Suku-saakị 3
3
Adamụ Na Ivu Na Tamụnọ Oloko Kanm
Tomi Tarị-tarị Si Mịẹ Sakị
1 #
Mịẹ 12.9; 20.2 Mịọkụ piri-ḅio-ḅẹ nama tẹ KỊNỊNYANA-TAMỤNỌ ḅe tẹmẹ-aị ma ḅụ oronwi ḅe ḅụ aka na epele na tẹịnm. Ọ̀ nwẹnị ẹrẹḅọ ma gbela, “Karakara-ḅara-ḅụ, Tamụnọ ori ọ́ ḅẹẹ mịnẹ ḍụọ mẹ ḅio ḅẹ asịn ma ḅẹ gberie ḅụ sọ ó ye fị ma?” 2Ẹrẹḅọ ma nwẹnị oronwi ḅe pakịrị, “Wa inetẹ ḍụọ mẹ ḅio ḅẹ asịn ma ḅẹ sịnmgbọlụ ma fị ḅa, 3kụma Tamụnọ ḅẹẹm, ‘sịn mẹ tẹ ḍụọ mẹ karakara ogboku simearị ye mẹ ḅẹ sịnmgbọlụ mẹ ọ́ fị ma, ḅara sọ ọ́ kẹ anị lama ma, anieofori ó ḅofa fịị.’ ”
4Kụma oronwi ḅe nwẹnị á ḅẹẹ, “Karakaraye, ọ́ fịị ḅịa. 5Kẹ gotẹ ọkọ ḅẹẹarị, Tamụnọ nimi wararị mịnẹ ọmịnị anị fị gbọrụ sakị ọmịna atọrụngbọ finji ḅa tẹ ọ́ Tamụnọ kịka ḅa, iḅiye-na-siye-na nimi ḅụ.”
6Mie ḅụ ẹrẹḅọ ma sịn mẹ fị ḅụ ḅụụ-ḅẹlẹma wararị ḅara na, ḍiki-tọrụ ḅụ anị pọkọsọlịma la ḅara na ẹrị, anịsakị mịẹtẹ tomḅọ ye-nimi ḅụ mḅọ anị ḅii ḅa, anịtẹso á nwẹnị anị ḅẹ sịnmgbọlụ ọkị fị, tẹ pịkị anị ḅụ kẹlẹ kẹ á di sọ pịrị, tẹ ọ̀ nwẹnị fị. 7Anịtẹso ini maa apụ mamgba atọrụngbọ nwẹnị finji fama, tẹ ịn nwẹnị lekirim mịnẹ ịn paụ wararị, tẹ ịn nwẹnị ịla ịnyịnya ọkị tẹ gbin gboloma tẹ kẹ ịna aḅụụ kikima.
8Anị ḅẹ ḅoḅiri-so, ịn nwẹnị KỊNỊNYANA-TAMỤNỌ ḅẹ ḍụọ mẹ ḅio mẹnjịarị ye ḅẹ ọwụ naa, tẹ ama-na-ere-na ma nwẹnị ḍụọ mẹ ḅio ḅẹ asịn ma ogboku ịna aḅụụ ḅọị KỊNỊNYANA-TAMỤNỌ ḅe tọrọkọ. 9Kụma KỊNỊNYANA-TAMỤNỌ ḅe nwẹnị owiḅọ ḅe sịn, tẹ ọ̀ gbela, “Ị́ tọ-anga emi?”
10Tẹ ọ̀ nwẹnị pakịrị, “Àrị ị́ ọwụ naam ḍụọ mẹ ḅio, tẹ à nwẹnị ḅalafa tẹ ị̀ ḅụụ ḅọị, gbala à paụ wararị ẹrẹsị.”
11Tamụnọ nwẹnị gbela, “Tụḅọ ḍuko ị́ pịrị mịnẹ ị́ paụ wararị? À tọn ị́ pịrịm fị ma nwẹn ḅẹẹ sịn mẹ ḅẹ sịnmgbọlụ ị́ fị tẹ?”
12Owiḅọ ḅe nwẹnị pakịrị, “Ẹrẹḅọ ma tẹ ị́ kẹ ị̀ pịrịm ị̀ na simee nwẹn ḅẹẹ ḅọ ma sịn mẹ ḅẹ sịnmgbọlụ kẹ ị̀ pịrịm, tẹ à fịm.”
13 #
2 Kọr 11.3; 1 Tim 2.14 Anịtẹso KỊNỊNYANA-TAMỤNỌ ḅe nwẹnị ẹrẹḅọ ma gbela, “Miemẹ tẹ ị́ nwẹn mịẹ ye mẹ ḅọrọ tiye?”
Á nwẹnị pakịrị, “Oronwi ḅe oḅori kẹ ị̀ sịn tẹ àrị anị fịm.”
