BOISIONIKAB CHE KIYOKTOI 17
17
Komi Tesalonike
1Ak kingo kagobun Ampipoli ak Apolonia, koit Tesalonike, ole kimi sunagogitab Yahudik: 2ak kiwa Paulo ole mi ichek, ko u ye kicham koyaei, ak kong’alal koboto bichoto eng’ sabatosiek somok eng’ sirutik, 3kong’ang’jin ak koborjin komie kole kiga nyolji Kristo konyalil, ak kong’eet kogeny eng’ che kibek; ak kole Jesu nito aamwok, ko Kristo. 4Kiiyan anyun alage eng’ ichek, ak konamgei ak Paulo ak Sila; ak tuiyet ne o ne bo Yunanik che kigonyiti Jehovah, ak che chang’ eng’ kobogorisiek che toogunotin.
5Ago ye kingoam ng’etkonda Yahudik, konamgei ak bik che yaachen che matilei kiy, ak kiiyum tuiyet, ak kong’eet ichek bolatet eng’ nganaset; ak kibut gotab Jason, komachei kole komut ichek sang’ koba ole mi bik. 6Ak ye kimata konyor, kochuut Jason ak tupchosiek alak koba taitab kiruogikab nganaset, koboldos, kolen, Kagobwa oli kogeny bichu kogowal ng’ony; 7bik che kagotaach Jason: ak yaei bichuto tugul, tuguk che etei ng’atutikab Kaisari, komwaei kolen mitei laitoriat age, ne inendet ko Jesu. 8Ak ye kingogas tuguchuto, koiim tuiyet ak kiruogikab nganaset. 9Ak kingo kagoname Jason ak bik alak, tuguk, kounda koba.
Komi Berea
10Ak ne matianit koyokto tupchosiek Paulo ak Sila kemoi koba Berea: ak kingoit oloto, koba sunagogitab Yahudik. 11Ak ki miachen bichu kosiir choto bo Tesalonike, amu kitaach ng’olyot ak kocham mising’, kosiachi sirutik betut age tugul, si kobiit konai ngo iman tuguchu. 12Kiiyan anyun che chang’ eng’ icheget; ak kobogorisiek che bo Yunanik che toogunotin, ak murenik che chang’.
13Ago kingonai Yahudik che bo Tesalonike kole, amdoi Paulo ng’olyotab Jehovah eng’ Berea agine, koba oloto agine, ak kowas ak konyalil tuiyosiek. 14Koyokto anyun ngunoto tupchosiek Paulo kot koit nyanjet: ak kita kotebi eng’ oloto Sila ak Timoteo. 15Ago icheget che kiimuti Paulo ko kiimut agoi Atene: ak kingotaach ng’atutiet koipchi Sila ak Timoteo kole koba ole mi inendet kochok, koba anyun.
Komi Atene
16Ak kingota kogeni Paulo ichek eng’ Atene, koiimak tamirmiriennyi eng’ orinnyi, ye kingogeer nganaset ko nyiitat kanamonik. 17Kong’alal anyun eng’ sunagogit koboto Yahudik ak bik che konyiti Jehovah, ak eng’ oldab aldaisiet eng’ betut age tugul koboto che kituitos ak inendet. 18Ak kituiyo koboto inendet alak che bo ng’omotikab Epikurio ak Stoiko. Ak kole alak, Mwaei nee kipchang’alaini? Kole alak, U kabartaindet ne bo cheptalelisiek che ter: amu kiamdoi Jesu ak ng’eetyet. 19Ak konam inendet, ak komut kwo Areopago, kole, Tos kimuchi kenai kele nee konetisioni leel, imwae? 20Amu keipchi itikyok tuguk alak che leelach: noto anyun kimache kenai kit ne iboru tuguchuto. 21(Ak kima kotinyei bik tugul che bo Atene, ak toek che kimi oloto, boroindo ne bo kiy age kobate komwa anan kogas ng’al che too.)
22Ak kitonon Paulo eng’ kwenutab Areopago, ak kole, Okwek bikab Atene, kaageer ale eng’ tuguk tugul ogiilige mising’ eng’ sautik. 23Amu ye kiasiirtoi, ak ageer tuguk che osae, anyoru agine kapkorosut ne tinyei sirutichu, BO CHEPTALELIT NE MANAEI CHI. Noto anyun ne osae amongen, aboruok anyun nito. 24Mamenyei hekalusiek che kigiyae eunek Jehovah ne kiyai ng’ony ak tuguk tugul che mitei oloto, amu inendet ko Kiptaiyatab kipsengwet ak ng’ony. 25Ama kiboisiechin eng’ eunekab bik, ko u ne banani kiy, amu inendet ne igochin tugul sobondo, ak kabuset, ak tuguk tugul; 26ak kiyai eng’ chito agenge bororiet age tugul ne bo bik si komeny ng’ony komugul, ko kagoborji kenyisiek che kiging’at, ak kiwotosiekab meng’otenywa; 27si kobiit kocheng’ Jehovah, komang’u kole tamangab kotamdamat, ak konyor inendet, nganda ma loo eng’ age tugul eng’ achek: 28amu kisoptosi eng’ inendet, ak kebendoti, ak kemi; ko u ye kigomwa alage eng’ sirikwok che bo ng’alek che kergei ak tienwogikab kalosunet, kole, Amu ki lagokyik ak achek. 29Ngo ki lagokab Jehovah anyun, ko manyoljech kibwat kele kergei Jehovah ak tahabu, anan feda, anan koita, che kigiyai eng’ musoknatet ak eng’ ng’omnatetab bik. 30Kima mage kiy anyun Jehovah betusiek che kima komi naet; ago kang’at nguno kole kosik bik tugul eng’ komosta age tugul: 31amu kigochob betut, ne tun iruokyine ng’ony eng’ imanda eng’ chichoto kigonde; ak kigoborji komie bik tugul agobo noto, amu kiing’eet inendet komong’ eng’ che kibek.
32Ye kingogas anyun agobo ng’eetyetab che kibek, kochombil alage; ago kile alak, Ta kegasun nito betut age. 33Kimanda anyun Paulo eng’ kwenunywa. 34Ago kinamgei bik alak ak inendet, ak koyan; ki age eng’ icheget Dionusio Areopagindet, ak kobogoriot ne kiguure Damaris, ak alak che kimi koboto icheget.
God's word open for all
©Bible Society of Kenya, 2020
