Salmos 97
97
Itꞌéni Díos mé ti Rey imá tꞌe̱to̱an
1Itꞌéni Díos mé ti Rey imá tꞌe̱to̱an.
Tócháha̱ra kaínra tjejora chjasintajni
la ko tócháha̱ra jahara tjejora nonte chritaón nda̱ñao.
2Ti itji̱ tié mé tsíka̱ntatjen ti itjen Díos.
Jína tjenka̱yáxin chꞌan la ko ndoá tꞌe̱to̱an chꞌan.
3Ti xrohi titaón nti̱a ti itji Díos
mé tíha tsochexín ti sin nínkakohen chꞌan
la ko tsíka̱ntatjen ti jehe chꞌan.
4Ti tjónkíxín mé tꞌinkaséñani chjasintajni
la ti chjasintajni la chrakon ti tꞌikon xi̱kaha.
5A̱ndá ti ijna̱ la tsatanka éxi chi̱nko̱ cera nkayakon Itꞌéni Díos,
ti nkexro a mé Ìnché kuenté chjasintajni.
6Ti nka̱jní mé chrónkaxín kixin chaxín jína Díos.
Kaín chjasin tsꞌikon ti kjuachaxin kuènté Díos.
7Chrókósuéhe̱ kaín ti sin tinkáchónki ti nkehe tsíkjano̱ña.
Jehe sin la nchehnke sin tinkáchónki sin nkehe tsíkjano̱ña,
kjánchó kaín ti íso díos tsꞌejóxin tochꞌin
ti itjen Itꞌéni Díos tꞌe̱to̱an.
8Jaha Itꞌéni Díos,
la ti chojni siín chjasin Jerusalén
la ko kaín chojni tjejó chjasin Judá
kuíhin sin ti nkehe této̱an la imá kóchéhe̱ sin.
9Jaha Itꞌéni Díos itjen nkaya nka̱jní,
jaha la této̱an kuènté chjasintajni.
Mé jaha a̱ntsí této̱an,
a̱ndá ti íso díos la tꞌe̱tua̱nhña.
10Itꞌéni Díos la tjue̱he chꞌan ti sin tóxrìe̱nhña ti nkehe jínahña,
la tꞌayakohen chꞌan a̱sén ti sin jína,
mé tꞌayakohen chꞌan ti sin jína kixin kohya nkehe tso̱hen sin.
11Ti xrohi mé tꞌinkaséñaxín ti chojni jína
la imá tso̱chéhe̱ ti sin jína tjenka̱yáxin.
12Tócháha̱ra chojni jína kixin tinkachónkira Itꞌéni Díos.
Tjikosayéxinra ti ihni̱é chꞌan.
© 2016, Wycliffe Bible Translators, Inc. All rights reserved.