Isaia 47
47
1UTUT, ke laba ju hnyi sesâ, u hlu Babulona; laba ju eû hnyi kânâ ke ba but theron, u hlu anyin at Kaledaia: anyin adre me ca he hmetu ka haiö u a u menyik me mita. 2Hom dö li veto hnân oamamâ me khenyo falawa: ip ju ûnyi hnân tube hnyimâkâm, kia degecâ but baten khaûâm, omanenâ ju cam, vheno thö je wagewe. 3Ame he ka manen ânyâm hmehma, eke, adre me he ka wâ unyâm: oge me he ka bi hwaban, oge me ca he ka betenge ge ke at. 4At ame ûcû melita, Iehova tuhan sabaoth ien, wale Kabi Isaraela. 5Hlu nokon at Kaledaia lö, laba hnyibû ju, ke he thö ka hnyi dok ae lit: anyin adre me ca he hmetu ka hawo u momo thaniny je dokhu. 6Oge me hmönyik ka lakeik, oge me okongoâ ik hnyei me hnʼ ödra ka hnyi hnyamâm: e ba hmonyin betenge u je ânyâ kodra; u je ti ohmâkâ ânyâm hna ûhûkâlâköuâ hon wahingat. 7Ke u je ha, ka habe, Oge me he bala ka than momo; ke u je ca ûnykûme ta je ûnyi eling eû hnyi hnyekom, u je ca ûnykûme ge obiny ta je ûnyi e. 8Ke walang ang, long ju ang, u at ame labö hnu hoton je senyin, at ame laba khötkic, at ame ha eû hnyi hnyekon, ka habe, Inya thibi, ke ba ju ke at; oge me ca he ka laba helâ me safac, ke haba khaca oge me ca he ka wâ ba nokon: 9ke so bi ame he ka o köu li ûnyi ang helâ me thuthubademak hnyi bong a khaca, wale ba nokon, me ba âiân: ame he ka ti o köu, eja ke ne u je ne osehia bala ânyâm je bihihwakecin, me osehia bi khong. 10Anyin a u je hia but labageju ka ânyâm je hulo; u je ha, ka habe, E ba at ame ö nya; ame omono u hnen ânyâm metâ me ânyâm wâhmakhmeto: ke u je ha eû hnyi hnyekom, ka habe, Inya thibi, ke ba minya ju ke at. 11Anyin a wale ame he ka o köu ûnyi ae kong, ke u me ca he ka wâ deny ame he ka o hnyin: ke ame he ka o köu ûokonguny ke ca khanö u he ka onua: ke ame he ka ie o köu hnaûhango ke ca khanö u bi. 12Todrö walang ang me ânyâm ta je bihihwakecin, me hnâm hna osehia bi khong, wale u je huliwa hnyin hwân kʼ u tiga wanakat; ame ne khanö u he ka bi troban, ame ne he ka tom. 13U at ae sēnyin ge ânyâm je ûhnenamö ae se hia: e so ame he tavat adre me khenâ drany, ke tavat adre tuö je okhû, ke tavat wâ tremângâ je tehi, he ka tot me omeli u ûnyi hnyi ta je ûnyi ame he ka o köu. 14Wâ bi adre me he ka helâ me thatûnyin hwit; kʼ ame he meic ka thong degeci ödra; kʼ adre me ca he ka omeli ödra ûnyi hnyi maniny bâhlân; kʼ ame ca helâ me walep hnân hlok, ke meic adre laba hnyi hnyimakan. 15Adre me he ka helâe köu ta je ûnyi waleji u je hia but huliwa hnyin: haba tavat adre me ûcû omjeû unyâm hwân ke u tiga wanakat me adre me he ka ve he but hnyi dedra je gethen; ke ba bi at ame he ka omeli u.
maintained by the British and Foreign Bible Society