လံာ်တၢ်ဘူၣ်ထီၣ်ဘါထီၣ် 27
27
တၢ်သိၣ်တၢ်သီဘၣ်ထွဲဒီးတၢ်ဟ့ၣ်ဆူယွၤ
1-2ဒီးယွၤဟ့ၣ်လီၤစီၤမိၤၡ့, တၢ်သိၣ်တၢ်ဘျၢတဖၣ်ဒ်လၢလာ်အသိးလၢအံၣ်စရ့လးအပှၤဂီၢ်မုၢ် အဂီၢ်န့ၣ်လီၤ. ဖဲပှၤတဂၤဘၣ်တဂၤဘၣ်တၢ်ဟ့ၣ်အီၤဆူယွၤလၢတၢ်မၤလၢထီၣ်ပှဲၤ ထီၣ်တၢ်အၢၣ်လီၤလီၤဆီအဂီၢ်ဒီး, ပှၤအံၤဘၣ်တၢ်မၤထူၣ်ဖျဲးအီၤ သ့ဝဲခီဖျိတၢ်ဟ့ၣ်တၢ်အပှ့ၤလၢစ့ဒ်တၢ်ပာ်လုၢ်ပာ်ပှ့ၤအိၣ်ဝဲဒ် လၢလာ်အသိးန့ၣ်လီၤ.
3-7ပှၤပိာ်ခွါလၢအသးအိၣ်အနံၣ်ခံဆံတုၤလၢဃုဆံန့ၣ်နဘၣ်ပာ်အပှ့ၤလၢ
ၡက့လးယဲၢ်ဆံန့ၣ်လီၤ.
ဒီးမ့မ့ၢ်ပိာ်မုၣ်န့ၣ်နဘၣ်ပာ်အပှ့ၤလၢၡက့လး သၢဆံန့ၣ်လီၤ.
ပှၤပိာ်ခွါသးစၢ်လၢအသးအိၣ်ယဲၢ်နံၣ်တုၤလၢအနံၣ်ခံဆံန့ၣ် နဘၣ်ပာ်အပှ့ၤလၢၡက့လးခံဆံန့ၣ်လီၤ. ဒီးမ့မ့ၢ်ပိာ်မုၣ်သးစၢ်န့ၣ်နဘၣ်ပာ်အပှ့ၤ လၢၡက့လးတဆံန့ၣ်လီၤ. ပှၤပိာ်ခွါဖိလၢအသးအိၣ်တလါတုၤလၢယဲၢ်နံၣ်န့ၣ်နဘၣ်ပာ်အပှ့ၤ လၢစ့ယဲၢ်ၡက့လးန့ၣ်လီၤ.
ဒီးမ့မ့ၢ်ပိာ်မုၣ်ဖိန့ၣ်နဘၣ်ပာ်အပှ့ၤလၢစ့သၢၡက့လးန့ၣ်လီၤ. ပှၤပိာ်ခွါလၢအသးအိၣ်အနံၣ်ဃု ဆံဆူအဖီခိၣ်န့ၣ်နဘၣ်ပာ်အပှ့ၤလၢစ့တဆံယဲၢ်ၡက့လးန့ၣ်လီၤ.
ဒီးမ့မ့ၢ်ပိာ်မုၣ်န့ၣ်နဘၣ်ပာ်အပှ့ၤလၢစ့တဆံၡက့လး န့ၣ်လီၤ.
8ဒီးပှၤလၢအအၢၣ်လီၤအသးတဂၤမ့ၢ်ဖှီၣ် ဝဲဒီးဟ့ၣ်အပှ့ၤလၢတၢ်ပာ်အီၤမ့ၢ်တန့ၢ်န့ၣ်အဝဲကဘၣ်ဟဲဆူပှၤ လုၢ်တၢ်အခိၣ်အအိၣ်, ဒီးပှၤလုၢ်တၢ်အခိၣ်ကဘၣ်မၤစှၤလီၤအပှ့ၤထဲသိးဒီးအဝဲ ဟ့ၣ်ဝဲန့ၢ်န့ၣ်လီၤ.
