POTETALA WA'A NCURO 17
17
Ri Tesalonika
17:1-9
1Malaimo i Paulu pai i Silasi moliu ri Ampipoli pai Apolonia nepa jela ri Tesalonika. Njairia njau banua mpekakai nto Yahudi. 2I Paulu njoʼu ri banua mpekakai nto Yahudi – ewa anu napobiasa ane reʼe banua mpekakai nto Yahudi, siʼa njoʼu mompasimbaju pai waʼa ntau njairia kono bangani Ncura Magali. Tatogo eo Umapo i Paulu bareʼe bali-bali njoʼu ri banua mpekakai setu. 3Malulu bangani Ncura Magali natotoraka pai napatongawa i mPaulu, i Mokole Tadungkadago anu ndajanji i mPue Ala sangaya-ngaya da mangaepe pejeani rantani mate, pai tuwu muni ungka ri kapate. “I Yesu anu kupetumbuka komi seʼi inceʼemo Mokole Tadungkadago anu ndajanji setu.” 4Bara tesangkuja tau anu meayamo malulu i Paulu pai Silasi; ewanceʼe seʼe maria to Garika anu mampokaeka i Pue Ala pai maria woʼu waʼa mbeʼa anu tetubunaka meayamo.
5Paikanya waʼa nto Yahudi masina rayanya. Napasambaka ntau seʼe waʼa ntau anu merapi-rapi ri jaya-jaya, napareʼe ntau seʼe gerombola mampakakaliwongo. Tau seʼe manggora-nggora sandaya ngkota, nepa napesuaki ntau seʼe banua i Yaso mampepali i Paulu pai i Silasi, da nakeni ntau seʼe i Paulu pai Silasi ri tongo ntau sondo. 6Paikanya ua bereʼe narata ntau seʼe i Paulu pai i Silasi, painaka nanoʼo ntau seʼe i Yaso pai bara tesangkuja waʼa ntau meaya anu ntaninya ri suara waʼa nto poncongka anu makuasa ri kota setu. Meboo-boo tau seʼe natoʼo, “Waʼa ntau seʼimo anu mampakaguaga ri mbeʼi-mbeʼi, pai seʼi jela woʼu tau seʼe ri kotata seʼi, 7pai i Yaso seʼi anu mampolinggona tau seʼe ri banuanya. Tau seʼe maewamo waʼa ncongka i Datu ri Roma. Maka natoʼo ntau seʼe reʼe mokole ntaninya i Yesu toʼonya.” 8Pompau ntau seʼe ewanceʼe mampaka tesalutengku waʼa ntau sondo pai waʼa ntau makuasa ri kota setu. 9Napokau waʼa ntau makuasa ri kota setu da naka i Yaso pai waʼa ntau meaya anu ntaninya da mabayari denda. Roo setu nepa nalapa ntau seʼe.
Ri Berea
17:10-15
10Ri wengi setu seʼe waʼa ntau meaya ri Tesalonika mampapalai i Paulu pai i Silasi njoʼu ri Berea. Kajelanya njairia njoʼumo i Paulu pai i Silasi ri banua mpekakai nto Yahudi. 11Waʼa ntau anu ri Berea inceʼepa anu tebulere rayanya painaka waʼa ntau anu ri Tesalonika. Mawongko raya ntau seʼe mampedongeka nuntu kono i Yesu, pai sandeme-sandeme tau seʼe mampeguru bangani Ncura Magali, da naparata ndaya ntau seʼe kamonco anu napaguru i mPaulu. 12Maria ri oyo ntau seʼe meayamo ri Yesu, maria woʼu waʼa nto Garika anu ndatubunaka madago waʼa mbeʼa pai waʼa ntuama meayamo. 13Butu nadonge nto Yahudi anu ri Tesalonika, kanjau woʼu i mPaulu ri Berea mampetumbu nuntu i mPue Ala, njoʼu woʼu tau seʼe mantundeki to Berea, painaka lingu raya ntau seʼe. 14Pewalinya ewanceʼe, maliga-liga waʼa ntau meaya njairia mawawa i Paulu ri wiwi ntasi, paikanya i Silasi pai i Timotiu maroo-roopa ri kota setu. 15Nawawa ntau seʼe i Paulu rata ri Atena. Pewalili ntau seʼe anu mawawa i Paulu ri Berea, tau seʼe mangkeni patuu i mPaulu natoʼo, da naka i Silasi pai i Timotiu da ronga maluluwaka siʼa.
