रोमियो 13
13
कुमत दे दीन
1अर एक मनुक्ख राज अधिकारियें दे दीन रवै, किके कोई अधिकार ऐसा नेई, जेड़ा परमेसर थमां नेई उवै; ते जेड़े अधिकार न, ओ परमेसर थमां पक्के कित्ते जंदे न। 2एसकरी जेड़ा कोई अधिकार दा वरोध करदा ऐ, ओ परमेसर दी विधि दा वरोध करदा ऐ, ते वरोध करने आले परमेसर थमां सजा पागन। 3किके कुमत करने आले अच्छे कम आसतै नेई, लेकन बुरे कम आसतै डर दा कारन न; आखर; जेकर तू कुमत करने आलें छा निडर रौना चानां ऐ, तां ठीक कम कर, ते ओदे थमां तेरी सेफ्त्त ओग; 4किके ओ तेरी पलाई आसतै परमेसर दा सेवक ऐ। लेकन जेकर तू बराई करें, तां डर, किके ओ तलवार व्यर्थ लेई नेई; ते परमेसर दा सेवक ऐ; के ओदे गुस्सा दे मताबक बुरा कम करने आले गी सजा दे। 5एसकरी दीन रौना न सेर्फ ओस सजा कन्ने डर कन्ने जरुरी ऐ, ते अन्तर आत्मा बी इयै गवाही दिन्दा ऐ। 6एसकरी चुंगी बी दियो, किके कुमत करने आले परमेसर दे सेवक न, ते मेशा इसै कम च लगे दे रौंदे न। 7एसकरी जिसी जेड़ा आक्क देना ऐ उसी दियो; जिसी कर देना चाईदा ऐ उसी कर दियो, जिसी चुंगी चाईदी ऐ, उसी चुंगी दियो; जेस छा डरना चाईदा, ओदे थमां डरो; जेसदा आदर करना चाईदा, ओसदा आदर करो।
पड़ोसी कन्ने प्रेम
8अप्पुं बिचें प्यार गी छुड़ीयै ते कुसे गल्ल च कुसे दे कर्जदार नेई उवो; किके जेड़ा दुए कन्ने प्यार रखदा ऐ, उवै कनून पूरा कित्ता ऐ। 9किके मूसा दे उक्म च ए ऐ के, “व्यभिचारी नेई करना, अत्या नेई करनी, चोरी नेई करनी, लालच नेई करना,” ते इनेंगी छूडीयै ओर कोई बी उक्म उवै तां सारें दा नचोड़ एस गल्ल च पाया जन्दा ऐ, “अपने गबांडी कन्ने अपने आला लेखा प्यार रख।” 10प्यार गबांडी दी केछ बराई नेई करदा, तां करी प्यार रखना कनून गी पूरा करना ऐ।
मसीह गी उच्चा करना
11ते बेलै गी पंछानियै ऐसा गै करो, एस लेई के ऊन थुआड़े लेई निंदर चा जागने दी घड़ी आई पूज्जी दी ऐ; किके जेस बेलै असैं विश्वास कित्ता हा, ओस बेलै दे वचार कन्ने ऊन साड़ा उद्धार कोल ऐ। 12रात बड़ी ओई गेई ऐ, ते देन निकलने आला ऐ; एसकरी अस न्हेरे दे कम्में गी त्यागीयै लोई दे थयार बनी लेचै। 13जियां देन गी शोभा दिन्दा ऐ, इयां गै सीधी चाल चलने, नां के लीला-क्रीड़ा ते पियक्कड़पन कन्ने, नां व्यभिचारी ते लुचपन कन्ने, ते नां चगड़े ते डाह कन्ने। 14ते प्रभु यीशु मसीह गी तारण करी लियो, ते जिंदु दी इच्छ्यें गी पूरा करने दी कोष्ट नेई करो।
This work is licensed under Creative Commons Attribution-ShareAlike 4.0 License.
