II. Samuela 9
9
1KE Davita ame hnei, ka habe, Hawa, e hu kolon biju lap anyi Saulo, me o ge me he ka betenge gan ga Jonathana? 2Ke e hu ke athnyaba hanen lap anyi Saulo, Ziba ien, ke ödrin e hawâ e kö Davita; ke haba than ame ha kâu, ka habe, Ziba u? Haingen, ka habe, E ke, athnyabaem. 3Me ame ha than, ka habe, Hawa, e hu kolon biju lap anyi Saulo, mʼ inye he ka omanenâ ibetengiö anyin Khong kâu? Ke haba Ziba ame ha ka than, ka habe, Khaca biju nöku Jonathana, wale ae mat li can. 4Ke haingen than kâu, ka habe, Ewa? Me haingö Ziba ka than, ka habe, Wâ bi, e hnyi hnyaba Makir nöku Amiela, hnyi Lo-deba. 5Me Davita than ame ukhûnöng me hom e ûnyi hnyi hnyaba Makir nöku Amiela ûheny Lo-deba. 6Me ame o but Mefiboseth, nöku Jonathana, nöku Saulo kö Davita, me e ame ta hnyikânâi me nom. Me haingö Davita, ka habe, Mefiboseth lö. Me haingen, ka habe, Walonya eang a athnyabaem! 7Ke Davita ame ha kâu, ka habe, Ca ot, anyin oge me he ka betenge gam ga Jonathana a kâmâm, ke oge me he ka hna köu ta hnyei hia i Saulo a kibâm; ke u me he bala ka tha han mönya hnyi anyik laulau. 8Me e ame nom me ha, ka habe, Iny ia athnyabaem inʼ u me wâ kuli a mok a iny ûcû mē? 9Me than ame hawo Ziba, athnyabai Saulo, me ha kâu, ka habe, Oge hia but ham ka nokon tuhâm ta je ûnyi anyi Saulo me anyin lap. 10Ke hamâm me lakom me lathnyabaem he ka belökâ kânâ hnân hobi kâu; ke u me he ka hom jem jeûiny me me hu an nokon; tuhâm: ke ame he bala bi Mefiboseth nokon tuhâm ka tha han mönya hnyi anyik laulau. Ke ödrin fifitin je baga laku Ziba, ke twente je hnyat a bi athnyabainy. 11Me haba Ziba ame ha ka than, ka habe, Ame he athnyabaem ka ânyâ ûnyi hia wale tuhok a than ame hûna könya a athnyabaem. Ke haingen than, ka habe, Ame he bi Mefiboseth ka tha han mönya hnyi anyik laulau helâ me ke nokon than. 12Ke hu nöku Mefiboseth ae ûhnyûkong, Mika ien. Ke haba je hnyat hia ödrin e laba hnyi hnyaba Ziba, me ödrin hia ödrin e bi athnyabai Mefiboseth. 13Waleling me me laba Mefiboseth hnyi Jerusalema: anyin a e ame han bala hnyi laulau anyin than; ke e mat li can.
maintained by the British and Foreign Bible Society