PAIMBA 35
35
Waʼa ngkota tila nto Lewi
35:1-8
1 #
Yos. 21:1-42
Ri rato Moabi, ri wingke ngKoro Yarade, mosu ri kota Yeriko, i Pue mompau ri Musa ndatoʼo, 2“Toʼokamo banca Isaraeli, ungka ri tana panta anu da natarima ntau seʼe setu, reʼe bara tesangkuja kotanya sangkani pai pada anu sampotenginya sangaya-ngaya da nawaika to Lewi da napeari ntau seʼe njairia. 3Waʼa ngkota setu da napotumpumo nto Lewi da kareʼe mpeari ntau seʼe. Pada anu sampotenginya da napangkambi pinatuwu ntau seʼe. 4Pada setu kabangkenya 450 meteri da ndatubu ungka ri puʼu bente ngkota sape-sake. 5Mewali tana kareʼe nto Lewi mosulapa aopo, 900 meteri karatenya sanculapa-sanculapa, pai ri tongo-tongonya kalau ngkotanya. 6Ri waʼa nto Lewi sangaya-ngaya da ndiwaika aono kota pontuwuri da kanjoʼu mpolonco waʼa ntau anu mampapate tau ntaninya paikanya bareʼe naʼoamo. Pai da ndawaika woʼu to Lewi aopo mpuyu pai radua kota anu ntaninya 7sangkani pai padanya. Mewali poromunya pura-pura reʼe aopo mpuyu pai uayu kota tila nto Lewi. 8Karia ngkota nto Lewi ri oyo nto Isaraeli salemba-salemba seʼe sangaya-ngaya da ndapakanoto malulu karia ngkota pai kabangke ntana ri lemba setu.”
Waʼa ngkota pontuwuri
35:9-34
(Paw. 19:1-13, Yos. 20:1-9)
9-10 #
Yos. 20:1-9
Ndapokau i mPue i Musa, mamparata ri banca Isaraeli waʼa mpau seʼi, “Ane towotemo komi ri sambote ngKoro Yarade pai mesuamo ri tana Kanaʼa, 11komi sangaya-ngaya da mampakanoto waʼa ngkota pontuwuri, da naka waʼa ntau anu bareʼe naoamo mampepate tau ntaninya, da molonco njoiria. 12Ri waʼa ngkota setu tau setu da ndatuwuri ungka ri pampesawaki waʼa ngkasangkompo ntau anu ndapepate setu. Maka tau anu ndatuluri mampepate tau ntaninya, bareʼe maya ndapepate ane kara-karanya bareʼepa naparesa waʼa ntopobotusi. 13Pakanotomo aono kota pontuwuri, 14tatogo anu ri tondo pebetea ngKoro Yarade pai tatogo woʼu ri tana Kanaʼa. 15Kota anu aono setu da mewali kota pontuwuri ri komi, to Isaraeli pai ri tau mencua anu melinggona bara anu maroo-roomo ri oyomi. Isema ntano anu mampepatemo tau ntaninya ri kabareʼenya naʼoamo, maya molonco njoʼu ri sambaʼa kota setu.
16-18Paikanya ane sambaʼa tau mepepate mampake parewa labu bara watu bara kaju mampepate tau ntaninya, tau setu lawi topopepate; tau setu masala pai sangaya-ngaya ndahuku mate. 19Kasangkompo mosu, ungka ri tau anu ndapepate setu maya mawianaka huku mpepepate setu. Ane napomberataka topopepate setu maya napepate.
20Ae sambaʼa tau mampobanciika tau ntaninya, nepa napepate nadungkalaka tau setu bara natasoka bara nunjaa-njaa tau setu, 21bara najajangguru rantani mate, tau setu topopepate; siʼa masala pai sangaya-ngaya ndahuku mate. Kasangkompo mosu ungka ri tau anu napepate setu maya mawianaka popahuku mate setu. Ane napomberataka topopepate setu maya napepate.
22Paikanya ane rapanya reʼe sambaʼa tau anu bareʼe naʼoamo mampepate tau ntaninya anu bareʼe napobanciika, bara nadungkalaka tau setu bara natasoka bara nunjaa-njaa siʼa. 23Biasa woʼu mewali sambaʼa tau bareʼe nakita, manawu saogu watu painaka mate tau ntaninya anu banya iwalinya, pai lawi bareʼe natinakondaya da mampakarugi tau setu. 24Ri waʼa ngkara-kara anu ewanceʼe pewalinya, sangaya-ngaya gombo ntau sondo anu da mangabotusi ri oyo ntau anu mepepate setu pai tau anu da mampesawaka tau anu ndapepate setu. 25-28Gombo ntau sondo setu da mangangkantawi tau anu roo mepepate banya naʼoamo setu ungka da pesawa waʼa ngkasangkompo ntau anu napepate setu. Tau setu sangaya-ngaya da ndakeni mpewalili ri kota pontuwuri, anu kanjoʼu mpolonconya. Siʼa sangaya-ngaya da maroo-roo njairia, rantani mate tau anu mewali Tadu mPanyomba Bangke ri tempo setu; ane matemo Tadu mPanyomba Bangke setu nepa maya siʼa mewalili ri lipu mpebete ntanoananya. Paikanya ane napalaika kota pontuwuri kanjoʼu mpolonconya setu, nepa napomberataka pai napepate ngkasangkompo ntau anu napepate, pampesawaki setu banya pepepate toʼonya. 29Waʼa ncongka setu da galami pai waʼa mulimi, ri mbeʼi-mbeʼi ntano kareʼemi.
30 #
Paw. 17:6, 19:15 Kono ri kara-kara pepepate, tau anu ndatuluri mepepate, nepa maya ndapakanoto masala pai ndahuku mate, ane reʼe kakura-kuranya radua tau mewali sabi. Ane podo sambaʼa sabi bareʼepa gana da mampakaroso kamonconya. 31Sambaʼa topopepate sangaya-ngaya da ndahuku mate. Hukunya setu bareʼe maya da mabayarika doi. 32Ane sambaʼa tau molonco njoʼu ri sambaʼa kota pontuwuri, neʼe boi ndawaika siʼa mombayari pai doi da naka ndawai mewalili ri banuanya ri kabareʼepanya mate i Tadu mPanyomba Bangke. 33Ane komi mowia ewanceʼe, komi mampakakarikamo tana anu ndipeari. Pepepate mampakakarika tana; mewali bereʼe jaya ntaninya da mampakagali tana setu, waʼanyamo da mayali inosa ntopopepate setu. 34Neʼe boi ndipakakarika tana anu ndipeari, maka yakumo Pue, pai yaku maroo-roo ri tongo banca Isaraeli.”
@LAI 2000