PAIMBA 32
32
Waʼa lemba nto Isaraeli anu ri tondo mpebetea ngKoro Yarade
32:1-42
(Paw. 3:12-22)
1Lemba nto Rube pai to Gati mampotumpu pinatuwu anu sondo kojo. Butu nakita ntau seʼe kalese ntana Yaese pai tana Gilea da ndapangkambi pinatuwu, 2njoʼumo tau seʼe madadu i Musa, Tadu mPanyomba Eleasari, pai waʼa ntadulako nto Isaraeli ntaninya. Natoʼo ntau seʼe, 3-4“Tana potunda waʼa ngkota: Ataro, Dibo, Yaese, Nimira, Hasibo, Eleale, Seba, Nebo pai Beoni anu napotundakimo nto Isaraeli ua pantulungi i mPue, maʼai ngkadagonya da ndapangkambi pinatuwu. Maka pinatuwu mami maʼai ngkasondonya, 5kaperapi da naka tana seʼi ndiwaimo gala mami. Neʼemo ndipokau kami da melimba ri sambote ngKoro Yarade.”
6Masono i Musa natoʼo, “Ara da moncomo komi da maroo-roo ireʼi, sinsara waʼa ntau kasambaʼa-mbaʼa bancami njoʼu moʼiwali? 7Wenu painaka komi da mampareʼe eka ndaya ri banca Isaraeli da mangawote Koro Yarade da mangasuaki tana anu ndawai i mPue ri tau seʼe? 8#Pai. 13:17-33 Waʼa mpapami ewanceʼe seʼe powianya, ri tempo pampokauku tau seʼe ungka Kadesi-Baranea da mampadasoki tana setu. 9Tau seʼe jelamo ri Yombo Esikoli pai nakitamo woʼu tana setu. Paikanya butu mewalili tau seʼe, naekati ntau seʼe to Isaraeli da naka neʼe nataha mancuaki tana anu ndawai i mPue ri tau seʼe. 10-11#Pai. 14:26-35 Inceʼe painaka marau raya i mPue ri tempo setu pai ndapantoʼo, ‘Waʼa ntau setu bareʼe mapoʼinaya ri Yaku. Inceʼe painaka montandokoro Yaku, kono tau seʼe anu tinuwu ruampuyu ntaʼu waindeku ri tempo mpalai ungka ri tana Masiri, bereʼe anu da mesua ri tana anu kujanjika i Burahima, i Saki pai i Yako.’ 12Pura-pura tau kono popahuku setu ndasangadika i Kalebi ana i Yapune to Kenasi, pai i Yosua ana i Nuu, maka tau seʼe radua mepoʼinaya ri Pue. 13Ndapokarau i mPue to Isaraeli, painaka ndapapaliuka tau seʼe teyoro-yoro ri pada bone aopo mpuyu ntaʼu kasaenya, rantani mate pura-pura tau anu mangaewa sira. 14Pai seʼi-seʼi komi da meewa ewa waʼa mpapami! Komi lawi santibura waʼa ntau anu masalaa, anu mampapebete karau ndaya i mPue anu gana-gana ri banca Isaraeli! 15Ane komi metoro mbalili mantalikusi i Pue, pura-pura to Isaraeli seʼi da ndapapaliuka naka terangani woʼu kasaenya ri pada bone, pai komimo puʼunya kagero ntau seʼe!”
16Nepa metimosuki ri Musa waʼa nto Rube pai waʼa nto Gati setu, natoʼo, “Moruana kami da mampowia riunya waʼa bonco ndarindika watu da kareʼe waʼa bimba mami, pai waʼa ngkota anu ndabete da kareʼe rongo pai ana mami. 17Kami da mompatikali da naka ronga njoʼu moʼiwali sangkani-ngkani pai waʼa ngkasangkompo mami. Kami anu da mporiuka ri poʼiwali da mangkeni mpesua tau seʼe ri tana anu da napotumpu ntau seʼe. Sindara setu ana pai rongo mami da metaʼa ireʼi, ri raya waʼa ngkota bente, bareʼe da najaʼati waʼa ntau ri tana seʼi. 18Bareʼe da mewalili kami ri banua mami, ane bareʼepa pura-pura to Isaraeli mampotumpu tana anu napopanta ntau seʼe. 19Kami bareʼe da katarima mau sakodi ntano tana ntau seʼe anu ri sambote ngKoro Yarade.”
