ROMA 15
15
Neʼe podo maendo koromu ngkaliomu
15:1-6
1Kita anu maroso peaya ndayata kono nunjaa anu taaya, sangaya-ngaya da tapedongeka woʼu pompau ntau anu malente peaya ndayanya. Kita neʼe podo maendo korota ngkaliota. 2Paikanya kita sambaʼa pai sambaʼa da mampakawongko raya ngkasangkompota da naka tesorepaka siʼa pai kakomaroso-roso peayanya. 3#Pol. 69:8 Maka i Kerisitu bareʼe woʼu podo maendo koro-A ngkalio-A. Lau ndaʼuki ri Sura Magali ewaseʼi, “Maka pura-pura waʼa peposari ntau ri komi ndapapakoyokamo Yaku.” 4Pura-pura anu ndaʼuki ri Sura Magali inceʼe da mampaguru kita. Maka waʼa pompaguru anu tarata ungka ri Sura Magali inceʼe mampakaroso pai mampakatodo kita painaka takoto mampeondaka katuwuta ri Pue Ala. 5Mbolimo i Pue Ala anu mawai katodo pai kalindo ndaya ri lino, da mampelae komi da ndipangkoto tuwu siuju-uju raya malulu pandiri i ngKerisitu Yesu. 6Ri kasiuju-uju ndayami komi pura-pura da ndikoto maunde Pue Ala, Papa mPueta i Yesu Kerisitu.
Nuntu ngKatuwu tila ntau anu banya to Yahudi
15:7-13
7Inceʼe puʼunya ee waʼa ngkasangkompo ndipombesabemo sambaʼa pai sambaʼa ri wongko ndaya, ewa i Kerisitu woʼu mantarima komi da mampapeawa i Pue Ala. 8Da ndiendomo, i Kerisitu roomo mamporiokoi to Yahudi mampatongawa ewambeʼi katodo i mPue Ala mangabangani waʼa mpojanji-A ri waʼa ntau piamota. 9#2 Sem. 22:50, Pol. 18:50 I Yesu woʼu mampapewali waʼa banca ntaninya anu banya to Yahudi mampapeawa i Pue Ala ua kapuru ndaya-A ri tau seʼe. Lau ndaʼuki ri Sura Magali ewaseʼi,
“Inceʼe puʼunya yaku da mabangkei Komi ri tongo-tongo waʼa banca,
yaku da mampasowa ngayu mpeunde mabangkei toʼo-Mi!”
10 #
Paw. 32:43
Lau woʼu ndaʼuki,
“Ndipaka wongkomo rayami sangkani-ngkani pai tau anu ndapilisi i mPue Ala,
ee komi waʼa banca!”
11 #
Pol. 117:1
Pai seʼi woʼu,
“Undemo i Pue Ala, ee pura-pura banca
mbolimo pura-pura tau da maunde-unde Sira!”
12 #
Yes. 11:10
Pai seʼi woʼu anu natoʼo i Yesaya,
“Ungka ri oyo muli Isai da reʼe sambaʼa tau,
anu da mamparenta waʼa banca;
ri siaʼmo anu da napomata-mata waʼa banca!”
13I Pue Ala inceʼemo anu da ndipomata-mata. Mbolimo Sira da mawaika komi kawongko ndaya pai kalindo ndaya ua peayami ri Sira, da naka ua kuasa Inosa mPue Ala, ka komaroso-roso pampomata-matami ri Pue Ala.
