YOSUA 4
4
Pampomuya watu sampuyu pai radua mewali petondoni
4:1–5:1
1Ri katowotemo nto Isaraeli pura-pura ri sambote ngkoronya, ndatoʼo i mPue ri Yosua, 2“Pilisimo tau sampuyu pai radua, sambaʼa lemba sambaʼa tau. 3Songkaka tau seʼe da mantima watu sampuyu pai radua ogu ungka ri tongo ngKoro Yarade ri kanjau mpekakore waʼa ntadu mpanyomba. Watu setu da napasaʼa ntau seʼe rata ri kareʼe da pokemami naini mawengi.”
4Napeboo i Yosua tau sampuyu pai radua anu ndapakanoto setu, 5nepa natoʼoka tau seʼe, “Ndikanjoʼumo ri tongo ngKoro Yarade, ri suara mPeti mPojanji i mPue Ala puemi. Sambaʼa-sambaʼa komi da mantima watu ungka njairia – nditima sampuyu pai radua ogu watu malulu imba lemba nto Isaraeli. 6Waʼa mbatu setu da mewali patiendo ri banca setu kono nunjaa anu ndapowia i mPue. Ripurinya ane meoasi anami nunjaa posokinya waʼa mbatu seʼi ri komi, 7sangaya-ngaya da nditotorakaka tau seʼe kono ue ngKoro Yarade anu tepogaʼa butu Peti mPojanji i mPue Ala ndakeni mawote koronya. Waʼa mbatu setu da mampatiendo to Isaraeli kono nunjaa anu mewali ireʼi.”
8Nawinaka ntau sampuyu pai radua setu anu napepokauka i Yosua. Silulu pai totoraka i mPue ri Yosua, natima ntau seʼe watu sampuyu pai radua ogu ungka ri tongo-tongo ngKoro Yarade – imbanya silulu pai kasondo imba lemba nto Isaraeli – nepa napasaʼa ntau seʼe ri da kareʼe mpokemanya. 9Ri tongo-tongo ngKoro Yarade setu woʼu, napatapi i Yosua watu sampuyu pai radua ogu ri waka mpekakore waʼa ntadu mpanyomba anu mampoaju Peti mPojanji setu. (Waʼa mbatu setu ntongo njaupa rantani wawaseʼi.) 10Waʼa ntadu mpanyomba janjau mekakore ri tongo-tongo ngKoro Yarade rantani roo nawianaka ntau seʼe pura-pura anu ndasongkaka i mPue ri tau seʼe mampoliu i Yosua. Inceʼe silulu pai totoraka i Musa ri Yosua.
Maliga kojo powote nto Isaraeli i Koro Yarade. 11Butu towotemo pura-pura, mesindiu muni waʼa ntadu mpanyomba anu mampoaju Peti mPojanji melinja ri suara ntau seʼe. 12Silulu pai songka anu naparata i Musa, waʼa mpomakoje ungka rilemba i Rube, i Gati pai santila ungka ri lemba i Manase, inceʼe mesindiumo mawote koronya. 13Imba ntau seʼe reʼe 40.000 tuama anu tikali pai parewa mpoʼiwali pai tokamo da mombetoto. Ri suara i mPue powote ntau seʼe mantagodi rato anu lene mosu ri Yeriko.
14Ri sandeme setu waʼa anu ndapowia i mPue, mampapopuʼu pantubunaka nto Isaraeli i Yosua ewa sambaʼa tau anu ndabangkei. Sangkasae ngkatuwunya natubunaka ntau seʼe ewa napantubunaka ntau seʼe i Musa.
15Ungkalairia ndapokau i mPue i Yosua, 16mancongka waʼa ntadu mpanyomba anu mampoaju Peti mPojanji setu da naka malai ungka ri Yarade. 17Nawianaka i Yosua songka i mPue ri siʼa. 18Jabutu towotemo waʼa ntadu mPanyomba, moili muni ue, pai melampangi ewa ri kabareʼepanya mowote to Isaraeli.
19Katowote nto Isaraeli ri sambota ngKoro Yarade kono ri sampuyu eo mbuya anu kaʼisa, nepa mokema tau seʼe ri Giligali tondo mpebetea kota Yeriko. 20Njairia napampatapi i Yosua watu sampuyu pai radua anu ndatima ungka ri tongo ngKoro Yarade. 21Nepa natoʼo i Yosua ri waʼa nto Isaraeli, “Ane ripurinya waʼa anami mampeoasi kono posoki waʼa mbatu seʼi, 22da nditoʼoka tau seʼe ri tempo to Isaraeli mawote Koro Yarade, tau seʼe malinja ri kangau-ngaunya. 23Ndituntuka tau seʼe i Pue Ala puemi mampakangau ue ngKoro Yarade da naka dago mpelinjami rantani kami pura-pura towote ri sambote, ewanceʼe seʼe ndapampakangau Tasi Mawaa naka dago mpowote mami, 24da napaincani ntau ri sambawo lino ewambeʼi kabangke ngkuasa i mPue. Inceʼe puʼunya painaka komi da mantubunaka i Pue Ala puemi rantani masae-sae.”
@LAI 2000