လံာ်တၢ်ဂံၢ် 1
1
တၢ်ထၢဖှိၣ်ဂံၢ်နီၣ်ဂံၢ်အခီၣ်ထံးတဘျီ
1ဖဲကီၢ်အံၣ်စရ့လးအပှၤဂီၢ်မုၢ်ဟးထီၣ်ကွံာ်လၢကီၢ်အဲၤကူပတူး အပူၤ, ပူၤကွံာ်ခံနံၣ်တနံၣ်, လါခံလါတလါထီၣ်အခီၣ်ထံးကတၢၢ်တသီ န့ၣ်ယွၤကတိၤတၢ်ဒီးစီၤမိၤၡ့လၢယွၤအိၣ်ဝဲဆိးဝဲ အဒဲစီဆှံပူၤလၢကစၢၢ်စံၤနါအပှၢ်မုၢ်ကနၢပူၤန့ၣ်လီၤ. ယွၤစံးဝဲဒၣ်, 2“နၤဒီးစီၤအၤဟရိၣ်ကဘၣ်ထၢဖှိၣ်ဂံၢ်နီၣ်ကီၢ်အံၣ်စရ့လးအပှၤ ဂီၢ်မုၢ်အနီၣ်ဂံၢ်တခါဒ်ဒူၣ်ထၢတဖၣ်ဒီးဟံၣ်ဒူၣ်ဃီထၢတဖၣ်စုာ် စုာ်န့ၣ်လီၤ. ကွဲးနီၣ်ကယဲၢ်ပိာ်ခွါကိးဂၤအမံၤ, 3လၢအသးအိၣ်အနံၣ်ခံဆံဒီးဆူအဖီခိၣ်လၢအကြၢးဒီးတၢ်ဒုးသုး အဂီၢ်တက့ၢ်. 4ဃ့တၢ်မၤစၢၤလၢဒူၣ်တဒူၣ်အခိၣ်လၢဒူၣ်ကိးဒူၣ်ဒဲးအပူၤလၢကမၤ စၢၤနၤအဂီၢ်တက့ၢ်.”
5-16ဒီးအအံၤမ့ၢ်ပိာ်ခွါတဖၣ်, ခိၣ်နၢ်တဖၣ်လၢပှၤအဒူၣ်တဖၣ်အပူၤ, လၢအဘၣ်တၢ်ဃုထၢအီၤလၢကမျၢၢ်ဒူၣ်ထၢအကျါလၢတၢ်မၤအံၤ အဂီၢ်လီၤ.
| ပှၤအဒူၣ် | ပှၤအဒူၣ်အခိၣ် |
|---|---|
| ရူၤဘ့ၣ် | စီၤၡဒ့အူၢ်အဖိခွါစီၤအလံစူၢ် |
| စူၤမ့းအိၣ် | စီၤစူၤရံၡးဒံၤအဖိခွါစီၤၡ လူမံၤအ့လး |
| ယူဒၤ | စီၤဧမံၤနဒးအဖိခွါစီၤနၤဃၡိၣ် |
| ယံးစၣ်ကၢ် | စီၤစူဧၢ်အဖိခွါစီၤနၤသန့လး |
| စဘူလိၣ် | စီၤဃ့လူၣ်အဖိခွါစီၤအလံအာ် |
| အ့ဖရဲၣ် | စီၤဧးမံၤဟူးအဖိခွါစီၤအလံၡမၤ |
| မနၤၡ့ၤ | စီၤပဒၤစူၢ်အဖိခွါစီၤကမၤလ့လး |
| ဘံၣ်ယၤမံၣ် | စီၤကံးဒဧိနံၤအဖိခွါစီၤအဘံဒၣ် |
| ဒၣ် | စီၤဧးမံၤၡးဒံၤအဖိခွါစီၤအဃံၤဧ့စ့ၢ် |
| အၤၡ့ၢ် | စီၤဧးကရၣ်အဖိခွါစီၤပးကံၤအ့လး |
| ကး | စီၤဒဧူၤအ့လးအဖိခွါစီၤအ့လယၤစာ် |
| နးသၤလံ | စီၤဧ့နၣ်အဖိခွါစီၤအဃံရၤ |
