काम 3
3
लंगड़ा मंगता को निरोगो होबो
1पतरस अर यहून्ना दोपारा क तीन बजै मनदर म अरदास करबा ताँई जार्या हा। 2अर बठै क्युंक मिनख एक जलम का लंगड़ा मिनखनै रोजकी ल्यार मनदर क बारना म बिठा देता। अर बि बारनानै बठै का मिनख “सोवणो बारनो” खेता हा जठै बो मनदर म जाबाळाऊँ भीक माँगतो हो। 3बो जद पतरस अर यहून्नानै मनदर क मांयनै जाता देख्यो। जणा बो बाऊँ क्युं मिलबा की आस म बाकै सामै हात फिलाया। 4जणा पतरस यहून्ना क सागै बिपै गोर धर्यो अर बिऊँ बोल्यो, “म्हारै कानि देख।” 5जणा बो बाऊँ क्युं मिलबा की आस म बाकै कानि आँख्या गाड दिनी। 6जणा पतरस बिऊँ बोल्यो, “पिसो-टक्को तो मेर कनै आथ कोनी। पण जोक्यु मेर कनै ह बो म तनै जरूर देस्युँ ईसु मसी नासरी का नामऊँ खड़्यो हो अर डोला फिरी कर।” 7जणा बो बिको दाइणो बावळ्यो पकड़र बिनै खड़्यो कर्यो अर अंय्यां करताई बिका टकणा अर टांगड़ा म सत आग्यो। 8जिऊँ बो उछळर आपका पगा प खड़्यो होगो अर बाकै च्यारूमेर डोलबा-फिरबा लाग्यो। जणा पाछै बो नाचतो कुदतो अर परमेसर को गुणगान गातो बाकै सागै मनदर म गयो। 9अर बठै का सगळा मिनख बिनै डोलता-फिरता अर परमेसर को गुणगान गाता देखर 10पिछाण्गा क ओ तो बोई ह जखो मनदर का सोवणा बारना म बेठ्यो-बेठ्यो भीक माँग्या करतो हो। बिकै सागै जोक्यु होयो बिनै देखर बे सगळा ताजूब म पड़गा।
मनदर म पतरस को परचार
11अर बो पतरस अर यहून्ना को हात पकड़्या बाकै सागै हो, जणा लोग ताजूब कर बाकन भागर आया अर बि दरूजा क कनै भेळा होगा जिनै सुलेमान को दरूजो बोल्या करता हा। 12आ देखर पतरस बा मिनखाऊँ बोल्यो, “अरै इजरायल का रेह्बाळो थे सगळा क्याले ताजूब करो हो। अर म्हानै अंय्यां आँख्या पा'ड़र क्याले देखर्या हो जंय्यां म्हेई इनै म्हारी सक्ति अर भगतीऊँ निरोगो कर्या होवां? 13अब्राहम, इसाक अर याकूब को परमेसर आपणा बाप-दादा को परमेसर अंय्यां कर आपका दास ईसु की मेमा करी ह। जिनै थे अधिकार्यानै पकड़ा दिआ अर जद पीळातुस बिनै छोडबो चातो हो, पण थे बिनै तज दिओ। 14#मत्त 27:15–23; मर 15:6–14; लूक 23:13–23; यह 19:12–15बो पबितर अर धरमी हो। पण थे बिनै तज दिआ, अर एक हत्यारानै छोडबा की पीळातुसऊँ दरखास्त करी। 15अर बि जिंदगी देबाळानै मार गेर्यो पण परमेसर बिनै मोतऊँ जिंदो कर दिओ, अर इ बात का म्हें गुवा हा। 16अर ईसु हाळा नाम प बिस्वास करबाऊँई, ईसु इ मिनख म सत गेर्यो अर बो समुळो निरोगो होगो, जिनै थे सगळा जाणो अर देखो हो। 17अर यहूदि भाई-भाणो, म जाणू हूँ क थे अर थारा यहूदि नेता जोक्यु बी कर्या बो अणभोळ म कर्या हा। 18पण इ बातनै परमेसर बोळी पेल्याई परमेसर की खेबाळा क मुंडाऊँ खुवा दिओ हो, क मसी पिड़ा भोगसी जणा परमेसर बानै अंय्यांई पूरी कर्यो। 19इ ताँई थे थारा पापऊँ तौबा करो अर हियानै ईस्बर कानि लगाओ जिऊँ परमेसर थारा पाप धो देसी। 20जद थे अंय्यां करस्यो जणा परबु क होतासोता स्यांती को टेम आज्यासी अर परमेसर मसी ईसुनै भेजसी जिनै बो थारै ताँई टाळ राख्यो ह। 21मसी बि दिन ताँई ईस्बर नगरी म रेह्सी जद ताँई बे सगळी बाता पेली जंय्यां कोनी होज्यावै। जानै परमेसर आपकी खेबाळा पबितर मिनखा क मुंडाऊँ बोळी पेल्याई खुवायो ह। 22जंय्यां मूसा आपणा बडकाऊँ बोल्यो हो, ‘परबु परमेसर थारै ताँई जंय्यां मनै भेज्यो बंय्यांई एक परमेसर की खेबाळो भेजसी। जखो थारा मालोई होसी। अर बो जोक्यु थानै बोलै थे बा सगळी बातानै मानज्यो। 23अर जखो बी बिकी कोनी सुणसीक, बिनै परमेसर का मिनखा मऊँ नाकै कर नास कर दिओ ज्यासी।’ 24अर सेमुएल अर बिकै पाछै आएड़ा सगळा परमेसर की खेबाळा आ दिना क बारां मई बताया हा। 25अर थेई बा करार का वारिस हो जानै परमेसर आपका खेबाळा क जरिए कर्यो हो। ओ करार थारै ताँई ह जिनै परमेसर थारा बडकाऊँ कर्यो हो जंय्यां बो अब्राहमऊँ करार कर्यो हो क तेरी ओलादऊँ सगळी धरतीनै आसिरबाद मिलसी। 26अर परमेसर आपका दास ईसुनै टाळर बिनै सऊँ पेली थारै कनै भेज्यो। जिऊँ बो थानै थारा कुगेलाऊँ न्यारो कर आसिरबाद दे सकै।”
(c) 2010-2017, New Life Computer Institute. All rights reserved
