2 Samụẹlị 17
17
Usayị, Abusalọmụ Toluma Irimam
1Aniemẹ sikima, Ayitofẹlị nwẹnị Abusalọmụ ḅẹẹ, “Yee arị owiapụ gbọrụ puku, oyi ẹndẹ finji (12,000) sẹlẹ-ọkị tẹ mị ḍin à saakị paka tẹ Devidi ḍuka ḅa. 2Ori ịnyọ-pọkọta tẹ ḅio-lọkọ wararị ogbo à mu ọ̀ jụụ tẹ ọ̀ kẹ ekpe-lokoloko ḅụ suu ḅa; anịsakị tomi mamgba tẹ ori na simearị apụ ma ḍumo-mangị kọn ḅa. Amadaḅọ ḅe ngẹrị mie à fomu gbin ḅarị ḅọ; 3anịsakị arị ịya ẹrẹḅọ á di ama ḅo ḅara kẹ à tomi mamgba pịkịma-ḅo ị́ pịrị ḅa. Gbọrụ tomḅọ ḍumo ngẹrị mie ị́ ḍọkịarị ye; tẹ tomi mamgba dein ḅụ sime ḅa.” 4Tẹ toluma ẹkwẹn mẹ nwẹnị Abusalọmụ na, Izirẹlị ḅẹ omongiapụ mamgba na ḅụụ-ḅẹlẹ.
5Anịtẹso Abusalọmụ nwẹnị ḅẹẹ, “Usayị, Akayịtị ḅọ ḅe sọ sịn, tẹ yee wa ọ̀ nyana tẹ ḍuko ḅẹ ye naa.” 6Tẹ Usayị ḅo Abusalọmụ la tẹso, Abusalọmụ nwẹnị ọ̀ ḅẹẹ, “Mị-ḅara mie Ayitofẹlị ḍuko ḅara; wa ò ḍuko ḅara mịẹ ḅẹ? Anie ofori-ofori, ị́yẹrị ḍukoo.”
7Anịtẹso Usayị nwẹnị Abusalọmụ ḅẹẹ, “Mị sakị mẹ ḅụ datụkụma nimi ẹkwẹn mẹ tẹ Ayitofẹlị kọn ye mẹ iḅi-a.” 8Aniemẹ sikima, Usayị nwẹnị pịkị ḅẹẹ, “Í nimi wararị mịnẹ ị́ ḍa na, ori atomi na anie kụrọ-nyanatẹ opu owiapụ, tẹ anieḅụ piri-ḅio ịn ḅara ḅụ awọ pụkọ-ọkị tẹ ịganịma wararị tuu sime-ḅara ịn nwẹn sime wararị. Anie sikima, ị́ ḍa anie ọmụgbin ḅara-ḅaatẹ ḅọ, ḍin mẹ, ọ̀ tomi ma na gbọrụ anga ḅụ sime ḅịa. 9Ḍikii, mịọkụ mẹ sọ ori olulu ma ḅẹ gbọrụ ye ḅio ḅụ amịna ḅụụ ḅọị tẹ, anịanịa jen anga ḅụ. Anịsakị tarị owu paka mẹ ḅụ tomi ma ḅẹ ja apụ fịị sakị, anị naa ḅọ, naa ḅọ ḅẹẹ ḅa, ‘Tomi ma tẹ Abusalọmụ ḍukamẹnjịapụ ma ogbo ḅio tọnwa atomi fịị tẹẹ.’ 10Anịtẹrẹmẹ ḅioḅẹngbọ ọkụkụ ḅioḅẹngbọ sime-ḅara sime tẹ ḅiokpọ ḅara kẹ kụrọma owu-sọarị owiḅọ ḅe sọ siye ḅụụ la ḅẹ kuroma ḅụ gbọrsịḅị sanị ḅa; kẹ gotẹ ọkọ ḅẹẹarị, Izirẹlị mẹmgba nimi wararị mịnẹ ị́ ḍa anie kụrọ-nyanatẹ opu tomḅọ, anieḅụ inima tẹ ori na simearị apụ ma anie ḅiokpọ ḅara kẹ kụrọma owu-sọarị owiapụ. 11Kụma ị̀ datụkụma nimi ẹkwẹn anie, Danị ḅụ ọkị mu Biyasẹba la, Izirẹlị mẹmgba, tomina-ogbo ḅụ mịmọ ọgọnọ ḅẹ onwi sime-ḅara sime apụ ma kobiri ị́ ḍọkụma-ḅo, tẹ ị́yẹrị nwẹnị ḅarana owu mẹ mu. 12Anieḅụ wa ọ̀ ḍọkị-ẹrị ḅarị anga ḅụ wa mu ọ̀ jụụ ḅa; anịsakị igirigi kiri-ḅio sara ḅara kẹ wa ori ọgọnọ sara ḅa; anịsakị ọ̀ ḅụụ ḅẹ apụ-o, ori na simearị apụ mamgba ḅụ-o, gbọrụḅọ-sọ kirikọn ḅịa. 13Ori ọḅụ-na-isema mu gbọrụ opu ama ḅio sọ-sọọ, anịrẹ Izirẹlị mẹmgba ḍiki kẹ anị opu sịẹ mẹ ḅo ḅa, tẹ wa anị kpọ nụnụ mu tụndụ ogboku mẹ ḅụ koroma ḅa, nwenii saakị ye gbin-gbin ẹkẹkẹ-pakịrị sọ anịjụ kịnị ḍọkị-ẹrị ḅịa.”
