PAIMBA 2
2
Pokema nto Isaraeli salemba pai salemba
2:1-34
1Ndatoʼo i mPue ri Musa pai Haruni: 2“Ri tempo pawangu nto Isaraeli kemanya, salemba-salemba seʼe da mokema mantolilimi bandera ngkasambaʼa-mbaʼanya pai da reʼe petondoni salemba-salemba seʼe. Pura-pura kema setu da ndawangu mantolili Kemaku, paikanya neʼe mosu.”
3-9Ri tondo pebetea, inceʼe suradado anu ri ara bandera ngkasambaʼa-mbaʼa i Yahuda, da mokema malulu katetila-tilanya pai waʼa ntadulakonya sambaʼa-sambaʼa seʼe, ewaseʼi:
| LEMBA | TADULAKO | IMBA NTAU |
|---|---|---|
| Yahuda | Nahasso ana i Aminada | 74.600 |
| Isakari | Netaneeli ana i Ncuari | 54.400 |
| Sebulo | Eliabi ana i Heloni | 57.400 |
| Poromunya: | 186.400 |
Surodado to Yahuda inceʼe da melinja ri suara mpodago.
10-16Ri tondo selata, inceʼe surodado anu ri ara bandera ngkasambaʼa-mbaʼa i Rube, da mokema malulu katetila-tilanya pai waʼa ntadulakonya malulu posuncunya:
| LEMBA | TADULAKO | IMBA NTAU |
|---|---|---|
| Rube | Elisuri ana i Ncedeuri | 46.500 |
| Simeo | Selumieli ana i Ncurisadai | 59.300 |
| Gati | Eliasa ana i Rehueli | 45.650 |
| Poromunya: | 151.450 |
Kasambaʼa-mbaʼa i Rube sangaya-ngaya da melinja ri tondanya karadua.
17Roo setu, ri tongo-tongo ncurodado nto Isaraeli, lau waʼa nto Lewi anu mampoaju Kema i mPue. Da ewa ri pokema ntau seʼe, da ewanceʼe seʼe ri pelinja ntau seʼe, malulu banderanya sambaʼa-sambaʼa seʼe.
18-24Ri tondo kasoyoa, surodado anu ri ara bandera ngkasambaʼa-mbaʼa i Eparai, da mokema malulu katetila-tilanya pai waʼa ntadulakonya malulu posuncunya:
| LEMBA | TADULAKO | IMBA NTAU |
|---|---|---|
| Eparai | Elisama ana i Amihu | 40.500 |
| Manase | Gamalieli ana i mPedasuri | 32.200 |
| Benyami | Abidani ana i Gedeoni | 35.400 |
| poromunya: | 108.100 |
Surodado to Eparai sangaya-ngaya da melinja tondo ri taliku nto Lewi.
25-31Ri tondo utara, surodado anu ri ara bandera ngkasambaʼa-mbaʼa i Daa da mokema malulu katetila-tilanya pai waʼa ntadulakonya malulu posuncunya:
| LEMBA | TADULAKO | IMBA NTAU |
|---|---|---|
| Daa | Ahieseri ana i Amisadai | 62.700 |
| Asere | Pagieli ana i Akorani | 41.500 |
| Natali | Ahira ana i Enani | 53.400 |
| Poromunya | 157.600 |
Surodado to Daa da melinja ri puri mpodago.
32Poromu imba nto Isaraeli anu teʼuki ri kasambaʼa-mbaʼa malulu katetila-tilanya setu: 603.550 tau. 33Malulu songka i mPue ri Musa, to Lewi bareʼe ndaʼuki sangkani-ngkani pai imba nto Isaraeli anu ntaninya.
34To Isaraeli mawianaka pura-pura songka i mPue ri Musa. Sambaʼa-sambaʼa seʼe mokema mantolilimi banderanya, pai ane melinja da malulu katetila-tilanya santina-santina seʼe.
@LAI 2000