2 TESALONIKA 2
2
I Manusia Majaʼa
2:1-12
1 #
1 Tes. 4:15-17
Kono da karata mPueta i Yesu Kerisitu, pai kono da ndapampasambaka kita da maroo-roo sangkani-ngkani pai Pue, inceʼemo anu kuperapi kojo ri komi: 2Neʼemo komi saru-saru da lingu rayami pai masusa rayami ua madonge bambari anu mantoʼo ratamo eo ngkajela muni i Yesu. Bara bambari setu podo mopuʼu ri sambaʼa wati ntau, bara ungka ri sangaya pompaguru; pai bara reʼe anu mangantoʼo reʼe kaʼuki anu ewanceʼe ri raya ncambaʼa sura mami. 3Paikanya mau bara ewambeʼi ntano, neʼe boi nalego-lego ntau komi. Maka ri kabareʼepanya rata ri eo setu, da reʼe riunya petondoni anu da mewali: Maria tau anu da mampesapuka peayanya, mampesapuka i Kerisitu; pai i Manusia Majaʼa anu tepakanoto da mewali bangani naraka, da mampetujuka koronya. 4#Dan. 11:36, Yeh. 28:2 Ri pekiunde siʼa da meewa pai medika ri wawo pura-pura anu napanyomba ntolino, bara ri pura-pura lamoa anu naposaru ntolino Pue Ala. Rantani da motunda ri raya Banua mPue Ala nepa da natoʼo kasiʼanya Pue Ala.
5Bara bareʼemo kono ndiendo karoonyamo kutoʼoka komi pura-pura setu ri sindara yaku maroo-roo sangkani-ngkani pai komi. 6Pai komi ndiincani nunjaa anu wawaseʼi ntongo mantaʼamaka da katepewalinya pura-pura setu. Nepa ri tempo anu ndapakanoto i mPue Ala, i Manusia Majaʼa setu da mepapamara. 7Roso anu mampowia jaʼa setu montepuʼumo motetala ntongo rahasiapa, maka ntongo reʼepa anu mantaʼa-ntaʼamaka. Sangadi ndawawencemo anu mantaʼamaka setu, 8#Yes. 11:4 nepa da tongawa i Manusia Majaʼa setu. Maka ane ratamo i Pue Yesu, Sira da mampepate i Manusia Majaʼa setu, ndatawuisi, nepa ndageroka pai sindi ngkilaya ngkarata-A. 9#Mat. 24:24 I Manusia Majaʼa setu da mepatongawa pai sangaya kuasa anu bangke ungka ri Majaʼa. Siʼa da mampetujuka mpengaya-ngaya tanda ngkuasa anu ndapojingki ndaya anu buke pai waʼa mpetengosi. 10Siʼa da mampake mpengaya-ngaya akala mpetengosi anu maʼai ngkajaʼa da mampakalingu raya waʼa ntau anu da magero. Tau da magero maka bareʼe mantarima pai bareʼe mampokono nuntu anu monco ungka ri Pue Ala anu mangkoto mancorepaka tau seʼe. 11Inceʼemo puʼunya painaka ndawai i mPue Ala ri tau seʼe kuasa anu da mampakalingu raya ntau seʼe, rantani tau seʼe meayamo ri anu bareʼe monco. 12Kapusanya, pura-pura tau anu mampomadota salaa pai bareʼe meaya ri anu monco setu, da ndahuku.
Komi ndapilisi ua da ndasorepaka
2:13-17
13Ee waʼa ngkasangkompo anu ndapotowe i mPue! Bareʼe bali-bali kapantoʼo tarima kase ri Pue Ala kakononya komi, maka ungka ri tepuʼunya i Pue Ala roo mampilisi komi ua da ndasorepaka. Inceʼe mewali ua potetala Inosa mPue Ala anu magali ua peaya ndayami ri Nuntu anu monco ungka ri Pue Ala. 14Ua kaʼinceʼenya komi ndapeboo i mPue Ala mampoliu Nuntu ngKatuwu anu kapetumbuka komi. I Pue Ala mampeboo komi, maka pepokono-A da naka komi marata tila ri peawa mPueta i Yesu Kerisitu. 15Inceʼe painaka komi da maroso pekakoremi pai mekekeni maroso ri waʼa anu roo kapaguruka komi, madago anu kapau nguju ri komi bara anu kaʼuki ri sura. 16Mbolimo, Pueta i Yesu Kerisitu, pai i Pue Ala Papata mampalindo pai mampakaroso rayami da ndipangkoto mampotetalaka pai mampobambarika anu madago. 17Maka i Pue Ala mampotowe kita, pai ua kadago ndaya-A Sira mampakatodo kita pai mampomata-mata anu madago.
@LAI 2000