Titus 2
2
Ipapiget Apeghtuusat Ugpeqanun
1Iwernga elpek apeghtuusaqiki ugpeqanun ipapiget apeghtuusat. 2Apeghtughqi nuyekliit yuget nuqenneghtusqelluki, siivaknalghiinguluki, sumeghtaghayusqelluki, ayepsugitesqelluki ugpeqilleghqun, piniqilleghqun, nuqenneghtulleghqun. 3Tawateghpigaq apeghtughqi nuyekliit aghnat kiyaghtesqelluki tuunꞌngaluki Kiyaghneghmun. Seghletun akuzitkesaghqaqenghitiit ilateng, nalighmeng megheghllafqiita wine‑meng. Apeghtughiyaghqaagut pinitun kiyaghtaalleghqameng, 4enkaam peghqighlleqiit uyuqliit aghnat piniqesqelluki ugingitlu avaqutiitlu. 5Sumeghtaghaqegsaghqaagut, pelungisaghqaagut kiyaghtaalleghmeggni, qepghaqegsaghqaagut nemeggni, nangllegtaghyaghqaagut, qaatkusaghqaagut ugimeggnun. Enkaam kitum alngunak seghlequughnaanghitii Kiyaghneghem apeghtuusii.
6Tawateghpigaq qeleghqi nukalpigat nuqenneghtusqelluki. 7Elpek salleghpegun tamaghhaakun, usputaawi ellngitnun aneghneghqilleghpegun. Apeghtughiiqi ipapighqelluten, piraamsiluten. 8Wataghllak apeghtuusaqegkan elqughutngali enkaam kitum alngunak seghlequunghillinkut. Tawaten pikuvek kipullginaaghtet seghletun akuzitkennaanghitiinkut, kipullginaallghitallu kaynguyugtesleqii. 9Apeghtughqi qepghaghtelaaghet qaatkesqelluki piliitestengit, efqughtengngwaaghesqellukillu. Veghusnaghyaghqaqenghitiit, 10nalighmeng teglegviksaghqaqenghitiit. Yeghlegi quunpeng pinitun, ataasiighmelluteng piyaghqaqiit. Enkaam salleghmegteggun tamaghhaakun piyuknangllaghlleqiit apeghtuusii Kiyaghneghem Yugulighistemta.
11Tawaten kiyaghsaghqaagukut qayughllak Kiyaghneghem aliightekaqaa piniqelleni yugulillengesqelluku yuuk tamaghhaan. 12Taam piniqellghem apeghtughiinkut pegtesqelluku kiyaghtaalleq Kiyaghneghmun ayuqenghilnguq, ighsakesqelluki nunam yugan piyukellghi seghleghqengngalghiit. Apeghtughiinkutlu nuqenneghtusqelluta, elqughutngaluta, kiyaghtesqelluta Kiyaghneghem piyukellghatun nunami whani. 13Tawaten kiyaghtelta utaqiimaluta quyanalghiimeng sighimalleghmeng. Sighimalqaghput nighughqengngalghii aliilleghqaa Jesus Christ‑am Kiyaghneghllamta Yugulighistemta. 14Ellmineng tuunegkaaguq yugulinaluta tamaghhaaneng seghleghqelleghmeng. Tawaten pikaaguq qayughllak pelungighsaghyukanginkut ellminun yuguluta, sagiqluta aneghneghqisqelluta yugnun.
15Apeghtuusaqiki tamaakut ugpeqanun. Kiyaghneghem qelghusii atuqluki kayemiki, aghuliightikillu seghletun pingukata. Yeqay kitumun alngunak ukavaghtestegpenang.
© 2018, Wycliffe Bible Translators, Inc. All rights reserved.