17လၢပှၤတဆံခံဂၤအံၤအတၢ်မၤစၢၤန့ၣ်စီၤမိၤၡ့ဒီးစီၤအၤဟရိၣ် 18ကိးဖှိၣ်ပှၤဂီၢ်မုၢ်ဒီတဖုညါဖဲလါခံလါတလါထီၣ်အဆိကတၢၢ် တသီအနံၤန့ၣ်ဒီးဆဲးလီၤကွဲးနီၣ်ပှၤဂီၢ်မုၢ်ခဲလၢာ်ဒ်အဒူၣ် ထၢဒၣ်ဝဲဒီးအဟံၣ်ဖိဃီဖိဒၣ်ဝဲန့ၣ်လီၤ. ကယဲၢ်ပှၤပိာ်ခွါအသးအိၣ် အနံၣ်ခံဆံဒီးဆူအဖီခိၣ်တဖၣ်အမံၤန့ၣ်ဘၣ်တၢ်ကွဲးနီၣ်အီၤ ဒီးဂံၢ်နီၣ်အီၤခဲလၢာ်, 19ဒ်ယွၤမၤလိာ်တ့ၢ်ဝဲအသိးန့ၣ်လီၤ. လၢကစၢၢ်စံၤနါအပှၢ်မုၢ် ကနၢအပူၤန့ၣ်စီၤမိၤၡ့ဆဲးလီၤကွဲးနီၣ်ပှၤဂီၢ်မုၢ်အမံၤန့ၣ်လီၤ. 20-46ပှၤပိာ်ခွါအသးအိၣ်အနံၣ်ခံဆံမ့တမ့ၢ်ခံဆံဆူအဖီခိၣ်လၢအ ကြၢးဝဲဘၣ်ဝဲလၢတၢ်ဒုးသုးအဂီၢ်န့ၣ်ဘၣ်တၢ်ဆဲးလီၤကွဲးနီၣ် အမံၤဒ်အဒူၣ်ထၢဒီးအဟံၣ်ဖိဃီဖိအမံၤအိၣ်ဝဲဒၣ်အသိး, စးထီၣ်လၢစီၤရူၤဘ့ၣ်အဒူၣ်လၢအမ့ၢ်စီၤယၤကိာ်အဖိခွါအဒိၣ် ကတၢၢ်အဒူၣ်န့ၣ်လီၤ. အနီၣ်ဂံၢ်ခဲလၢာ်မ့ၢ်ဒ်အဖီလာ်အသိးန့ၣ်လီၤ.
လၢရူၤဘ့ၣ်အဒူၣ်န့ၣ် ပှၤလွံၢ်ကလးဃုကထိယဲၢ်ကယၤဂၤ. လၢစူၤမ့းအိၣ်အဒူၣ်န့ၣ် ပှၤယဲၢ်ကလးခွံကထိသၢကယၤဂၤ. လၢကးအဒူၣ်န့ၣ်ပှၤလွံၢ်ကလးယဲၢ်ကထိဃုကယၤယဲၢ်ဆံဂၤ. လၢယူဒၤအဒူၣ်န့ၣ်ပှၤနွံကလးလွံၢ်ကထိဃုကယၤဂၤ. လၢယံးစၣ်ကၢ်အဒူၣ်န့ၣ်ပှၤယဲၢ်ကလးလွံၢ်ကထိလွံၢ်ကယၤဂၤ. လၢစဘူလိၣ်အဒူၣ်န့ၣ်ပှၤယဲၢ်ကလးနွံကထိလွံၢ်ကယၤဂၤ. လၢအ့ဖရဲၣ်အဒူၣ်န့ၣ်ပှၤလွံၢ်ကလးယဲၢ်ကယၤဂၤ. လၢမနၤၡ့ၤအဒူၣ်န့ၣ်ပှၤသၢကလးခံကထိခံကယၤဂၤ. လၢဘံၣ်ယၤမံၣ်အဒူၣ်န့ၣ်ပှၤသၢကလးယဲၢ်ကထိလွံၢ်ကယၤဂၤ. လၢဒၣ်အဒူၣ်န့ၣ်ပှၤဃုကလးခံကထိနွံကယၤဂၤ. လၢအၤၡ့ၢ်အဒူၣ်န့ၣ်ပှၤလွံၢ်ကလးတကထိယဲၢ်ကယၤဂၤ. လၢနၤသးလံအဒူၣ်န့ၣ်ပှၤယဲၢ်ကလးသၢကထိလွံၢ်ကယၤဂၤ. ပှၤခဲလၢာ်ပာ်ဖှိၣ်မ့ၢ်ဝဲ, ဃုကလီၢ်သၢကထိယဲၢ်ကယၤယဲၢ်ဆံဂၤ.