9ဒီးတၢ်အၢၣ်လီၤမ့ၢ်ဘၣ်ထွဲဒီးဆၣ်ဖိကီၢ်ဖိလၢအဘၣ်တၢ်တူၢ်လိာ် အီၤဒ်တၢ်လုၢ်မၤဘူၣ်ဆူယွၤအအိၣ်သ့ဝဲန့ၣ်ကယဲၢ်တၢ်ဟ့ၣ်ခဲလၢာ် ဆူယွၤအအိၣ်န့ၣ်စီဆှံဝဲဒၣ်လီၤ. 10ဒီးပှၤလၢအမၤတၢ်အၢၣ်လီၤတဂၤန့ၣ် တဘၣ်လဲလိာ်ဆၣ်ဖိကီၢ်ဖိတဒုလၢတဒုအဂီၢ်ဘၣ်. မ့ၢ်မၤဝဲဒ်န့ၣ်ဒီးဆၣ်ဖိကီၢ်ဖိခံဒုလိာ်ဘၣ်ဃးဒီးယွၤန့ၣ်လီၤ. 11ဒီးတၢ်အၢၣ်လီၤမ့မ့ၢ်ဆၣ်ဖိကီၢ်ဖိလၢအတကဆှီ ဘၣ်လၢတၢ်တူၢ်လိာ်အီၤဒ်တၢ်လုၢ်မၤဘူၣ်ဆူယွၤအအိၣ် တသ့ဘၣ်န့ၣ်, မ်ပှၤတဂၤန့ၣ်ဟဲစိာ်အဆၣ်ဖိကီၢ်ဖိန့ၣ်ဆူပှၤလုၢ် တၢ်အခိၣ်အအိၣ်န့ၣ်တက့ၢ်. 12ဒီးဆၣ်ဖိကီၢ်ဖိတဒုန့ၣ်ဂ့ၤမ့ၢ်ဂ့ၤ, တၢ်လီၤတူၢ်လီၤကာ်အိၣ်မ့ၢ်ဂ့ၤပှၤလုၢ်တၢ်အခိၣ်ကဘၣ်ပာ်အပှ့ၤ န့ၣ်လီၤ. ဒီးတၢ်အပှ့ၤကဘၣ်မ့ၢ်ဝဲဒ်န့ၣ်လီၤ. 13ပှၤတဂၤန့ၣ်မ့ၢ်သးအိၣ်ပှ့ၤကဒါက့ၤဆၣ်ဖိကီၢ်ဖိတဒုန့ၣ်, ကဘၣ်ဟ့ၣ်ဝဲဆၣ်ဖိကီၢ်ဖိတဒုန့ၣ်အပှ့ၤဃုာ်ဒီးအပှ့ၤပာ်ဖှိၣ်အါ ထီၣ်ခံဆံမျးကယၤန့ၣ်လီၤ.
14ဒီးတုၤပှၤတဂၤပာ်စီဆှံအဟံၣ်ဆူယွၤအအိၣ်န့ၣ် ဒီးဂ့ၤမ့ၢ်ဂ့ၤတဂ့ၤမ့ၢ်ဂ့ၤပှၤလုၢ်တၢ်အခိၣ်ကဘၣ်ပာ်အပှ့ၤန့ၣ်လီၤ. ဒီးတၢ်အပှ့ၤကဘၣ်မ့ၢ်ဝဲဒၣ်ဒ်န့ၣ်လီၤ. 15ဒီးပှၤတဂၤလၢအပာ်စီဆှံအဟံၣ်န့ၣ်မ့ၢ်သးအိၣ်ပှ့ၤကဒါက့ၤဝဲ အဟံၣ်န့ၣ်ကဘၣ်ဟ့ၣ်ဝဲဟံၣ်န့ၣ်အပှ့ၤဃုာ်ဒီးအပှ့ၤခံဆံမျးကယၤန့ၣ်လီၤ.