Ri Atena
17:16-34
16Sindara i Paulu mampopopea i Silasi pai i Timotiu ri Atena, masusa kojo raya i mPaulu, maka nakita kota setu buke-buke pai waʼa lamoa. 17Inceʼe puʼunya ri banua mpekakai, mompasimbaju siʼa pai waʼa nto Yahudi pai waʼa ntau ntaninya anu manyomba ri Pue Ala. Ewanceʼe seʼe sandeme-sandeme ri raya mpasari siʼa mompasimbaju pai waʼa ntau anu njau njairia. 18Sangkani, mombebali-bali i Paulu pai waʼa guru anu malulu pompaguru nto Epikuri pai to Sitoa. Reʼe bara tesangkuja ri oyo ntau seʼe anu mantoʼo, “Nunjaa naincani ntau seʼi? Pangaincaninya podo sakodi, paikanya maria paunya.” Bara tesangkuja woʼu mantoʼo, “Tau seʼi mampobambarika kono waʼa lamoa ntaninya.” Natoʼo ntau seʼe ewanceʼe maka i Paulu mampau kono i Yesu pai kono katuwu muni ri karoo mate. 19Nakeni ntau seʼe i Paulu ri kareʼe mpomberata ri Buyu Areopagu, njairia natoʼo ntau seʼe ri siʼa, “Kami da raya mami madonge pompagurumu anu nupau setu. 20Maka siko mampau anu kapojingki ndaya madonge, inceʼe da raya mami maincani posokinya.” (21Maka pura-pura to Atena pai waʼa ntau mencua anu njau njairia napokono kojo motunda-tunda mampedongeka pai mampasimbaju nunjaa anu nepa padongenya.)
22Pekakore i mPaulu ri Areopagu ri suara ntau setu, natoʼo i mPaulu, “Ee komi waʼa nto Atena! Kukitamo, komi seʼi ri mpengaya-ngaya tongawa kojo maʼai kojo poʼagamami. 23Maka ri pelinja-linjaku ri raya ngkota seʼi, kukitamo waʼa lampaʼani mpanyombami ri lamoa, pai kukita woʼu sambaka kareʼe mpanyomba anu njau ukinya mantoʼo, ‘Tila mPue Ala Anu Bareʼe Ndaincani!’ Mewali komi mampanyomba mPue Ala anu bareʼe ndiincani toʼonya, pai inceʼemo anu maʼi kupetumbuka komi seʼi. 24#1 Raj. 8:27, Yes. 42:5, Pwn. 7:48 I Pue Ala anu mampapewali lino sangkani pai waʼa banganinya. Siramo Pue yangi pai tana. Sira bareʼe da maroo-roo ri banua lamoa anu napowia mpale ntolino. 25Sira bareʼe da merapi tulungi ri tolino, maka Siramo anu mawai katuwu inosa pai mpengaya-ngaya ri tolino. 26Maka mopuʼu ungka ri sambaʼa tolino, ndapapewali waʼa banca anu mampeari ri sambawo lino. Sira seʼe anu mampakanoto ungka ri tepuʼunya kono tempo pai ri mbeʼi da katuwunya. 27Ndapowia i mPue Ala ewanceʼe da naka waʼa ntolino mampepali Sira. Tuarapa da narata ntau seʼe Sira ri sindara mpapepepalinya, paikanya kamonconya i Pue Ala bareʼe lawa ungka ri tau seʼe sambaʼa pai sambaʼa. 28Ewa anu natoʼo ntau, ‘Kita tuwu, kita molengko pai reʼe ri lino seʼi podo ua kakuasa-A,’ ewanceʼe seʼe anu natoʼo waʼa nto pokayorimi. Maka natoʼo, ‘Kita seʼi pura-pura waʼa ana-A!’ 29Mewali ua kita seʼi waʼa ana mPue Ala, bareʼe maya kita da mampasiwia i Pue Ala pai turuki lamoa anu ndapowia ungka ri wuyawa, salaka bara watu anu ndapowia malulu kaloʼe mpale ntolino. 30Maka katengota bareʼemo ndapepalisi i mPue Ala, paikanya seʼi-seʼi ndapokau tau sambawo lino da naka majea ungka ri waʼa ncalaanya. 31Maka roomo ndapakanoto sangkani tempo da ndabotusi huku ntau sambawo lino seʼi ri gori ngkamonconya. Tetala setu da nawianaka ntau sambaʼa anu roo ndapilisi i mPue Ala. Pai da napaaya ntau pura-pura kono incetu, tau setu ndawali mpatuwu muni i mPue Ala ungka ri kapate!” 32Padonge ntau seʼe da katuwu muni ntau mate, reʼe ri oyo ntau seʼe anu mampogeleka i Paulu. Reʼe woʼu anu mantoʼo, “Ntongo da raya mami madonge totoraka kono inceʼe.” 33Ungka lairia malaimo i Paulu ungka ri potobu setu. 34Paikanya reʼe bara tesangkuja ri oyo ntau setu anu maʼaku i Paulu pai meayamo ri Yesu, sambaʼa i Dionisiu siʼa sambaʼa anggota majalisi ri Areopagu, pai weʼa sambaʼa i Damari toʼonya, pai reʼe woʼu bara tesangkuja tau.
@LAI 2000