Rò̌mǎphû̌ 8 - 인기 성경 구절

공유

Kòyò htě a mo̤ǐ Cǒmara, dě Cǒmara kaǎ nû̌û ta a ta̤yè̤lò̤nǎ aya toǒnu, ta̤ma̤htûhtò̌ ana̤ ta asî hî̌tètè̌ bǎbǎnu, Cǒmara ma̤bǎ asîya ta̤wǒ numî̌, pa sî̌ya pwǎ.

Ta̤si bǎbǎ, ta̤htûpwa̤ bǎbǎ, mǒkhû̌tanaphû̌ bǎbǎ, khînǎkhîno bǎbǎ, ta̤ma̤htûhtò̌ ana̤ khònò̤htǒo toǒ bǎbǎ, htû̌꤮ nǒkòpě toǒ bǎbǎ, ta̤po̤ta̤phǎ toǒ bǎbǎ, he yṳǎ te̤mǎ ta a htěpa̤jòkè pa ta Cǒmara ata̤mo̤ǐ tò̤. Ta̤ ǒ dě mǒla̤ toǒ bǎbǎ, a ǒ dě hǎkhû̌ teběhtǒo ala̤ toǒnu bǎbǎ, ta̤bǒlò̤ ahǔwa̤ toǒ bǎbǎ, pa Běcǎ Ye̤shǔkhrî̌stu ma̤hto bǎ paya akhû̌akhî, ta̤ lǒ̤꤮ bò htǒotoǒnu a htěpa̤jò pa ta Cǒmara ata̤mo̤ǐ tò̤.

Hǐnudě, bǎ pa khû̌ǎyû̌lò̤ akhanu, Běcǎ sǎcahtǐ hè ma̤jè pa. Pa to kwisaba Cǒmara titènu pa sî̌yatò̤ pwǎ̤ta Běcǎ sǎcahtǐ ana̤ kwibǎ pagûla̤. Bǎ a kwibǎ paya akhanu, yo̤sǎ htě pa hî̌ htò̌lṳjò tò̤ toǒnu a koohtò̌lṳ bǎ pa dě Cǒmara ǒ.

Dèhî̌hǐnudě, ta̤ lǒ̤꤮ bò htě he hî̌ bǎ sî htǒotoǒnu, pa glè gènè̤ hî̌tè? Cǒmara dè ǒkû̌ ta pa tokho dèhî̌dě, mî̌ûpè tapwa̤ glè shěpe̤jò pa pè?

Hǐnudě khònò̤htǒo, kòyò htě a htûhtò̌ kû̌ta Ye̤shǔkhrî̌stu tacǎnǔ꤮ pa toǒnu, Cǒmara cèrò nû̌û dǐkhò̌꤮ tò̤.

Kòyò htě a gènè̤ còcè̌pwǎ na̤klûphěyî̌ a ta̤sò̌yṳ phû̌mò̤ toǒnu, a ǒhtûpwa̤ kû̌ta Cǒmara tûjûpwa̤ tò̤. Pwǎ̤tadě kòyò htě Běcǎ sǎcahtǐ pǒǐ nû̌û ta̤gènè̤ toǒnu, a bǎ nî̤bǎ ta̤mo̤ta̤kwǐ htǒotuhtu pě, htohǒtò̤ a ǒkû̌ta Cǒmara tûjûpwa̤ pě.

Ta̤ lǒ̤꤮ bò htǒotoǒ htûhtò̌ pwǎ̤tadě Khrî̌stu htě a mo̤ǐ pa htǒotapwa̤ akhû̌akhî, pa ma̤pè̤ bòmṳ̂sîglîbò ta̤htǒotoǒ pě.

He kè̌shǐshěto̤bǎ ta ta̤jîta̤jû htě pa khòbǎ khònò̤kha htǒonu, he dè dǒtûkè̌ ta Cǒmara dǔlṳ pa ta̤sîrîdû̌sîrîhtû htû̌꤮ nǒkòpěnu, ta̤jî khònò̤ htǒo, he bè̌ yǎta ta̤dǐcǎ꤮ tò̤.

