ROMA 4
4
Ibrahim eded̄u conto
1Nggara ndedesi, auku d̄i loa nggahi b̄a ndaita mab̄oha Ibrahim, wa'i ra waro bangsa ndaita? B̄uneku salama morina? 2Nggara lampa rawi-lampa rawi rakarawina makandad̄ina Ruma Hatalla tarimana sia kai dou makasana wea ade Ruma Hatalla, ndad̄i wara rau alasana d̄iru'u sia d̄i kabangga-banggakai wekina. Pala sia wati loana bangga d̄i tando Ruma Hatalla. 3#Kej. 15:6, Gal. 3:6 Ade Alkitab ratunti, ”Ibrahim na'imbi d̄i Ruma Hatalla, ro b̄ara imbina ake sia kambora b̄a Ruma Hatalla dosa-dosana ro makatantuna sia wati wara ncarana ro patu d̄imalu'u d̄i saroga.” 4Dou ma karawi, natarima gaji; ro gajina ede wati d̄i wi'ikaina au rambei, b̄ara ede hakna. 5Pala wara dou ma wati wi'i weki d̄i usaha ndaina; sia nawi'iku wekina d̄i Ruma Hatalla ma katadana dou madosa wati b̄oha b̄a hukuma. Kai dasa imbina edeku Ruma Hatalla tarimana dou ede b̄a one imbina makandad̄ina sia mancihi ro maraso. 6Ndede rauku nggahi b̄a la Daud; b̄ara ndedena sia nanggahiku salama taho ra ntai d̄iru'u b̄a dou madosa, mawati patu d̄i kasikai ade, rantada b̄a Ruma Hatalla watid̄u sampu ra nggele walina,
7 #
Mzm. 32:1-2
”Taho ra ntika dou ma ncara ra kancaruna d̄i kangampu wea
ro dosa-dosana d̄i kangampu wea b̄a Ruma Hatalla!
8Taho ra ntikara dou b̄ara dosa-dosana watira tuntu b̄a Ruma!”
9Sab̄ua renta taho ra ntika ake cuma d̄iru'u b̄a dou-dou ma b̄atu atora suna mpoampa? Atao d̄iru'u rau b̄a dou-dou ma wati b̄atu atora suna? Wa'ura nggahi b̄a nami sawatipu b̄a ede, b̄a one Ibrahim kancihi ro karaso b̄a Ruma Hatalla b̄ara imbina. 10B̄une aiku Ruma Hatalla katadana lampa rawi ede? Sawatipu atao sawa'u b̄a suna Ibrahim? Poda sawatipu b̄a suna sia, laina sawa'u b̄a suna. 11#Kej. 17:10 Sia rasuna kento, ro sunana ede cuma d̄iru'u tanda b̄a one Ruma Hatalla wa'ura tarima ro katantuna dou ede wati wara ncarana. Ruma Hatalla wa'ura tarimana sia ro katadana sia wati wara ncarana sawatipu atora suna ede. Kai ndedena Ibrahim eded̄u ama d̄iru'u b̄a dou-dou ma'imbi ro d̄i kasalama kai wati to'ana d̄i Hukum Taurat. 12Ibrahim rau eded̄u ama d̄iru'u b̄a dou-dou ma b̄atu atora suna. Sia ama b̄a siad̄oho laina b̄ara b̄atu b̄a siad̄oho atora suna, pala b̄ara siad̄oho mori kai imbina d̄i Ruma Hatalla, sama b̄une Ibrahim aipu wakatu sia watipu b̄atuna atora suna.
