KISAH RASU-RASU 2
2
Maina Roh Allah
1 #
Im. 23:15-21, Ul. 16:9-11 Wakatu rakara ainaina Pentakosta, sara'a dou ma'imbi kab̄oro weki d̄i sab̄ua hid̄i. 2Wed̄i lalompa wara ringa eli rad̄i langi b̄une eli angi na'e. Uma hid̄i dohokai b̄a doud̄oho ede sara'ana b̄ini b̄a eli ede. 3Edempara siad̄oho edana rera-rera b̄une kalea afi marama rero ro ntu'una d̄icua-cua siad̄oho ta ede. 4Siad̄oho sara'ana kuasakai b̄a Roh Allah, ro tampu'una nuntu ra nggahi menana kai mboto pahu bahasa makalaina. Siad̄oho nuntu ra nggahina b̄une au rambei b̄a Roh ede d̄i siad̄oho b̄a d̄i rentana.
5Aipu wakatu ede mboto dou Yahudi, rad̄i mboto dana ra rasa d̄i sara'a dunia, mangge'e d̄i Yerusalem. Siad̄oho eded̄u dou-dou ma to'a d̄i Ruma Hatalla. 6Wakatu ringa eli ede, mboto poda dou mamai kanggudu weki. Siad̄oho sara'ana wed̄i ringana dou-dou ma'imbi ede nuntu ro nggahi kai cua-cua bahasa ndaina. 7Kai mbora akana ro midi adena nggahi siad̄oho, ”Dou-dou ma nuntu ra nggahi ake sara'ana dou-dou Galilea. 8B̄uneku loana ndad̄i ringa b̄a ndai siad̄oho nuntu ra nggahina d̄i ade bahasa cua-cua dana ra rasa ndaina? 9Ndai dou-dou Partia, Media, Elam, rad̄i Mesopotamia, Yudea ro Kapadokia, rad̄i Pontus ro Asia, 10rad̄i Frigia ro Pamfilia, rad̄i Mesir ro rad̄i dana ra rasa Libia d̄eni lab̄o Kirene, wara d̄i weki ndai ma ramai rad̄i Roma, 11wara dou-dou Yahudi ro wara rau dou-dou bangsa makalai ma wa'ura lu'u agama Yahudi, wara rauja ma ramai rad̄i Kreta ro Arab. Ndai sara'ana ringa siad̄oho manuntu ra nggahi kai cua-cua bahasa ndaina mab̄oha lampa rawi ma b̄isa ra guna rakarawi b̄a Ruma Hatalla! 12Kai mbora aka ro midi adena siad̄oho sara'ana sod̄i d̄i sab̄ua lab̄o masab̄uana, ”Auku aona ake?”
13Pala wara rauja dou-dou ma sungge-sungge. Nggahi siad̄oho, ”Doud̄oho ede namawumpa!”
Padato la Petrus
14Edempara la Petrus kid̄i lab̄ona sampuru sab̄ua rasu ma kalai, edempara nggahina d̄i dou mamboto ede. Kai elina ma na'e nggahi sia, ”Cina ra angi, dou-dou Yahudi ro sara'a ma ngge'e d̄i Yerusalem! Ringa kab̄aepu b̄ara lampa rawi ake pab̄uaku d̄ingoa kab̄ae b̄a nahu d̄i nggomid̄oho. 15Doud̄oho ake wati mawuna, b̄une rakacai b̄a nggomid̄oho, b̄ara ake ampode b̄oe ciwi aimasid̄i. 16Pala ake wa'ura ngoa b̄a Ruma Hatalla kai ncai Nabi Yoel:
17 #
Yl. 2:28-32
Nggahi Ruma Hatalla, ’D̄icumpukai jamana
Nahu d̄imaluana Roh Nahu d̄isara'ana dou.
Ana-anamu ma monena ro ana-anamu ma siwena d̄imangoana d̄i nggomi lampa rawi-lampa rawi rangoa b̄a Nahu d̄i siad̄oho.
Dou-dou sampelamu d̄ima'edana au-au rakatada b̄a Nahu d̄i siad̄oho.
Dou-dou matuamu d̄imanifi mab̄oha nifi rambei b̄a Nahu d̄i siad̄oho.
