IBRI 5
5
1Achangbe amükeamrü aban nihbuh mihtsürü bolungnü arü thsung thsüde Thrünpuh tankihde, neakbo dünkheak shuhmülanga jihkhibo tüsho kingaünkhibo jihpü mokhitchoh. 2Apinü tümü yak mümükheahrü tüsho atsophülaprü ki aphuayaknü arhimopü kuklah, tümütüsho api she reangmüzahkhi bukkhüp lah. 3Jumonü apinü anihbuh neakbo le mihtsürübo neak dünkheak shuhmülanga jihpü kamchoh. 4Shenü she nihbuh küdahnü wüntre muluchoh; Aron nangde api ju Thrünpuhnü jia labeah.
5Junangde Khrista she achangbe amükeamrü thsüpü nihbuh küdahnü ashuhkihkhi yung, tüshe Thrünpuhnü api ki tha,
“Nü I tsührü ah,
khihni I nü Buh kamdo.”
6Kheaküshe apinü dang püpü ching tha,
“Melkizedek kiphahde,
nü a lün thsungkheak amükeamrü ah.”
7 #
Mt 26.36-46; Mk 14.32-42; Lk 22.39-46 Jisunü api rhangdung lachoki achangnü zhide tüsho chike bukde api khümkhitkhukpü labuh ki tamkhüntamnüde amushukhibo lakheah, tüsho apinü wüntre lade amushukhinü api ki sojih. 8Api ju atsührü thsüa lalashe, apinü thsünükhi hode mihyuanipü mükheah; 9tüsho khiukdahkhi kamde api ju anihbuh ki mihyuanirü alala yo lünnü akhümkhit limro kam, 10tüsho Melkizedek kiphahde achangbe amükeamrü thsüpü Thrünpuhnü jia zojih.
Akin Bahyukkhi azhihde Atünadoyu
11Ha dünkheak isanü hihde athapü lah, tüshe nüsanü nahnah manikhitkhinü athanakpü chaklah. 12#1 Kor 3.2Kheakü hadükia nüsa ju thsangyurü thsübe laa lalashe, kheaküshe Thrünpuh yu thiyuro adungtobe nüsa ki thsangyupü thsüde khürü yihnüpü lah. Tsühyungbe amüküp yungde niuhke nüsa yihnüpü lah; 13tümüde shepü niuhke kheaknü rhangdung lanü thiyurolungki yu ching ayeanzo yung, tümüde api khungarü ah. 14Tüshe tsühyungbe amüküp ju azorü thsungkheak ah, tümüde sherünü athsükhukpü lanü amütsü chingnü atsü mütsankhitpü rhimoakheahde yeanzamdo.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.