16ဒီးပှၤတဂၤမ့ၢ်ပာ်စီဆှံအစံာ်တနီၤလၢအန့ၢ်သါဘၣ်ဝဲဆူယွၤအ အိၣ်ဒီးတၢ်အပှ့ၤကဘၣ်တၢ်ပာ်အီၤဒ်တၢ်ချံလၢကဘၣ်ဖှံလီၤအီၤ အနီၣ်ဃီၣ်အိၣ်ဝဲအသိးန့ၣ်လီၤ. ဘုမုယီၤလီၤတယၢၢ်တဃိမ့ၢ်အပှ့ၤမ့ၢ်စ့ၡက့လးယဲၢ်ဆံလီၤ. 17အဝဲမ့ၢ်ပာ်စီဆှံအစံာ်ဖဲနံၣ်တၢ်သဘျ့ဝံၤတဘျီဃီဒီး အပှ့ၤကမ့ၢ်ဝဲဒ်နပာ်အီၤအသိးန့ၣ်လီၤ. 18အဝဲမ့ၢ်ပာ်စီဆှံအစံာ်လၢနံၣ်သဘျ့ဝံၤအလီၢ်ခံတဘျီဘျီဒီး, ပှၤလုၢ်တၢ်အခိၣ်ကဘၣ်တိာ်လီၤတၢ်အ ပှ့ၤဒ်နံၣ်လၢအအိၣ်လီၤတဲာ်တုၤနံၣ်သဘျ့ခဲကိာ်တဘျီဒီးပာ် လီၤတၢ်မၤစှၤလီၤအပှ့ၤန့ၣ်လီၤ. ဒီးတၢ်အပှ့ၤလၢနံၣ်ပူၤကွံာ်တဖၣ်တၢ်ကထုးထီၣ်အီၤလၢတၢ်အပှ့ၤ အပူၤလီၤ. 19ဒီးပှၤတဂၤလၢအပာ်စီဆှံအစံာ်န့ၣ်မ့ၢ်သး အိၣ်ပှ့ၤကဒါက့ၤဝဲဒီးကဘၣ်ဟ့ၣ်ဝဲစံာ်န့ၣ်အပှ့ၤဃုာ်ဒီးအပှ့ၤ ယဲၢ်ပူတပူန့ၣ်လီၤ. 20မ့မ့ၢ်အသးမ့ၢ်တအိၣ်ပှ့ၤကဒါက့ၤအစံာ်မ့ၢ်ဂ့ၤ, မ့ၢ်ဆါလီၤကွံာ်ဝဲဆူပှၤတဂၤဂၤအအိၣ်မ့ၢ် ဂ့ၤ, စံာ်အံၤဘၣ်တၢ်ပှ့ၤကဒါက့ၤအီၤတသ့နီတစုလၢၤဘၣ်. 21မ့မ့ၢ်ဖဲနံၣ်သဘျ့ခဲကိာ်တဘျီတုၤ ဝဲန့ၣ်ဒီးစံာ်အံၤကကဲထီၣ်ယွၤအတၢ်စုလီၢ်ခီၣ်ခိၣ်လီၤ စိၤဒီးကဘၣ်ဃးဒီးပှၤလုၢ်တၢ်အခိၣ်တဖၣ်န့ၣ်လီၤ.
22ဒီးပှၤတဂၤဂၤမ့ၢ်လုၢ်ထီၣ်စံာ်လၢအပှ့ၤတ့ၢ်လံဝဲဆူယွၤအအိၣ်န့ၣ်ဒီး, 23ပှၤလုၢ်တၢ်အခိၣ်ကပာ်အပှ့ၤဒ်နံၣ်အနီၣ်ဂံၢ်အိၣ်ဝဲတုၤနံၣ်သဘျ့ ခဲကိာ်တဘျီ, ဒီးကဘၣ်ဟ့ၣ်တၢ်အပှ့ၤ လၢနံၣ်အဝဲန့ၣ်ဒီးစ့န့ၣ်ဘၣ်ဃးဒီးယွၤန့ၣ်လီၤ. 24ဒီးလၢနံၣ်သဘျ့န့ၣ်စံာ်အံၤက ဘၣ်တၢ်ဟ့ၣ်က့ၤအီၤဆူပှၤလၢအဆါလီၤကွံာ်အီၤအအိၣ် မ့တမ့ၢ်အစၢၤအသွဲၣ်တဖၣ်အအိၣ်န့ၣ်လီၤ.
25တၢ်အပှ့ၤခဲလၢာ်ကဘၣ်တၢ်ပာ်လီၤအီၤဒ်ပှၤလုၣ်တၢ်အခိၣ်ပာ်စ့ အနီၣ်ထိၣ်အိၣ်ဝဲဒၣ်အသိးန့ၣ်လီၤ.
26မ့မ့ၢ်ဆၣ်ဖိကီၢ်ဖိအဝဲၢ်ကိန့ၣ်မ့ၢ်ယွၤအတၢ်ဒီးဘၣ်ဃးဒီးယွၤလီၤ. ဒီးဂီၤဖံးမ့ၢ်ဂ့ၤ, သိမ့ၢ်ဂ့ၤ, အဝဲၢ်ကိန့ၣ်မ့ၢ်ယွၤအတၢ်လီၤ. ပှၤတဘၣ်လုၢ်ထီၣ်အီၤနီတဂၤဘၣ်. 27ဘၣ်ဆၣ်ဒီးဆၣ်ဖိကီၢ်ဖိလၢအတကဆှီဘၣ်တ ဒုအဖိဝဲၢ်ကိန့ၣ်ဘၣ်တၢ်ပှ့ၤက့ၤအီၤသ့ဝဲဒ်စ့အနီၣ်ထိၣ်အိၣ် ဝဲအသိးအမဲာ်ညါကဘၣ်ဟ့ၣ်အါထီၣ်ဝဲခံဆံမျးကယၤန့ၣ်လီၤ. မ့ၢ်တဘၣ်တၢ်ပှ့ၤက့ၤအီၤန့ၣ်ဒီးကဘၣ်တၢ်ဆါလီၤကွံာ်အီၤဆူ ပှၤတဂၤဂၤဒ်စ့အနီၣ်ထိၣ်အိၣ်ဝဲဒၣ်အသိးန့ၣ်လီၤ.