Puʼunya painaka ewanceʼe oni ncura i mPaulu
15:14-21
14Ee waʼa ngkasangkompoku! Kuincani kojo maria ngaya anu madago reʼe ri komi, komi seʼe ndiincani mpengaya-ngaya pai ndikoto woʼu mombetotoraka sambaʼa pai sambaʼa. 15Paikanya reʼe bara tesangkuja ngaya, kupatiendoka komi ri kayonto-yontonya ri raya ncura seʼi, maka i Pue Ala mampepombaika ri yaku tetala seʼi. 16Sira anu roo mampapewali yaku toporioko i ngKerisitu Yesu pai ndapokau ri waʼa banca anu banya to Yahudi. Pai yaku motetala ewa tadu mpanyomba, anu mampobambarika Nuntu ngKatuwu ungka ri Pue Ala, da naka waʼa ntau anu banya to Yahudi da mewali sambaʼa panyomba ri Pue Ala anu da ndatarima. Tuarapa i Pue Ala da mampapewali tau seʼe ewa sambaʼa panyomba tepatani tila i mPue Ala. 17Mewali, ua yaku sambaʼa-mbaʼamo pai i Kerisitu Yesu, painaka maʼai kawongko ndayaku kono ri tetalaku tila i mPue Ala. 18Makoje yaku mompau ewancetu ua mangkono nunjaa anu ndapowiamo i ngKerisitu mampoliu yaku da mampapewali waʼa ntau anu banya to Yahudi da mepoʼinaya ri Pue Ala. Inceʼe kuwianaka mampoliu pompauku pai powiaku, 19simpoyunu pai waʼa ntanda ngkuasa anu ndapojingki ndaya; pura-pura setu mewali ua kuasa Inosa mPue Ala. Nuntu ngKatuwu kono i Kerisitu, kupobambarika pura-pura ri waʼa ntau, montepuʼumo ungka ri Yerusale jela ri Ilirikumi. 20Tangara ndayaku inceʼemo da mampobambarika Nuntu ngKatuwu ungka ri Pue Ala ri kareʼe ntau anu bareʼepa madonge kono i Kerisitu. Maka yaku bareʼe kupokono da mombangunaka ri wawo nono anu roo napomuya ntau ntaninya. 21#Yes. 52:15 Lau ndaʼuki ri Sura Magali,
“Waʼa ntau anu bareʼepa mantarima bambari kono Sira, da mangkita,
pai tau anu bareʼepa reʼe pangadongenya, da narata ndaya.”
Tinako ndaya i mPaulu da ndeku ri Roma
15:22-33
22 #
Rom. 1:13
Inceʼe puʼunya maria ngkanimo yaku tesalempori da madadu komi. 23Paikanya wawaseʼi waʼa ntetalaku ri daera-daera setu roomo. Motaʼu-taʼumo kadarayaku madadu komi. 24Ri pelinjaku da njoʼu ri Sipanyoli, da moliu yaku ri kotami, tuarapa da kuleʼo momberata pai komi da motobu sangkani-ngkani pai komi ri kawongko-wongko ndaya mau podo sarai. Roo setu kupomata-mata komi da mantulungi yaku ri da pelinjaku njoʼu ri Sipanyo. 25#1 Kor. 16:1-4 Paikanya seʼi yaku da njoʼu ri Yerusale da mangkeni waʼa mpetulungi ri waʼa ntau i mPue Ala anu njau njairia. 26Maka waʼa dompu ri Makedonia pai Akaya mamposintuwuimo mampasambaka waʼa mpetulungi tila waʼa ngkasangkompo anu kaasi-asi ri oyo waʼa ntau i mPue Ala anu njau ri Yerusale. 27#1 Kor. 9:11 Inceʼe nawianaka ntau seʼe ri kawongko ndayanya. Lawi kamonconya singkana tau seʼe da mantulungi waʼa ntau anu kaasi-asi ri Yerusale; maka ungka ri waʼa nto Yahudi, waʼa ntau anu banya to Yahudi mantarimamo pombai i mPue Ala. Mewali, waʼa ntau anu banya to Yahudi, singkana woʼu da mantulungi waʼa nto Yahudi ri pombai anu motaʼa ri aga-aga. 28Ane roomo kuparoo waʼa ntetalaku seʼi, pai mamparata waʼa mpetulungi anu ndapasambaka seʼe ri Yerusale, nepa da kumalai njoʼu ri Sipanyo da moliu ri kotami. 29Ane rata yaku ri komi, manoto karataku da mampareʼe popadonco anu gana-gana ungka ri Kerisitu da tilami.
30Mamposabi Pueta i Yesu Kerisitu, pai mamposabi Inosa mPue Ala anu ndawaika yaku, kuperapi kojo ri komi da naka ndiposipekakaika yaku ri kamonco-monconya ri Pue Ala. 31Ndipekakaika yaku da naka ndalapasaka i mPue Ala yaku ungka ri pale ntau anu bareʼe meaya ri Yudea, pai da naka tetalaku mamparata petulungi ri Yerusale da nasabe mpodago ri wongko ndaya waʼa ntau i mPue Ala anu njau njairia. 32Ua ewanceʼemo, ane ndatangara ndaya i mPue Ala, da kukoto maʼi momberata pai komi. 33Mbolimo i Pue Ala anu mawai kalindo ndaya ri waʼa ntolino, da sangkani-ngkani pai komi pura-pura. Ami.
@LAI 2000