoto incetu; siko anu kaʼisa-isanya yaku tau anu karaduanya.”
Mesono tau setu natoʼo, “Io yaku anu da mangaoli.”
5Nepa natoʼo i Boasi, “Madagomo ane ewancetu. Paikanya ane siko anu da mangaoli tana ungka ri Naʼomi setu, siko woʼu sangaya-ngaya da mantima i Ruti, weʼa to Moabi, bemba ana i Naʼomi anu matemo setu. Maka tana setu sangaya-ngaya da mewali panta muli ntau matemo setu.”
6Mesono tau setu natoʼo, “Ane ewanceʼe yaku bareʼe da kukoto. Mewali seʼi-seʼi tetala setu kulapasaka mau yaku tau anu kaʼisa da mangaoli tana setu. Bereʼe yowenya tana setu maka bareʼe da napopanta muliku. Moruana sikomo anu mangaoli.”
7 #
Paw. 25:9
Ri tempo setu reʼe tau anu mampobalu bara da mampetoloka aga-aganya, inceʼe da ndapakanoto ewanceʼi, tau setu da mantoncu sandalenya, nepa da nawaika tau anu maoli. Ewanceʼemo katewianaka pompakainti pobotusi pampobalu pai paoli tana ri to Isaraeli.
8Inceʼe painaka, ri pantoʼo ntau setu ri Boasi, “Sikomo anu da maoli.” Natoncu ntau setu sandalenya nepa nawaika i Boasi. 9Mompaumo i Boasi ri waʼa ngkabosenya, pai ri pura-pura tau anu njau njairia, natoʼo, “Sandeme seʼi, komi pura-pura mewali sabi, kayakunya anu mangaoli ungka ri Naʼomi pura-pura anu napotumpu i Elimele pai ananya anu matemo setu, i Kilioni pai Mahaloni. 10#Paw. 25:5-6 Pai da kumantima woʼu i Ruti to Moabi, bemba i Mahaloni anu matemo da mewali rongoku. Ane ewanceʼe tana setu da napotumpu ncombori ntau anu matemo setu. Pai mulinya woʼu da reʼe mpaliu ri oyo ntinanya pai ri raya ngkotanya. Ee waʼa ngkasangkompo, ri sandeme seʼi komi pura-pura anu mewali sabiku.”
11 #
Pal. 29:31
Mesono waʼa ngkabosenya pai waʼa ntau ntaninya anu njau njairia natoʼo, “Io, kami sabinya. Tuarapa i Pue da mampapewali rongomu da ewa i Raheli pai Lea anu mampoanaka i Yako waʼa ananya anu sondo. Mbolimo siko da gana-gana katuwumu ri oyo ntina ri Eparata pai tuarapa siko da tetoʼo ri Beteleme. 12#Pal. 38:27-30 Tuarapa waʼa ana anu da ndawaika siko i mPue mampoliu weʼa anu mangurapa setu da mampapewali tinamu ewa i Peresi ana i Yahuda pai Tamari.”
I Boasi pai mulinya
4:13-22
13Natima i Boasi i Ruti naporongo. Ndadonco i mPue i Ruti, mongkeni siʼa, napoana sambaʼa ana tuama. 14Natoʼo waʼa mbeʼa ri Naʼomi, “Undemo i Pue! Maka Sira mawaikamo siko sambaʼa makumpu tuama ri sandeme seʼi, inceʼe anu da mampatuwu siko. Tuarapa ananggodi setu da tetoʼo ri to Isaraeli! 15Maniamu setu maʼai napampotowe siko. Siʼa mangawaika siko, anu meruu ungka ri anu da nakoto papitu ana tuama da nawaika siko. Seʼi-seʼi nawaikamo siko sambaʼa makumpu tuama, inceʼe anu da mawali dawoʼuni karoso ndayamu, siʼa anu da mamporewu siko ri tempo ngkatuwumu.” 16Natima i Naʼomi ananggodi setu, naporewu maʼai napampotowe pai napampokapuru.
17Waʼa mbeʼa anu samposori banua ntau seʼe mampapotoʼo ananggodi setu i Obe. Napobambarika ntau seʼe ri waʼa ntau bambari anu mantoʼo, “I Naʼomi mampotumpu sambaʼa ana tuama.”
Obe seʼi anu ripurinya mewali papa i Isai inceʼemo papa i Daudi.
18-22Ewaseʼi posuncu anu mampomulika i Daudi, tepuʼu ungka ri Peresi inceʼemo: I Peresi, Heseroni, Rama, Aminada, Nahaso, Salomo, Boasi, Obe, Isai, Daudi.
@LAI 2000