28တၢ်တမံၤမံၤဒ်အမ့ၢ်ပှၤကညီမ့ၢ်ဂ့ၤ, စံာ်လၢအဘၣ်တၢ်လုၢ်ထီၣ်အီၤလၢာ်လၢာ်ဆ့ဆ့မ့ၢ်ဂ့ၤန့ၣ်, တၢ်ဆါလီၤအီၤမ့ၢ်ဂ့ၤ, တၢ်ပှ့ၤက့ၤအီၤမ့ၢ်ဂ့ၤ, တသ့လ့ၤတက့ၤဘၣ်. မ့ၢ်တၢ်လၢအဘၣ်ဃးဒီးယွၤလီၤစိၤန့ၣ်လီၤ. 29ပှၤကညီတဂၤဂၤဒၣ်လဲာ်မ့ၢ်ဘၣ်တၢ်လုၢ်ထီၣ်အီၤလၢာ်လၢာ်ဆ့ဆ့ န့ၣ်ဘၣ်တၢ်ပှ့ၤက့ၤအီၤတသ့ဘၣ်. ကဘၣ်တၢ်မၤသံကွံာ်အီၤန့ၣ်လီၤ.
30ဒီးတၢ်ဆံဆဲၣ်ပူတပူလၢကယဲၢ်ဟီၣ်ခိၣ်အတၤသၣ်ဒ် ဘုဧိၤဟုဧိၤမ့ၢ်ဂ့ၤ, တၤသူတၤသၣ်တဖၣ်မ့ၢ်ဂ့ၤန့ၣ်ဘၣ်ဃးဒီး ယွၤန့ၣ်လီၤ. 31ဒီးပှၤမ့ၢ်သးအိၣ်ပှ့ၤက့ၤအီၤန့ၣ်ကဘၣ်ဟ့ၣ် တၢ်အပှ့ၤဒ်စ့အနီၣ်ထိၣ်အိၣ်ဝဲအသိးအမဲာ်ညါကဘၣ် ဟ့ၣ်အါထီၣ်ဝဲခံဆံမျးကယၤန့ၣ်လီၤ. 32ဒီးဆၣ်ဖိကီၢ်ဖိအဒၢကိးမံၤဒဲးဆံဆဲၣ်ဒု တဒုန့ၣ်ဘၣ်ဃးဒီးယွၤလီၤ. ဖဲဆၣ်ဖိကီၢ်ဖိတဖၣ်ဘၣ်တၢ်ဂံၢ်အီၤန့ၣ်ဆံ ဆဲၣ်ဒုတဒုန့ၣ်ဘၣ်ဃးဒီးယွၤန့ၣ်လီၤ. 33ဆၣ်ဖိကီၢ်ဖိအကစၢ်တဂၤန့ၣ်တဘၣ်ဃုဝဲဒ်သိးဆၣ်ဖိကီၢ်ဖိအတ ဂ့ၤတဖၣ်ကဘၣ်တၢ်ဃုထၢအီၤမ့ၢ်ဂ့ၤ, ကဘၣ် တၢ်လဲလိာ်အီၤမ့ၢ်ဂ့ၤန့ၣ်ဘၣ်. အဝဲမ့ၢ်လဲလိာ်ဆၣ်ဖိကီၢ်ဖိတဒုလၢအဂၤတဒုအဂီၢ်ဒီးဆၣ်ဖိ ကီၢ်ဖိခံဒုလိာ်န့ၣ်ကဘၣ်ဃးဒီးယွၤဒီးဘၣ် တၢ်ပှ့ၤက့ၤအီၤတသ့လၢၤဘၣ်န့ၣ်လီၤ.
34တၢ်မၤလိာ်တဖၣ်အံၤမ့ၢ်တၢ်မၤလိာ်တဖၣ်လၢယွၤဟ့ၣ်လီၤစီၤမိၤၡ့ လၢပှၤအံၣ်စရ့လးဖိအဂီၢ်လၢကစၢၢ်စံၤနါအလိၤန့ၣ်လီၤ.
Sgaw Karen Common Bible © Bible Society of Myanmar, 1992.