MATHAIIN 3
3
Baptispu Johon Sintho
(Mk 1.1-8; Lk 3.1-18; Jn 1.19-28)
1Hava han Baptispu Johon a suaka Judai philchara chong arila. 2“Malung makhir u ro asik chu vanram a nai zei,” ati. #Mt 4.17; Mk 1.15 3Hiva mi hi ani Isai Dearin hia chong hi ei ril, #Isa 40.3 (LXX)
“Philchar rama mi he khat ankheka,
‘Puma lampui sin u ro;
a reng lampui ngai manzik u ro,’ ” ati.
4Johon makingkang mul puan ei rasil a konga mevun le ankhita khairakuak le ram khuaining ei sak. #2 Rng 1.8 5Hanke Jerusalem dora Judai ram hatuka Jordon kola adep ngai ata mi asuaka a kom ase u. 6A pap u ngai andara Jordon dunga akom baptisma achang u.
7Tenchu Pharisi le Saduki baptisma alak ranga ei hong u a muna hangai rang han ei ti, “O marul chi ngai na matona taksitna rang ata arot ranga tumo ana ril u? #Mt 12.34; 23.33 8Hantin han malung thulna dika anra u ro. 9Hatuka na malung u na mandon u no ro. Abraham koini na pa ten kei na ti ni u zei Pathianin hi lung ngai ata Abraham a rang nai a manpiang thei. #Jn 8.33 10Hatuka atun len thingkung ngai bula rei akop keng hasik han thing amara asa nok tak chu hava ha tuka moia anpei thei. #Mt 7.19
11“Malung thulna rang tina baptisma ka na pek u na ten ka nuka a hong ka neka ranak a nei a kekok a pelrua ngal ni makung aman Ratha Anthiang le moia baptisma na pe unti. 12A tiangkerel a kuta a om hatuka a rimun rathial inti hanke a sasiara bu hong bun inti tenchu arasi chu thi lui moia hal inti” ati.
Puma Isua Baptisma
(Mk 1.9-11; Lk 3.21-22)
13Havatak han Isua Johon akom baptisma achang ranga Galili ata Jordona akoma a hong. 14Tenchu Johonin alei khara, “Na kom ke baptisma kei lak dan ten ka kom nei hong ichangmo?” 15Tenchu Isuan a masanga, “Zot ro asik chu hintin hin dikna tin reng amang hi koini rang asa,” ati pe hanke ala zot pe.
16Hatuka Isua baptisma a changa ti ata anthuia enro ama ranga van anlonga aman Pathian Ratha ha pharvali anga a chunga a hong ei mu.
17Hatuka enta anvan ata hiva he hi ei ni, “Hiva hi ka Naipasal madit ama han kei zot.” #Anp 22.2; Sam 2.7; Isa 42.1; Mt 12.18; 17.5; Mk 1.11; Lk 9.35
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.