ROMA 4
4
Abraham Bera Ganya Dib Senenaʾ Adyok Perobaʾ Nenewok Yuba
1Wera anasa, nunjaʾ neyung yabo sikjaʾ neyung Abraham be hyak youmaʾ ulumoknya bemba dara, hek henemab do? 2Abraham bera alja perobnya unulumokaʾ amba leboka perob nenemso dara, alda ban damok enesa leboka, nimek ak dara, or hamaʾ dakdo merewanasobok, Imik Neyung saramek ak ara, unuwanggunumso. 3#Kej. 15:6; Gal. 3:6Anasa Imik Neyung yuba momnya dobokaʾ ara, hek alamla do? ”Abraham bera Imik Neyung ak dib nong senewok dara, ban unu bobok ganya enesa leboka, Imik Neyung ara alak perobaʾ nenewok,” wenyalamla.
4Nimi be hnon wa arawoka welemla dara, alda wa webnaʾ amba deknaʾ ara, or salyaʾ perob aboka eleknenggulumak, bok aljinya dangamlaʾ anasa senewoka, sunuwoka eleklemak. 5Bok nimi be hnon, perobaʾ nenebdonun senewoka wa wenaʾ orok bok, alda nimi wonaʾ dangamek nang perobaʾ geblesilnya bek, aldib senelamla dara, benera alja ganya dib senenaʾ era, perobaʾ nenenaʾ ak geblamla. 6Dara, nim Imik Neyung adya alja unulamnaʾ amba gom, alda ganya dib senenaʾ amba perobaʾ nenelesil nang era, pe ulumakaʾ ara, neik so Daud bera an nenesemba lebokaʾ ara,
7 #
Mzm. 32:1-2
”Nimi sikja blekdo balamakaʾ anyek meewoka, sikja yok-yok malya unaʾ siklildilisil nang era, pe ulumak.
8Nimi hnon alja malya unaʾ era, Imik Neyung adya alak, malya ululam aboka yana lelenggululanya bera, pe ulumla,”
wenhyok.
9Ban pe ulumak wenhyoknya nera, bolaʾ seleb garaweisik nang emba ok lebok gom, onoʾ bolaʾ garanggulusak nang eneba, hnon siksamba lebok gom? Dara, nunda seleb wenyabmabaʾ ara, Abraham bera ganya dib senemokaʾ nong adyok perobaʾ nenewok. 10Nera har sam ak ban nera perobaʾ gebok do? Alda anam bolaʾ garawanggumek bok gom, seleb danyek gom? Seleb garawek danyek unuwanggubuk, bok men anam danyek perob senewoka perobaʾ nenewok. 11#Kej. 17:10Dara, alda anam bolaʾ garawanggumek bok, alja ganya dib senenaʾ adya alak perobaʾ nenemokaʾ ara, seleb ulumokaʾ anasa, ban bolaʾ garanaʾ ara, beknaʾ dibaʾ momnya donaʾ ak dib denenaʾ anasoʾ ak ara, dobok. Wera anasa, alda nimi nidyaʾ bolaʾ garasinaʾ orok dib senelemak nang edya sikjaʾ neyung be dok, anedya ban perobaʾ nenesinaʾ ara sikbabya dobnok aboka unuwok. 12Anya, hnonda nimi bolaʾ gararob nang, nunjaʾ neyung youmaʾanya Abraham, alda anam bolaʾ garawanggom danyek mouruwoka, alja dib senemok ganya soʾ enyek, dililda doboka dib senelemak nang emba hnon, sikjaʾ neyung be dok.
