1 TESALONIKA 1
1
1 #
Yunir 17.1
Paul, Sela, tüsho Timothi kilimnü,
Abuh Thrünpuh tüsho Atungpuh Jisu Khrista ching Tesalonika borü kilim:
Nüsa kilim amüthsüm tüsho mungtsü laang.
Tesalonikarü Rhangdung tüsho Akin
2Isanü tamkhüntamnü ching mutukzhakde nüsa tamde, kamruhroro nüsa alala thsungkheak Thrünpuh ki makshe jihchoh, 3nüsa akin tüsho amuzho rhimo tüsho isa Atungpuh Jisu Khrista ching düküngde mulonglamkhi isa Thrünpuh tüsho Abuh miki lümkhitchoh. 4Tümüde Thrünpuhnü muzhokhi keoniorübo, apinü nüsa mokhitdo de isanü mükheahlah; 5isa thiyusheak-atsü ju nüsa kilim thiyu chingnü lang yung, tüshe wu tüsho Amüsüh Me ching, akin mütsande arü. Nüsa thsülimnü isanü nüsa bolung küdürü mihtsürü amütsan thsüde alakheanü nüsanü mükheahlah. 6#Yunir 17.5-9Nüsa ju isa tüsho Atungpuh kheahkhirü kamdo, tümüde nüsa thsünü ching lachoki Amüsüh Menü asühshihde thiyusheak leangkhi; 7junangde Macedonia tüsho Akaia ching akinrü alala ki nüsa amütsan khülang kam. 8Tümütüsho Macedonia le Akaia ching nüsa kheaknü Atungpuh yu lang akhiukkhi yung, tüshe isanü athapü tümü yihnüpü mülapü thsüde Thrünpuh kheak nüsa akin lüpdükhi ching yü. 9Künangde nüsanü isa leangkhikheanü, tüsho sangthsübo kilimnü arhang tüsho thiyuro Thrünpuh tankihpü rholokhi, 10tüsho apinü ashe chingnü arhang kamloshihkhi, bukakhiuk arüpü chingnü isa bekhitpü lakhi Jisu, api tsührü yinmi chingnü arükhi aleangpü arü küdahnü isa ki thiyusheak jihchoh.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
