Ekesote 35
35
Fakamanatu o le sapato
1Na fakatasii loa e Moisese le kakai katoa o fanau a Iselaele, o pati kia latou : Ko nei a nea ala e fakatotonu e le Eteleno : 2E gaoi loa i aso e ono ; kae ko le fitu o aso ko se nea tapu loa a ia kia koutou ; ko le sapato a ia, ko le aso malolo, leia na fakatapu ki le Eteleno. Ko le tagata leia e fai ia loa se gaoi i le aso lena, e tautea loa a ia ki le mate. 3E leaise kotou tafu ia loa se afi, i se nofoaga i okoutou nofoaga, i le aso o le sapato.
Moliga ki le fau o le tapenakulo
4Na masau loa Moisese ki le kakai katoa o fanau a Iselaele, o pati : Ko leinei le nea leia na fakatotonu e le Eteleno. 5Kotou too i okoutou koloa se moliga ki le Eteleno. Ko tagata fuli e loto malie, e lotou aumai loa se moliga ki le Eteleno : ko se aulo, mo se siliva, mo se sila ; 6mo ni kie usi, mo ni kie kula fakapouli, mo ni kie kula malie, mo ni kie tea makeke, mo ni fului koti ; 7mo ni kilii ovi tagata lanu kula, mo ni kilii kakaututuu, mo ni papa akasia ; 8mo se lolo ki malama, mo ni nea fakamanogi ki le lolo tapu mo le kaloni fakamanogi ; 9mo ni fatu ko le onise ti mo ni iki ake a fatu ki le teuteui o le efote mo le peketolale. 10Ko latou fuli ala e poto tufuga ia koutou, ke lotou au o fai a nea fuli ala na fakatotonu e le Eteleno : 11le tapenakulo, mo ona puipui, mo lona ato, mo ona fakamau, mo ona papa, mo ona papa fakalava, mo ona pou mo ona tuuaga ; 12le aleka mo ona amo, mo lona tapono, ti mo le kie ke uufi ai le aleka ; 13le laupapa mo ona amo, mo ona nea gaoi fuli, ti mo pane tapu ; 14le tuuaga malama mo ona nea gaoi, mo ona malama, ti mo le lolo ki malama ; 15le aletale o kaloni mo ona amo, mo le lolo tapu ti mo le kaloni fakamanogi, mo le lito o le matapa ulu ki le tapenakulo ; 16le aletale o failaulau, mo lona ukamea pupu sila, mo ona amo, ti mo ona nea gaoi fuli ; le tanoa mo lona tafito ; 17mo puipui tautau o le lotoa, mo ona pou mo ona tuuaga, ti mo le lito o le uluaga o le lotoa ; 18mo pike o le tapenakulo, mo pike o le lotoa, ti mo olatou maea ; mo kofu gaoi ki le gaoi o le sagatualio, 19mo kofu tapu ki le tagata faisakilifisio ko Alone, ti mo kofu o ona vosa ki le gaoi fakapelepitelo.
20Na mavae loa le kakai katoa o fanau a Iselaele i mua o Moisese.
21Na ano loa latou fuli ala na loto alofa mo loto malie, o ave alatou moliga ki le Eteleno ki le gaoi o le falela tapu, mo lona tausi, ti mo kofu tapu. 22Ko tagata mo fafine, latou ala na loto malie, na ano loa o ave alatou moliga ; ko sa sau, mo mama, mo matemate, mo nea fakateuteu aulo kesekese ; na lotou tasi momoli loa lana moliga aulo ala na fakatapui ki le Eteleno. 23Ko latou fuli ala na maua ia ni kie lanu usi, mo ni kie kula malie, mo ni kie kula fakapouli, mo ni kie tea makeke, mo se fului koti, mo ni kilii ovi tagata lanu kula, ti mo ni kilii kakaututuu, na latou ave loa latou. 24Ko latou fuli ala na fai ia loa ni moliga ki se siliva mo se sila, na ave ia loa latou ki le Eteleno. Ti ko latou fuli ala na maua ia loa ni papa akasia ki le gaoi, na ave ia loa a ia. 25Ko fafine fuli ala na poto tuitui ki olatou lima, na ave ia loa le fua o alatou gaoi, ko ni filo usi, mo kula malie, mo kula fakapouli, mo tea. 26Ko fafine fuli ala na loto malie mo poto i le fili na fili ia loa le fului koti. 27Ko pule o le kakai na ave ia loa ni fatu onise mo ni iki ake a fatu ki le teuteui o le efote mo le peketolale ; 28mo ni nea fakamanogi, mo le lolo ki le tuuaga malama, mo le lolo tapu, ti mo le kaloni fakamanogi. 29Ko fanau fuli a Iselaele, tagata mo fafine, ala na loto malie ke kau ki le gaoi leia na fakatotonu e le Eteleno kia Moisese, na ave ia loa ki le Eteleno ni moliga o fakalogo ki le loto.
Fai o le gaoi : Petesaleele mo Oliape
30Na pati loa Moisese ki fanau a Iselaele : Ke kotou iloa kua filifili e le Eteleno a Petesaleele, vosa o Uli, vosa o Ulu, mei le faasiga o Suta. 31Ti kua fakaapele e ia Petesaleele ki le Laumalie o le Atua, mo le poto, mo le atamai, ti mo le poto i le fai o faasiga gaoi fuli. 32Ti kua tuku e ia kiate ia le poto i le fai o ni nea foou, mo gaoi ki le aulo, mo le siliva, ti mo le sila, 33mo le togi o fatu ke fakapiki ki kofu, mo le gaoi o le papa, ti mo le fai o nea fakateuteu kesekese. 34Ti kua soli foki e ia kiate ia le poto i le fai ako, ti e toe tatau mo Ooliape, vosa o Aisamake, mei le faasiga o Tane.
35Kua fakaapele e ia laua ki le atamai, ke la fai gaoi tuki mo gaoi fakatufuga fuli, ti ke la tui a nea fakateuteu mo nea lalaga ki kie usi, mo kula malie, mo kula fakapouli, mo tea, ti ke la fai a gaoi fuli mo nea foou fuli.
© Société Biblique de Genève, 2000-2020