Rasake Ruma Hatalla d̄itarima b̄ara imbi d̄i Ruma Hatalla
13 #
Kej. 17:4-6, 22:17-18, Gal. 3:29 Ruma Hatalla sakena d̄i Ibrahim ro londo ra maina b̄a one dunia ake d̄imandad̄i ntau Ibrahim. Sake ndedekai Ruma Hatalla laina b̄ara to'a Ibrahim d̄i hukum Taurat, pala b̄ara sia imbina d̄i Ruma Hatalla ndad̄ina sia tarima b̄a Ruma Hatalla kai dou ma kasana wea ade-Na. 14#Gal. 3:18 B̄ara nggara cuma dou-dou ma to'a d̄i hukum-hukum Taurat mpoampa d̄imatarima au rasake b̄a Ruma Hatalla, ndad̄i imbita d̄i Ruma Hatalla wati wara onena sama sakali, ro rasake Ruma Hatalla nampoampa. 15Hukum Taurat makamaikaina hukuma Ruma Hatalla. Pala nggara watisi wara hukum, ndad̄i wati wara lampa rawi rasapa rau.
16 #
Gal. 3:7
Ndad̄i rasake Ruma Hatalla ede kai dasa imbina dou d̄i Ruma Hatalla. Ede ndad̄i d̄i nenti d̄iru'u b̄a samenana londo ro mai Ibrahim b̄a one rasake ede mbei d̄iru'u siad̄oho kai mbei mpoa b̄a Ruma Hatalla; laina d̄iru'u b̄a siad̄oho ma to'a d̄i hukum Taurat mpoa, pala d̄iru'u siad̄oho rau ma imbi d̄i Ruma Hatalla sama b̄une Ibrahim ma'imbi d̄i Ruma Hatalla: B̄ara Ibrahim eded̄u ama ndai sara'ata. 17#Kej. 17:5 B̄ara Ruma Hatalla nggahi ndakena d̄i Ibrahim, ”Nahu wa'ura kandad̄iku nggomi ama d̄iru'u b̄a mboto bangsa.” Ndedeku Ruma Hatalla mbeina sake ede d̄i Ibrahim. Ro Ibrahim na'imbi d̄i Sia. Siaku Ruma Hatalla ma kamori dou mamade; Sia rauku Ruma Hatalla kone b̄a nggahi mpoana nakandad̄iku au ma wati parana wara nandad̄i wara. 18#Kej. 15:5 Ibrahim napamao ncau-ncauku ro na'imbi kone wati wara d̄i ne'e walina. B̄ara ndedena sia ndad̄ikaina ama mboto bangsa. B̄une ratunti ade Alkitab, ”Londo ra maimu d̄imandad̄i mboto poda.” 19#Kej. 17:17 Pala Ibrahim aipu ede nab̄adeku b̄a one sia watid̄u loana ntau londo ra mai, b̄ara sarumbuna nawa'ura ipi tua ro umuna nawa'ura d̄eni saratu mba'a; la Sara rau, weina ede, nambonggi. Pala imbi Ibrahim wati kurana. 20Sia ngge'empa imbina ro wati mbali mbua adena d̄i au rasake Ruma Hatalla. Mala imbina ede nanaha kandad̄iku sia naha tenggo, ndad̄ina sia roi ra wadina Ruma Hatalla. 21Sia na'imbi poda b̄a one Ruma Hatalla naloaku karawi au rasake-Na. 22B̄ara imbina Ruma Hatalla makatantuna b̄a one sia raso ro patu d̄imalu'u d̄i saroga. 23Nggahi ra eli ”d̄itarima kai dou ma kasana wea ade Ruma Hatalla” ratunti laina d̄iru'u ndai Ibrahim mpoa, 24pala d̄iru'u ndai rauta. Ndai rauta d̄i tarimana kai dou ma wa'ura kasana wea ade Ruma Hatalla, b̄ara ndaita imbi d̄i Ruma Hatalla ma rakamori mbali Isa, Ruma ndaita rad̄i madena. 25#Yes. 53:4-5 Ruma Isa madena b̄ara dosa ndaita ro Sia mori mbalina d̄i kancihikaina ndaita d̄i tando Ruma Hatalla.
@LAI 2001