18D̄iru'u b̄a anad̄oho-Ku – nataho mamone atao masiwena –,
d̄i lua b̄a Nahu kai Roh-Ku d̄i ainaina-ainaina ede.
Siad̄oho d̄imangoana lampa rawi-lampa rawi rangoa b̄a Nahu d̄i siad̄oho.
19Nahu d̄imakarawina rawi mab̄isa ra guna ta ese langi,
ro lampa rawi-lampa rawi maheba poda ta awa ake d̄i dunia;
d̄imawara ra'a ro afi, sunga ro ob̄u.
20Liro d̄imandad̄i rindi,
wura d̄imandad̄i kala b̄une ra'a
sawatipu Ainaina Ruma, ainaina ma na'e ro mad̄ese ra ntasa ede maina.
21Wunga wakatu ede dou ma raho d̄i Ruma
d̄ikasalama.’
22Cina ra angi dou-dou Israel! Ringa ra kade'epu au ranggahi b̄a nahu ake: Ruma Isa dou Nazaret ede wa'ura mbei taki ra puta b̄a Ruma Hatalla d̄iru'u b̄a nggomid̄oho. Ede tada poda d̄i rawi mab̄isa ra guna ro lampa rawi-lampa rawi ma heba poda rakarawi b̄a Ruma Hatalla d̄iwoha nggomid̄oho kai ncai Ruma Isa ede. Sara'ana ede ndai nggomid̄oho wa'ura b̄ademu. 23#Mat. 27:35, Mrk. 15:24, Luk. 23:33, Yah. 19:18 B̄unera nia ndai-Na, Ruma Hatalla makane'ena Ruma Isa d̄i d̄onggo mbei d̄iru'u b̄a nggomid̄oho. Ro wakatu Sia d̄i d̄onggo mbei, nggomid̄oho mahadena Sia kai co'omu dou-dou madab̄ae masalibna Sia. 24#Mat. 28:5-6, Mrk. 16:6, Luk. 24:5 Pala Ruma Hatalla makamori mbalina Sia rad̄i woha dou-dou mamade. Sia wa'ura nono ao b̄a made, pala Ruma Hatalla mahori-Na, b̄ara wati lu'ukai b̄a aka Sia d̄ikuasa ntuwu b̄a made. 25#Mzm. 16:8-11 Mab̄oha Ruma Isa ake la Daud wa'ura nggahina,
’Nahu eda ncauku Ruma d̄i tandoku;
Sia malab̄ona nahu, loakud̄u nahu wati loa d̄ikaruku b̄a au-au rau.
26B̄ara ndedena neo poda adeku,
asaku marenta roi ra wadi:
ro sarumbuku ake d̄imangena kai
sana d̄i ade rade.
27B̄ara Ita wati co'omu sarumbu ro nawaku wi'i d̄i ade dunia dou mamade.
Ita wati co'omu ada Ita ma to'a ede leli ro cumpuna.
28Ita wa'ura turu teimu d̄i mada ncai d̄i laokai aka mori masapodakaina.
Neo poda adeku b̄ara Ita wara samamu lab̄o mada.’
29Cina ra angi, takau to'ipu nahu manuntu ra nggahi ntiri mab̄oha la Daud, ama londo ra mai ndai ede. Sia wa'ura made ro wa'ura umbu rau. Radena mbuipu warana d̄iwoha ndaita sa'ake. 30#Mzm. 132:11, 2Sam. 7:12-13 Ruma Hatalla wa'ura sakena d̄i la Daud, kai sumpana b̄a one sab̄ua dou d̄i ade londo ra maina d̄ihanta b̄a Ruma Hatalla d̄imandad̄i sangaji. B̄ara la Daud nab̄adeku d̄irasake ede ro b̄a one sia sab̄ua dou nabi rau, 31sia nab̄ade rauku au ma d̄ikarawi b̄a Ruma Hatalla. Ndad̄i sia wa'uara karonggana ranggahi Ruma Hatalla b̄a one Sangaji Mambei salama rasake b̄a Ruma Hatalla, d̄imamori mbali rad̄i madena. Nggahi la Daud,
’Sia wati d̄i co'o wi'i d̄i ade dunia dou-dou mamade;
sarumbu-Na wati d̄imandad̄i leli ro cumpuna.’
