Salmos 124
124
Díos nkochríxín tjinki̱tsani
Salmo kuènté David
1A̱ndá ti chrókjuinki̱tsahya Díos
mé xi̱kaha chróndáchrora jahara chojni Israel.
2Nchónhña chojni kꞌuínkatjen kónínkakohen ti jeheni,
a̱ndá ti chrókjuinki̱tsahya Itꞌéni Díos ti jeheni
3la kjá tjejóchónxihini chrókꞌuìnka̱ sin ti jeheni
kixin imá nínkaon sin.
4Méxra̱ éxi ìnta̱ sítji chrókꞌuátjuákoni
o̱ éxi ijnko nda̱ninche imá ijié chrókꞌuátjuákoni.
5Éxi nchónhña nda̱ninche
chrókꞌuitjáñaxíni.
6A̱ndá kjuasáye Itꞌéni Díos
kjuajonhña kjuachaxin kixin chrókjonie sin ti jeheni.
7Éxi ijnko koxroxe tsíkꞌixehen ijnko ntantoa, mé ijnko trampa,
kjánchó ti ntantoa la tsíxite̱he̱ la sákjui̱ va
mé xi̱kaha kónheni la kuaáni.
8Landá kjuasáye Itꞌéni Díos kjuínki̱tsa la kuaáni;
jehe chꞌan mé tsíkjichꞌéna chꞌan nka̱jní la ko chjasintajni.
© 2016, Wycliffe Bible Translators, Inc. All rights reserved.