14Abusalọmụ na, Izirẹlịapụ mamgba na nwẹnị ḅẹẹ, “Usayị, Akayịtị ḅọ ḅe datụkụma nimi ẹkwẹn mẹ iḅi Ayitofẹlị datụkụma nimi ẹkwẹn mẹ nẹngịm.” Gbala KỊNỊNYANAḄỌ ḅe Ayitofẹlị iḅi datụkụma nimi ẹkwẹn mẹ inoma ḅẹ tọn tẹ ẹrẹsị, mịẹ tẹ KỊNỊNYANAḄỌ ḅe siye ọkị-ḅo Abusalọmụ ọgọnọ gbana ḅẹ ḅara.
Ini Ịba Fị Devidi Pịrịm Tẹ Ọ̀ Mangị-so Tẹ
15Anịtẹso Usayị nwẹnị Zadọkụ na, Abịyata na agbamịẹapụ ma ḅẹẹ, “Nwẹn pembema ḅara Ayitofẹlị nwẹn kẹ datụkụma nimi ẹkwẹn kọn Abusalọmụ na, Izirẹlị ḅẹ omongiapụ na pịrịm; anịsakị yẹrị nwẹn pembema ḅara kẹ datụkụma nimi ẹkwẹn mẹ kọn tẹ. 16Anịẹrẹsị mịọkụ ọ́ fọnya fịrịma mu ḍuko Devidi pịrịị, ‘Mị ḍiin ori ịkpa mẹ ḅẹ tọrụ mẹ ḅụ kpongbo mịẹ tẹ ḅụọ kẹ mẹnjị saḅa anga mẹ ḅụ sime ma, kụma anị sime-ḅara, sime-ḅara sọ saḅa-ḅọrọọ, anieofori ịn ḅofa amadaḅọ ḅe na, tomi mamgba tẹ ori na simearị apụ ma sama-mẹnị fama.’ ”
17Mịọkụ Jonatanị na, Ayimazi na Ẹnị-rogẹlị ḅụ sime koruarị; gbọrụ fịrịmẹnjị-ẹrẹḅọtụḅọ mie mu ye ḍuko ịn pịrị tẹ ịn mu ḍuko Amadaḅọ Devidi pịrị, pịrị ye; anị kẹ gotẹ ọkọ mịẹarị ye, ịn mẹnjị opu ama mẹ ḅio sọ-muarị tẹ ini ịn ẹrị nyana-a. 18Kụma gbọrụ ene, gbọrụ owiḅọtụḅọ nwẹnị ini ẹrị tẹ ḍuko Abusalọmụ pịrị, anieḅụ ini maa apụ ma fọnya, fọnya mẹnjị-som, tẹ ḅo Bahurimu ḅụ gbọrụ owiḅọ tẹ amịna girepu-ḍụọ ḅio gbọrụ suḅe nyana wararị ḅọ warị sọm, tẹ nwẹnị koro suḅe mẹ ḅio mu. 19Tẹ ẹrẹḅọ ma nwẹnị gbọrụ ye-gbaịnye ọkị tẹ anị finjima suḅe mẹ ḅịḅị gbaịn, tẹ sịnmgbọlụ gala-galama sara anị ọgọnọ; anịsakị anị gbolomaye nimi gbọrụḅọ-sọ ofori. 20Abusalọmụ afịrịmẹnjịapụ warị mẹ ḅio ḅo ẹrẹḅọ ma la tẹso, ịn nwẹnị gbela, “Ayimazi na, Jonatanị na, ịn tọ-anga emi?”
