Jonashi 2
2
Jonashi iniakerira Tasorintsi
1Antari inakera Jonashi isegutoku kañovetakaririra omani, ovashi inianakeri Tasorintsi shintaririra,
2ikanti:
«Antari nokenkisureavagetanakara noniakempi viro,
Notinkami, impo viro pikemakena.
Antari noneavakara panikyara nonkamanake
nosaviatakovagetanakera nonianakempi, viro
pikemakena ovashi pitsarogakagaana.
3Pokaavagetakena saviaku otsonpogiatira omaraane nia,
noshintsiatakovagetanaketyo kara. Ogari omarapageni ovore
apamankakovagetanakenatyo kara virotari kogankitsi
onkañotakempara maika.
4Naro noneaka onti pokavagetakena parikoti tera nonae viroku;
impo nosuretanaka nokanti garorokari noneimatairo pivanko.
5Ogari nia apamankovagetakenatyo magatiro;
nonavagetaketyo saviaku; ogari mankosepage
avuagetanakenatyo nogitoku.
6Notsitigavagetanaketyo kara saviaku notsatavagetaketyo
onakera kipatsi;
¡Noneakatyo oganirikatyo nokañotanakari yashitakotaganirira,
garatyo nokonteatumatai! Kantankicha viro, Notinkami,
notasorintsite, pitsarogakagakena ovashi pogavisaakotaana
tera nonkame.
7Antari noneavakara tenige noshintsitae, vintityo nosuretanaka,
Notinkami, impo nonianakempi viro pikemakena anta pivankoku.
8Yogaegiri ventaigaririra pashini itasorintsiegite kogapage
garatyo ikantumaigimpi ishineventumaigimpi viro;
9kantankicha naro, noshineventavagetakempityo kara, aikiro
nontagakempi piratsi, nontsatagakero
maika nokantakempirira. ¡Panirotari viro, Notinkami, pagaveakera
pogavisaakotantakera!»
10Impo yogari Tasorintsi itigankakeri otsapiaku kañovetakaririra omani kameti inkamarankakotaerira Jonashi.
Proyecto Biblia Matsigenka © Sociedad Bíblica Peruana.