47ပှၤလ့ၤဝံဖိတဖၣ်န့ၣ်တဘၣ်တၢ်ဆဲးလီၤကွဲးနီၣ်အမံၤဃုာ်ဒီးပှၤ ဒူၣ်အဂၤတဖၣ်ဘၣ်. 48အဂ့ၢ်ဒ်အံၤ, ယွၤစံးဘၣ်တ့ၢ်စီၤမိၤၡ့,
49“ဖဲနထၢဖှိၣ်ဒီးကွဲးနီၣ်ပှၤပိာ်ခွါတဖၣ်လၢအကြၢးဝဲဘၣ်ဝဲ ဒီးသုးဧိၤသံၣ်ဧိၤအတၢ်မၤအခါန့ၣ်, ဒၢနုာ်ဃုာ်လ့ၤဝံအဒူၣ်တဂ့ၤ. 50အခိၣ်တလိာ်, ပာ်ပှၤလ့ၤဝံဖိတဖၣ်ဒ်ပှၤအံးထွဲကွၢ်ထွဲ ယအိၣ်ဝဲဆိးဝဲအဒဲစီဆှံဒီးကယဲၢ်အတၢ်ပီးတၢ်လီခဲလၢာ်အသိး တက့ၢ်. အဝဲသ့ၣ်ကဘၣ်စိာ်အီၤဃုာ်ဒီးအတၢ်ပီးတၢ်လီတဖၣ်, မၤတၢ်လၢအပူၤဒီးသူၣ်ထီၣ်အဒဲဝးတရံးအီၤန့ၣ်လီၤ. 51ဖဲသုသုးသုသူၣ်ဒဲအလီၢ်တဘျီလၢ်လၢ်န့ၣ်, ပှၤလ့ၤဝံဖိတဖၣ်ကရူၢ်လီၤဒဲစီဆှံဒီးသူၣ်ထီၣ်ကဒီးအီၤဖဲ တၢ်သူၣ်ထီၣ်ဒဲအလီၢ်အသီတတီၤကဒီးစုာ်စုာ်န့ၣ်လီၤ. ပှၤအဂၤတဂၤလၢ်လၢ်လၢအဟဲဘူးဒီးဒဲစီဆှံန့ၣ်ကဘၣ်တၢ်မၤသံ ကွံာ်အီၤန့ၣ်လီၤ. 52ပှၤအံၣ်စရ့လးဖိအဂၤခဲလၢာ်ကသူၣ်ထီၣ်အဒဲတဖုဘၣ်တဖု, ပှၤတဂၤစုာ်စုာ်ဒီးအကရူၢ်ဒၣ်ဝဲလၢအနီၣ်တယၢ်ဒၣ်ဝဲအဖီလာ်န့ၣ် လီၤ. 53မ့မ့ၢ်ပှၤလ့ၤဝံဖိတဖၣ်ကဘၣ်သူၣ်ဒဲဝးတရံးဒဲစီဆှံလၢကကဟု ကယာ်အီၤအဂီၢ်, ဒ်သိးပှၤသုတဟဲဘူးအီၤနီတဂၤဒီးထိၣ်ဂဲၤယတၢ်သးထီၣ်လၢ ယကကျီကွံာ်အံၣ်စရ့လးအဒူၣ်အထၢတဂ့ၤအဂီၢ်န့ၣ်လီၤ.” 54မၤသးဒ်န့ၣ်ဒီးကီၢ်အံၣ်စရ့လးအပှၤဂီၢ်မုၢ်မၤကယဲၢ်တၢ်ကိးမံၤ ဒဲးလၢယွၤမၤလိာ်တ့ၢ်ဝဲစီၤမိၤၡ့န့ၣ်လီၤ.
Sgaw Karen Common Bible © Bible Society of Myanmar, 1992.