Ẹrẹḅọ ma nwẹnị ịn pakịrị, “Ịn mẹnjị kuroro mẹ ḅẹ minji mẹ saḅa-koro tẹ.” Ini in ḍọkịm, tẹ ḅarị inetẹ ịn ḍọkị-ẹrịa tẹso, in pịkịma so Jeruselemu mum. 21Ịn so tẹso, owiapụ ma nwẹnị suḅe mẹ ḅio paka-ḅo, tẹ mu ḍuko Amadaḅọ Devidi pịrị. Ịn Devidi ḅẹẹm, “Saakịị, tẹ fọnya mẹnjị minji mẹ saḅa-koroo; kẹ gotẹ ọkọ ḅẹẹarị, nwẹn pembema ḅara mie Ayitofẹlị datụkụma nimi ẹkwẹn kọn ị́ ẹngbẹsẹ tẹ ḅara.” 22Anịtẹso Devidi nwẹnị tomi mamgba tẹ ori na sime apụ ma na virikama saakị, tẹ ịn nwẹnị mẹnjị Jodanị mẹ saḅa-koro; ene mẹ finji koro sakị, gbọrụḅọ tẹ kirikọntẹ amụ Jodanị mẹ saḅa-a ḅọ ofori.
23Ayitofẹlị ẹrịm mịnẹ ini ọ̀ datụkụma nimi ẹkwẹn mẹ ḍukamẹnjị-a tẹso, ọ̀ nwẹnị ò yedogi-nama dẹẹ tẹlẹma, tẹ dọkụ so ori ama, ọ̀ paka opu ama mu. Ọ̀ nwẹnị ọ̀ warị kẹ ọrụtọn ḅara wẹrị, tẹ mu ọ̀ ḅụụ kpọọ ḅaa; tẹ ọ̀ fịịm, tẹ ini ọ̀ ḍa ḍuḅu mẹ ḅio ò ḍiḅim.
24Anịtẹso Devidi ḅo Mahanahịmu lam. Abusalọmụ Izirẹlị ḅẹ owiapụ mamgba kẹ ọ̀ ḅụụ sụa tẹ Jodanị mẹ saḅa-korom. 25Mịọkụ Abusalọmụ, Johabụ kiri ḅụ Amasa kẹ ọmụ-ogbo mẹ sịḅịdaḅọ mịẹ tẹ. Amasa anie Isimẹlị furo mẹ ḅe Itira kẹ ẹrẹ kẹ koro gbọrụ owiḅọ iyi owiḅọtụḅọ, oriḅe tẹ Abigẹlị, Nahasi ẹrẹḅọtụḅọ, Zeruya, Johabụ iyingi ịyịmbara ma na sime ḅọ ḅe. 26Tẹ Abusalọmụ na, Izirẹlị na nwẹnị Gilẹdị ḅẹ ama mẹ ḅụ ọmụapụ kobiri akpụrụ-warị pike.
27Devidi ḅo Mahanahịmu la tẹso, Sobi, Amọnị ḅe apụ ma ḅe Raba ḅụ ḅo Nahasi owiḅọtụḅọ ḅe na, Mahaka, Lodeba ḅụ ḅo Amịyẹlị owiḅọtụḅọ ḅe na, Bazilayị, Rogẹlimu ḅụ ḅo Gilẹdị ḅẹ ḅọ ḅe na, 28nwẹnị tanda amẹẹ na, opu apanị na, lịka kẹ tẹmẹ ye-sụa-aị na, ịn kẹ witi na bali na siin mbịaka pembe afịaị na, fịye na, gbangịrịtẹ asịnmgbọlụ na, akịdị na akịdị kịka ja afịaị na, 29ḅẹm na, kpootẹ gilogilo wararị ndo-minji na, opu anama ogbo ḅụ paka-ḅo kpoo kụrọtẹ ndo-minji kẹ mịẹ fịye na, anana na ọkị-ḅo Devidi na, ori atomi na pịrị fị ḅẹ ḅom; gbala ini mẹẹ, “Ịkpa mẹ ḅio fịye fị tomi ma tarị, tẹ ịnyọ ịn ta tẹ minji ḅuu pịkị ịn tarị tẹ ẹrẹsị.”
(C) The Bible Society of Nigeria