32Ruma Isa akeku rakamori mbali rad̄i madena b̄a Ruma Hatalla. Nami sara'ana wa'ura eda b̄a ndaimu lampa rawi ede. 33Sia d̄i hanta aka hid̄i ma ese ro rambei kuasa b̄a Ruma Hatalla, edempara tarimana Roh Allah rasake b̄a Ama. Ro ringa b̄a nggomid̄oho wakatu ake ro edamu eded̄u Roh ede rambei b̄a Sia d̄i nami. 34#Mzm. 110:1 Ndai la Daud wati ne'ena ese saroga, pala nggahi la Daud,
’Ruma Hatalla manggahi d̄i Ruma-ku:
35Dohopu d̄i sab̄ae wana Nahu,
sampe Nahu mandawi musu-musu-Mu oko d̄i Nggomi!’
36B̄ara ndedena sara'a dou Israel pab̄uaku b̄ade poda-podana b̄a one Ruma Isa rasalib b̄a nggomid̄oho ede, Ruma Isa ede rauku ma wa'ura kandad̄i b̄a Ruma Hatalla ndad̄i Ruma ro Sangaji Mambei salama!”
37Wakatu ringa b̄a dou-dou ede lampa rawi ede, nawancuku darura adena siad̄oho. Edempara siad̄oho sod̄ina d̄i la Petrus ro rasu-rasu ma kalaina, ”Cina ra angi, auku d̄i pab̄ua karawi b̄a nami?”
38Cambe b̄a la Petrus, ”Tobara rad̄i dosa-dosamu. Ro pab̄uapu sanikina nggomid̄oho d̄ikandeu karaso kai ngara Ruma Isa Al Masih, loakud̄u dosa-dosamu d̄ikangampu wea. Edempara nggomid̄oho d̄imatarima hadia Roh Allah rad̄i Ruma Hatalla. 39B̄ara rasake b̄a Ruma Hatalla ede eded̄u d̄iru'u b̄a nggomid̄oho ro londo ra maimu ro d̄iru'u b̄a dou-dou ma wara d̄ihid̄i-hid̄i ma d̄o'o – eded̄u sara'ana dou ra'ou b̄a Ruma Hatalla Ruma ndaita d̄imamai raka Sia.”
40Ndedeku la Petrus ngoa ra tei kab̄aena d̄i siad̄oho. Ro kai mboto nggahi ma kalai rau sia kauna siad̄oho loakud̄u siad̄oho horina weki rad̄i bangsa ma dab̄ae ake ma d̄ihukum b̄a Ruma Hatalla. 41Mboto dou ma'imbi d̄i au ranggahi la Petrus, edempara siad̄oho d̄ikandeu karaso. Ndad̄i jumula dou ma'imbi wakatu ainaina ede nanaha mboto wali kai tolu riwu dou. 42Kai kapoda ade siad̄oho tana'o ntuwuna d̄i rasu-rasu ro kab̄oro sama-sama ncau weki. Siad̄oho ngaha sama-samana ro do'a sama-sama rau.
Cara mori ra woko dou-dou ma'imbi
43Mboto poda lampa rawi mab̄isa ra guna rakarawi b̄a rasu-rasu ede ndad̄ina sara'a dou midi adena ro dahu. 44#Kis. 4:32-35 Dou-dou ma'imbi ede sara'ana kasab̄ua weki ncau ro au rantau siad̄oho, siad̄oho kani sama-samana. 45Siad̄oho landana ntau ra warana, edempara cengga-cenggana piti d̄i ade weki siad̄oho sara'ana b̄unera paralu cua-cua siad̄oho. 46Saniki ainaina siad̄oho kab̄oro ncau weki d̄i Bait Allah; ro ngaha ra nono sama-sama, kai neo adena ro kab̄awa weki d̄i uma-uma ndaid̄ohona. 47Siad̄oho roi ra wadi ncauna Ruma Hatalla ro naca'uku b̄a sara'ana dou. Saniki ainaina weki siad̄oho nanaha ore b̄ara Ruma mambeina d̄i siad̄oho dou-dou ma wunga d̄ikasalama.
@LAI 2001