PAIMBA 30
30
Padika kono tanga
30:1-16
1Naparata i Musa waʼa mpadika seʼi ri waʼa ntadulako lemba nto Isaraeli. 2#Paw. 23:21-23, Mat. 5:33 Ane reʼe sambaʼa tuama montanga bara mojanji pai montandokoro ri suara i mPue, painaka tesoʼomo siʼa ri janjinya setu, siʼa sangaya-ngaya da mabangani janjinya setu pai bareʼe maya meuranaka ungka ri paunya.
3-4Ane reʼe sambaʼa anaweʼa anu ntongo maroo-roo ri banua mpapanya montanga ri Pue pai tesoʼomo siʼa ri sangaya janji ane nadongemo mpapanya paikanya bareʼe mokabarata, sangaya-ngaya da nabangani anaweʼa setu, pura-pura tanganya pai janjinya setu. 5Paikanya ane ri tempo mpangadonge mpapanya tanganya setu liu-liu naseko anaweʼa setu bareʼe tesoʼo ri tanganya pai janjinya setu. Bareʼe da ndakitanaka i mPue siʼa, maka napetangani mpapanya siʼa.
6-7Ane sambaʼa anaweʼa anu bepa molangkai montanga bara mancoʼo koronya ri sangaya janji, bara natimba-timba mpodago riunya bara bareʼe, siʼa tesoʼomo ri tanga bara janjinya setu. Ane molangkaimo siʼa, podoia i langkainya bareʼe mokabarata ri padongenya pojanji setu, siʼa da tesoʼo mpaliu ri tanga pai janjinya setu. 8Paikanya ane ri tempo mpangadonge i langkainya liu-liu napetangani, siʼa telapamo ungka ri tanga pai janjinya setu. Bareʼemo ndakitanaka i mPue siʼa.
9Ane sambaʼa bemba weʼa anu natajika langkainya montanga bara mojanji, siʼa tesoʼomo ri tanganya bara janjinya setu pai sangaya-ngaya da nabangani.
10Ane sambaʼa weʼa anu molangkaimo montanga bara mojanji mancoʼo koronya, 11siʼa sangaya-ngaya da mabangani pura-pura anu roomo najanji, podoia bareʼe nakabarata langkainya ri tempo padongenya. 12Paikanya ane ri tempo mpadonge langkainya liu-liu napetangani siʼa, ane ewanceʼe weʼa setu telapamo ungka ri tanga bara janjinya. Powia setu bareʼe da ndakitanaka i mPue, maka langkainya mampetangani siʼa. 13I langkai reʼe kuasanya masintuwunaka bara mabalisaka tanga bara janji anu napowia ndongonya. 14Paikanya ane ri tempo mpadonge langkainya setu bareʼe napetangani, weʼa setu sangaya-ngaya da mabangani tanga bara janjinya setu. Kamonconya langkainya masintuwunaka tanga bara janji ndongonya, maka bareʼe napetangani ri tempo mpadongenya. 15Ane ripurinya nabalisaka langkainya tanga bara janji ndongonya setu, langkainyamo anu da mangkoyo salaa ndongonya setu.
16Incetumo podede mpadika anu naparata i Musa silulu pai natarima ungka ri Pue kono tanga bara janji anu napowia ana weʼa anu laupa ri banua mpapanya, bara sambaʼa weʼa anu molangkaimo.
@LAI 2000