EXODUS 40
40
Puan Biakinn Cu Pathian Sinah An Pek
1 Bawipa nih Moses cu a thawh i, 2“Thla khatnak thla ni khatnak ni ah Pathian umnak thlam pumhnak thlam cu na dirter lai. 3Biakamnak hngalhter ṭhantu lungtlap hna umnak kuang kha a chungah na chiah lai i puanzar na khuh lai. 4Cabuai kha a chungah na chiah lai i a cungah a thilri vialte kha na chiah hna lai. Meiinn tung zong kha na luhpi lai i a cungah a meiinn kha na chiah hna lai. 5Zihmui khanghnak sui biakṭheng kha, biakamnak lungtlap hna umnak kuang hmaiah khan na chiah lai i pumhnak thlam luhnak innka ah khan puanzar kha na zar lai. 6Pumhnak thlam hmaiah khan khangh thawinak biakṭheng kha na chiah lai. 7Kut ṭawlnak hmaihum kha pumhnak thlam le biakṭheng karlak ah khan na chiah lai i a chungah ti na chiah lai. 8A kulhtu tual kulhnak puanzar kha na zar hna lai i tual luhnak kutka puanzar kha na zar hna lai.
9“Cun thuhnak chiti kha naa lak lai i Pathian umnak thlam le a chung i a ummi thil vialte kha na thuh hna lai. Cu thlam cu le a thilri vialte kha Pathian sinah na pek hna lai i cuticun thil zarh ah a cang lai. 10Cun khanghthawinak biakṭheng le a thilri vialte kha chiti na thuh hna lai. Cuticun Pathian sinah na chanh hna lai i a zarh ngaingaimi thil ah an cang lai. 11Kut ṭawlnak hmaihum le a danh zong kha chiti na thuh hna lai i Pathian sinah na pek hna lai.
12“Aaron le a fapa hna kha pumhnak thlam innka ah na ratpi hna lai i ti in na kholhter hna lai. 13Aaron kha puan thiang cu na aihter lai i chiti na thuh lai i cuticun na thianter lai i ka tlangbawi rian kha a ṭuan lai. 14A pawngah khan a fapale kha na ratpi hna lai i angki kha na aih hna lai. 15Cun an pa chiti na thuh bantuk khan chiti na thuh ve hna lai i ka tlangbawi rian kha an ṭuan lai. Chiti na thuhmi hna nih khan dong loin tlangbawi a siter hna lai,” tiah a ti.
16 Bawipa nih a fial bantuk tein zeizong vialte kha Moses nih a tuah dih. 17Cucaah Izipt ram in an chuah hnu a kum hnihnak, thla khatnak thla ni khatnak ni ah khan Pathian umnak thlam cu an dirter. 18Moses nih khan a dirter. A danh vialte kha a chiah hna, a vampang kha a dirter hna, a thingthluan kha a hrolh hna, a tung kha a dirter hna. 19Bawipa nih a fial bantuk te khan Pathian umnak thlam chungah cun thlam kha a samh i thlam cu a khuh kha a khuh. 20Cun biakamnak lungtlap kha a lak hna i kuang chungah khan a chiah hna. Kuang i thlaihmi sui kual ah khan lang kha a hrolh hna i a chin kha a chinh. 21Cun kuang cu Pathian umnak thlam chungah khan a chiah i a phentu puanzar kha a zar hna. Cuticun Bawipa nih a chimh bantuk te khan biakamnak lungtlap umnak kuang kha him tein a umter.
22Cun cabuai kha pumhnak thlam chungah khan a chiah, cucu Pathian umnak thlam chaklei kamah khan a si i puanzar lengah khan a si i 23a cungah khan Pathian hmai hunmi changreu kha a hun hna, cucu Bawipa nih a chimhningte khan a si. 24Meiinn tung kha pumhnak thlam chungah cun cabuai he hmaitonh in a chiah, cucu thlam thlanglei kamah khan a si. 25Bawipa hmaiah meiinn tung cungah cun meiinn kha a chiah hna i cucu Bawipa nih a chimhning te khan a si. 26Sui biakṭheng kha pumhnak thlam chungah khan, puanzar he hmaitonh in a chiah. 27Bawipa nih a fial bantuk khan a cungah khan a rim a thawmi zihmui kha a khangh. 28Thlam luhnak innka puanzar kha a zar hna. 29Pumhnak thlam innka ah khan khangh thawinak biakṭheng kha a chiah. Bawipa nih a chimh bantukin cu cungah cun khangh thawinak kha a thawi i ei awk thawinak kha a khangh hna. 30Thlam le biakṭheng karah cun kut ṭawlnak hmaihum kha a hun i kut ṭawlnak dingah ti kha a chungah cun a chiah. 31Moses le Aaron le Aaron fapa hna nih khan an kut le an ke kha an i ṭawl. 32Bawipa nih Moses a chimh bantuk te khan pumhnak thlam i an luh le biakṭheng lei i an kal ah, an i ṭawl lengmang. 33Thlam le biakṭheng kulhtu tual kulhnak puanzar kha a zar hna. Cuticun Moses nih rian vialte kha a lim.
Pumhnak Thlam Cung Minmei
(Nam 9.15-23)
34Pumhnak thlam cu minmei nih a huh i Bawipa sunparnak kha a chung cu a khat. #1Sia 8.10-11; Isa 6.4; Eze 43.4-5; Biat 15.8 35Pumhnak thlam cungah cun minmei kha a um i Bawipa sunparnak cu a chung kha a khah caah Moses cu a lut kho lo. 36Israel mi kha riahhmun pakhat in riahhmun pakhat ah an i ṭhial tikah Pathian umnak thlam cung i minmei kha aa ṭhial lawnglawng ah an i ṭhial tawn. 37Minmei kha aa ṭhial lo ahcun annih zong riahhmun dang ah khan an i ṭhial ve lo, minmei aa ṭhial ni tiang kha an ngan tawn. 38Pathian an sin i a um hmelchunhnak minmei cu, chun ah Pathian umnak thlam cungah khan a um i zan ah minmei chungah khan mei alh a um; cucu Israel mi nih riahhmun pakhat in pakhat ah an i thawn lengmang ah khan an hmuh zungzal.
Lai (Hakha) Common Language Bible © Bible Society of Myanmar 2006