20Mesono i Musa natoʼo, “Ane monco-monco kojo komi da tikali moʼiwali tila i mPue, 21pai pura-pura komi anu mangkoto da moʼiwali da mawote Koro Yarade, pai ua pombawanaka i mPue maungku waʼa iwali rantani ndairi i mPue tau seʼe, 22painaka lemba setu meʼuru ri Sira, nepa da mewalili komi, puramo tetala anu da ndiwianaka tila i mPue pai tila waʼa ngkasangkompomi, pai i Pue da mawai tana anu di tondo pebetea seʼi galami. 23Paikanya da ndipaincani, ane bareʼe ndibangani janjimi, komi masalaa ri Pue pai da ndahuku ua salaami setu. 24Ndipalaimo njoʼu mawangu pai waʼa bonco bimbami, pai neʼe ndikalingani mabangani nunjaa anu roo ndijanji setu!”
25Nepa natoʼo waʼa nto Gati pai to Rube, “Kami sangaya-ngaya da mangawianaka nunjaa anu ndisongkaka kami. 26Ana pai rongo sangkani pai bimba mami da maroo-roo ireʼi ri waʼa ngkota Gilea. 27Paikanya kami seʼe tikali da njoʼu mombetoto ri pawawanaka i mPue. Kami da mangawote Koro Yarade da moʼiwali silulu pai anu roo nditoʼo.”
28 #
Yos. 1:12-15
Inceʼe painaka naparata i Musa songka seʼi ri Tadu mPanyomba Eleasari, ri Yosua pai waʼa ntadulako nto Isaraeli, 29“Ane waʼa nto Gati pai waʼa nto Rube mampedongeka songka i mPue pai mawote Koro Yarade da moʼiwali, pai ua pelae ntau seʼe ndileʼo marampa tana setu, inceʼe painaka tana Gilea sangaya-ngaya da ndiwaika napotumpu ntau seʼe. 30Paikanyua ane bareʼe nawote ntau seʼe Koro Yarade da moʼiwali sangkani-ngkani pai komi, tau seʼe sangaya-ngaya da marata tana panta ri tana Kanaʼa, siwia pai komi.”
31Mesono waʼa nto Gati pai waʼa nto Rube natoʼo, “Da ndipaincani, kami da mangawianaka nunjaa anu ndasongkaka kami i mPue. 32Ri pombawanaka i mPue kami da mowote njoʼu ri tana Kanaʼa da njoʼu moʼiwali, paikanya mbolimo tana anu ri tondo mpebetea ngKoro Yarade da kapotumpumo mpaliu.”
33Nawaimo i Musa ri waʼa lemba nto Gati pai to Rube pai santila ungka ri lemba nto Manase pura-pura tana Siho, mokole Amori, pai daera Ogo, mokole Basa tesua waʼa ngkota ri tana anu sampotenginya. 34Lemba nto Gati anu mawali wangu muni kota Dibo, Ataro, Aroe, 35Ataro-Sopa, Yaese, Yogibeha, 36Beta-Nimia pai Beta-Hara inceʼemo waʼa ngkota anu ndabete pai kareʼe waʼa bonco bimba. 37Lemba nto Rube anu mawali wangu muni waʼa ngkota Hasibo, Eleale, Kiriataimi, 38Nebo, Baali-Meoni pai Seba. Waʼa ngkota anu nawali wangu muni ntau seʼe setu nasawani toʼonya.
39To Makiri, muli i Manase maungku tana Gilea, naleʼo marampa nepa nairi waʼa nto Amori anu mampeari tana setu. 40Inceʼe puʼunya painaka nawaimo i Musa tana Gilea setu ri to Makiri, painaka rodomo tau seʼe njairia. 41I Yairi ungka ri lemba i Manase maungku pai maleʼo marampa bara tesangkuja lipu, nepa napapotoʼoka “Waʼa Lipu Yairi”. 42I Noba maungku pai marampa Kenati sangkani pai waʼa lipu anu sampotenginya, nepa napapotoʼoka Noba, malulu toʼonya ngkalionya.
@LAI 2000