Abraham Bera Dib Senelemak Nang Nidyaʾ Sikja Neyung Ulusil
13 #
Kej. 17:4-6, 22:17-18; Gal. 3:29 Anasa Abraham beb al nang yilaʾ ak, ban soko en aljaʾ danamla amokaʾ ara, unuwanalum an yub amba leboka lebnenggusuk. Bok alda ganya dib senemokaʾ nong anasa leboka, perobaʾ nenewoka pik enyek anyeb uboka, ban mok soko amba lebsuk yub era, domok. 14#Gal. 3:18Dara nimi sik ban Yahudi nim emba unuwanalum an yub pik ek ab uboka, ganya welemak nang era, Imik Neyung adya unuwanesin hyok yuba hnon dolomak dara, wera ganya aldib senenaʾ ara, salyaʾ hwam dangalamlakanya, ban wenyhusuk yub era dib danganggulumla. 15Wera nimek wema dabnaʾ ara, oruksin yub edya lanaldilimla. Bok, hanyegarek unuwanalum an yuba unggulumlaʾ ak ara, wera anyeganera, meknenaʾ anaba unggulumla.
16 #
Gal. 3:7
Wera anasa, unuwanesin aboka lebokaʾ damok ara, ban ganya aldib senenaʾ anyek sunuwoka unuwok. Anedya, ban unuwok ganya era, wanaʾ uboka eleksinaʾ anyek laga dangalalul aboka ubok. Anedya ban Imik Neyung adya unuwanalum an yub era, sik Yahudi nim ok gom, alda sik nim Abraham bedya dib senemok ganya enyek sunuwoka unulumak nang anaba, sikda nidyaʾ ara, unuwanesin aboka lebokaʾ dobnok aboka unuwok. Wera, anera Abraham bera nunda nidyaʾ hiboka amba, nunjaʾ neyung be ulusil. 17#Kej. 17:5Nera an momnya dobokaʾ ak ulumla sok, ”Nadya anda an nang yilaʾ yok-yok mok soko ulumeija ara, nunjaʾ neyung alamnenjak.” Wera ban Abraham bera, Imik Neyung ak dib senemok. Dara, Imik Neyung adya ganya era, nuk ara, sikja neyung bera an senelamla. Wera ban Imik Neyung era, somogamna nang embengaʾ nenelesilnya, anya alja yub adyok unggulumlaʾ ara ulumlaʾ nenelelanya.
18 #
Kej. 15:5
Dara Abraham bera ganya gologoka dib senewanamsoʾ damok ara orok bok, Imik Neyung adya alak, ”An nang yilaʾ ara hyak gong danamak,” wenyamok yub enyek ganya dib beiliwoka aldib senemok. Anedya alda yok-yok mok soko nimi gong amba, sikja neyung be dok. 19#Kej. 17:17Dara, al ulumok salek era gibnaʾ ara denga dombadya berem lemokaʾ anasa, nong migib unaʾ ak sam ara, hmeng dangoka, alaʾ gel Sara gera me wolaʾ lebemokaʾ ara, nenera alda ella ulumok, bok alja ganya aldib senenaʾ ara, hmeng danggumok. 20Dara Imik Neyung adya an wenyamok yub ek sam ara, alda sondaʾ senen ganya ara, bo enggulumok, bok alda aldib senen ganya ek migibaʾ geboka Imik Neyung si imik nenelemok. 21Imik Neyung si imik nenewoka, hyak aldib senelemokaʾ ara, Imik Neyung ara alja or hekaʾ ok unuwanamna amnaʾ ara, al migib adya gigiwoka unululanya senelemok.
22Wera anasa leboka, perobaʾ nenenaʾ ara, alak gebok. 23Anasa ban ”perobaʾ nenenaʾ ara, alak gebok,” wenhyoknya nera, Abraham bemba ok leboka momnya dobnenggubuk. 24Bok numbabya, nunjaʾ Wenelesilnya Yesus ara somoknaʾ nang gangganek ab subuka bukiyiwoknya alak aldib senelemab anasa, wera nuk anaba Imik Neyung ara perobaʾ geblesil. Anasa ban yub era nusamba hnon momnya dobok. 25#Yes. 53:4-5Dara, Yesus ara nunja meknenaʾ enesa leboka, doboka elegok bok, nuk perob nenewosununaʾ aboka embengaʾ subuka bukiyiwok.
@ LAI 2000
