ኀበ ሰብአ ፊልጵስዩስ 4
4
ምዕራፍ 4
በእንተ ከሢተ ስእለት በጊዜ ጸሎት
1 #
1ተሰ. 2፥19-20። ወይእዜኒ አኀዊነ ፍቁራን ፍሥሓነ ወአክሊልነ ከመዝ ቁሙ ወጽንዑ በእግዚእነ አኀዊነ። 2#2፥2። ወአስተበቍዐክሙ ኤዎድያን ወስንጣክን ከመ ተኀልዩ በተልእኮ እግዚእነ በአሐዱ ልብ። 3#ሉቃ. 10፥20። ወአስተበቍዐከ ለከሂ እኁየ ወመፃምርትየ ሰትሪካ ከመ ታርድኦሙ እስመ ሰርሑ ምስሌየ በትምህርተ ወንጌል ምስለ ቀሌምንጦስ ወኵሎሙ ቢጽነ እለ አሐዱ ግብሮሙ እለ ተጽሕፈ አስማቲሆሙ ውስተ መጽሐፈ ሕይወት። 4#3፥1፤ 2ቆሮ. 13፥11፤ ኢሳ. 61፥10። ተፈሥሑ በእግዚእነ ዘልፈ ወካዕበ እብለክሙ ተፈሥሑ። 5ወይትዐወቅ ስላጤክሙ በኀበ ኵሉ ሰብእ እግዚአብሔር ቅሩብ። 6#1ጴጥ. 5፥7፤ መዝ. 36፥5። ኢተኀልዩ ወኢምንተኒ ወባሕቱ ጸልዩ በኵሉ ጊዜ ወሰአሉ ወእንዘ ተአኵቱ ክሥቱ ስእለተክሙ ኀበ እግዚአብሔር። 7#ዮሐ. 14፥27፤ ቈላ. 3፥15፤ ሮሜ 5፥1። ወሰላመ እግዚአብሔር እንተ ኵሉ ባቲ ወትትሌዐል እምኵሉ ልብ ወእምኵሉ ኅሊና ታጽንዖ ለልብክሙ ወለኅሊናክሙ በኢየሱስ ክርስቶስ። 8ወይእዜኒ አኀዊነ ኵሎ ዘርትዕ ወዘንጽሕ ወዘጽድቅ ወዘሠናይ ወዘፍቅር ወዘምድኃር ወአስተርክቦ ዘይደሉ ወዘይትአኰት ኪያሁ ኀልዩ። 9#1ተሰ. 5፥23። ዘተመሀርክሙ ወዘሰማዕክሙ ወዘርኢክሙ በኀቤየ ኪያሁ ግበሩ ወአምላከ ሰላም የሀሉ ምስለ ኵልክሙ። 10#2ቆሮ. 11፥9። ተፈሣሕኩ በእግዚእነ ፈድፈደ እስመ ትኄልዩ ወትጽሕቁ ለትካዝየ እምቀዲሙ በከመ ትጽሕቁ ሊተ ዓዲ ወለእመ ይሰአነክሙ። 11#1ጢሞ. 6፥8። ወአኮ ዘእቤ በእንተ ዘኀጣእኩ እስመ አአምር ከመ የአክለኒ ዘብየ። 12#2ቆሮ. 6፥10፤ 11፥27። ከሃሊ አንሰ ተጽናሰሂ ወተደልዎሂ በኵሉ ውስተ ኵሉ ለመድኩ ርኂበሂ ወጸጊበሂ ሐሚመሂ ወተፈሥሖሂ። 13#2ቆሮ. 12፥10፤ ኢሳ. 40፥29-31። ኵሎ እክል በዘውእቱ አክሀለኒ ክርስቶስ። 14ወባሕቱ ሠናየ ገበርክሙ ዘተሳተፍክሙ በሕማምየ። 15ተአምሩ አንትሙ ሰብአ ፊልጵስዩስ በቀዳሚ ትምህርት አመ መጻእኩ እመቄዶንያ ከመ ኢኀብሩ ምስሌየ አሐዱሂ እምቤተ ክርስቲያን ኢበውሂብ ወኢበነሢእ ዘእንበለ ዳእሙ ባሕቲትክሙ። 16#ግብረ ሐዋ. 17፥1። ዓዲ በተሰሎንቄሂ ምዕረ ወካዕበ ፈኖክሙ ሊተ ለትካዝየ። 17#ቲቶ 3፥14። አኮ ሀብተክሙ ፈቂድየ ዘእዜከር ዘንተ ዳእሙ አኀሥሥ ከመ ይሥመር በላዕሌክሙ ፍሬ ጽድቅ። 18#2፥25፤ 2ቆሮ. 11፥9፤ ኤፌ. 5፥2፤ ዕብ. 13፥16። ወናሁ ተወከፍኩ ኵሎ ዘፈኖክሙ ኀቤየ አከለኒ ወበዘተርፈ ሰለጥኩ በዘአብጽሐ ሊተ አፍሮዲጡ ዘእምኀቤክሙ መዓዛ ሠናየ ወመሥዋዕተ ኅሩየ ወሥሙረ በኀበ እግዚአብሔር። 19#ዮሐ. 16፥23። ወአምላኪየ ይፈጽም ለክሙ ኵሎ መፍቀደክሙ በከመ ብዕለ ስብሐቲሁ ለኢየሱስ ክርስቶስ 20#ገላ. 1፥5። ወእግዚአብሔር አቡነ ዘሎቱ ስብሐት ለዓለመ ዓለም አሜን። 21#1ቆሮ. 16፥20። አምኁ ኵሎ ቅዱሳነ በኢየሱስ ክርስቶስ አምኁክሙ አኀዊነ እለ ኀቤየ። 22#2ቆሮ. 13፥12። ወይኤምኁክሙ ኵሎሙ ቅዱሳን ወፈድፋደሰ እለ እምሰብአ ቄሣር ቤተ ንጉሥ። 23ጸጋሁ ለእግዚእነ ኢየሱስ ክርስቶስ ምስለ መንፈስክሙ አሜን።
ተፈጸመት መልእክት ኀበ ሰብአ ፊልጵስዩስ ወተጽሕፈት በሮሜ ወተፈነወት ምስለ ጢሞቴዎስ ወአፍሮዲጡ።
ወስብሐት ለእግዚአብሔር አሜን።