Tamụnọ Ḅẹrẹ Pẹlẹ Ịn Pịrịm
14Anịtẹso KỊNỊNYANA-TAMỤNỌ ḅe nwẹnị oronwi ḅe ḅẹẹ,
“Í miemẹ mịẹ tẹ ẹrẹsị opu anama mamgba na,
piri-ḅio-ḅẹ anama mamgba na ḅụ ị́yẹrị wori tẹ ḅọ sọ tẹẹ;
furo-furo mie ị́ kẹ ikiri ḅarịye,
anịsakị fọọn mie ị́ fị ḅarịye í ḍumo-ene mamgba ḅụ.
15 #
Mịẹ 12.17
À fịya-a kẹ ị́yẹrị na, ẹrẹḅọ ma na ogboku koroma ḅa,
pịkị í furo-ḅẹ-ḅọ na, á furo-ḅẹ-ḅọ na;
á furo-ḅẹ-ḅọ ị́ sịḅị fomu kọsịma ḅa,
anịsakị ị́yẹrị mḅọ ḅụọ-tongu gbọn ḅa.”
16Tamụnọ nwẹnị ẹrẹḅọ ma ḅẹẹ,
“À mịẹtẹ ị́ ḅụụ-fụka gburo-gburo ḅa fura ḅụ;
akụ ḅụ ị́ awọ iyi ḅa,
anịsọ ị́ í di ẹrị gotẹ ḅio-sẹsẹ nyana ḅa
anịsakị ọ̀ ḅẹrẹtọn ị́ pịrị ḅa.”
17 #
Hib 6.8
Anịsakị ori owiḅọ ḅe ḅẹẹm,
“Ị́ ị́ ta ma ḅịḅị poki
tẹ sịn mẹ tẹ à tọn ị́ pịrịm fị ma nwẹn ḅẹẹ sịn mẹ ḅẹ ye fịm ẹrẹsị,
í gotẹ kiri mẹ wori tẹẹ;
í ḍumo-ene mamgba ḅụ ị́ lịlị tẹrẹmẹ
ị́ anị ḅụ paka-ḅo ye fị ḅa.
18Nangị na kịnị temiarị osuka na mie
anị pakama pakama-ḅo ị́ pịrị ḅarị ye;
anịsakị piri-ḅio-ḅẹ asịn mie ị́ fị ḅarị ye.
19Ị́ kụrọma kọrịnama kọrị tẹ ị́ tọrụkuḅu imo sụa
tẹrẹmẹ í fịye nyana tẹ fị ḅa,
nwenii ị́ pịkịma kiri mẹ mu ḅa,
gbala anị ḅụ mie í ḅo ye;
ị́yẹrị anie fọọn,
anịsakị fọọn mie ị́ pịkị pịkịma mu ḅarị ye.”
20Adamụ nwẹnị ọ̀ ta ma sịn Ivu, gbala arị anie tomi mamgba iyingiḅọ ẹrẹsị. 21Tẹ KỊNỊNYANA-TAMỤNỌ ḅe nama oju ḅẹ apara opu akapa gbin tẹ kẹ Adamụ na ọ̀ ta Ivu na pịrị tẹ kẹ ịn sụam.
Tamụnọ Ḍụọ Mẹ Ḅio Adamụ Na Ivu Na Dee-Pakamam
22 #
Mịẹ 22.14
Anịtẹso KỊNỊNYANA-TAMỤNỌ ḅe nwẹnị ḅẹẹ, “Ḍikii, mịna tomi ma ḅo wamịna aḅụụ ḅẹ gbọrụḅọ kịka tẹẹ, iḅiye-na-siye-na nimi ḅụ. Wa ḍụkụ tẹ ịn ḅara-sụnma mu ḍumo pịrị sịn mẹ ḅẹ sịnmgbọlụ ọkị fị tẹ ḍumo gbamaso ḅịa.” 23Anịẹrẹsị KỊNỊNYANA-TAMỤNỌ ḅe Ideni ḅẹ ḍụọ mẹ ḅio in dee pakamam, in mu kiri mẹ tẹ ini ịn tẹmẹ kiri mẹ tẹlẹma, tẹlẹma tẹ fịaị ḍiḅii. 24Ò tomi ma dee pakama tẹ ịn kẹ Sẹrubimu sịn enjẹlị ḅe na, kọrịarị okologie tẹ pịkị, pịkị pakịrị goyegoye daarị ye na kẹ Ideni ḅẹ ḍụọ mẹ ḅẹ ịrụa-saakịarị-anga anga mẹ ḅụ koromam, mịẹtẹ ọ̀ ḅọrọ mu ḍumo pịrị sịn mẹ laarị etela mẹ ḍikiḍiki ḅẹ ḅara.
(C) The Bible Society of Nigeria