Mî̌ûpè tapwa̤ htěpa̤jòkè Ye̤shǔkhrî̌stu ata̤mo̤ǐ pa htǒonu pè? Bǎ pa khòbǎ ta̤pò̤ta̤sha akhanu bǎbǎ, ta̤jîta̤jû akhanu bǎbǎ, kò ma̤jîma̤jû pa akhanu bǎbǎ, ta̤hǒwi̤shèwè bǎbǎ, ǒkoyo sǒkû bǎbǎ, ta̤sò̌gònò̤ ǐsha akhanu bǎbǎ, kò ma̤si ma̤hǎmǎ pa akhanu bǎbǎ, kò htěpa̤jòkè pa ta Ye̤shǔkhrî̌stu a ta̤mo̤ǐ pa htǒonu dǐpwǎ̤꤮ tò̤.

Htodě Cǒmara htě a kè̌lǎ sèlèkè̌ pa sò̌phlǒ a ta̤gènè̤ htǒotapwa̤nu, a sî̌ya te̤mǎ ta̤ htě Běcǎ sǎcahtǐ sò̌yṳ kwibǎ paya htǒotoǒ, ma̤tè̤hî̌dě Běcǎ sǎcahtǐ kwibǎ Cǒmara akòyò cahtǐ toǒ aya pwǐ Cǒmara a ta̤sò̌yṳǒnu pwǎ.

Ma̤tè̤hî̌dě, kòyò htě a ǒhtûpwa̤ pwǐ Cǒmara a sǎcahtǐ yṳ̂klè̌nè̌klò nû̌û toǒ numî̌ mî̌pwǎ Cǒmara a phû̌mǔphû̌khû toǒ hǒ.

Kòyò htě a ǒhtûpwa̤ pwǐ na̤klûphěyî̌ a ta̤sò̌yṳ phû̌mò̤ toǒnu, a gènè̤ còcè̌pwǎ ta̤sò̌yṳ htě a phû̌mò̤ toǒ pwǎ. Pwǎ̤tadě kòyò htě a ǒhtûpwa̤ pwǐ Běcǎ sǎcahtǐ yṳ̂klè̌nè̌klò nû̌û toǒnu, a gènè̤ còcè̌pwǎ pwǐ Běcǎ sǎcahtǐ a ta̤sò̌yṳnu toǒ pwǎ.

Cǒmara htǒotapwa̤nu, aphû̌ ta ana̤nu a sò̌le̤ǐ tò̤ dě a ǐlò̤kè aphû̌ ta pa lǒ̤꤮ bò toǒ aya. A dè ǐlò̤ko pa ta aphû̌khû Ye̤shǔkhrî̌stu dèhî̌dě, ta̤ lǒ̤꤮ bò htě a ǒkè ahǔwa̤ toǒnu, a ǐ lò̤kopo̤ pa pě mè̤tò̤ ya?

Běcǎ sǎcahtǐ sana̤ khòlṳ, pwe̤ǐlṳ plṳ̂dǒ bǎkû̌po̤ ta pa sò̌phlǒ htǒo ta pa mî̌ Cǒmara a phû̌mǔphû̌khû toǒ, hǐnuhǒ. Khònò̤htǒo pa dè htû aphû̌ali̤ dě a ǐ pa a ta̤howi̤ û̌cata̤bî̌ htě a bè̌wǒ bǎ panu toǒ pě. A ǐ ta̤howi̤ ta aphû̌ali̤ toǒ to nî̤bǎnu toǒ pě. Htohǒtò̤ û̌cata̤bî̌ htě a měgle tûjûpwa̤ htǒo pa nî̤bǎpo̤ kû̌ta Khrî̌stu pě. Pa dè khòjîkhòjû plǒhtukû̌ ta Khrî̌stu hî̌dě pa nî̤bǎ plǒhtukû̌ ta̤sîrîdû̌htû ta a pě.

Ma̤tè̤hî̌dě, kòyò htě a gènè̤ còcè̌pwǎ na̤klûphěyî̌ a ta̤sò̌yṳ phû̌mò̤shî̌hto toǒnu, a htûhtò̌ pwa̤ htě a sò̌khě Cǒmara. Ma̤tè̤hî̌dě a jûle̤phî̌yo̤ kû̌nǒ Cǒmara a ta̤sû̌ta̤tòwò dǐkhò̌꤮ tò̤. A jû꤮ mî̌ a jûle̤phî̌yo̤ bò̌kû̌nǒ tò̤tò̤.

Cǒmara bǒlò̤ lǒ̤꤮ bò sǒmî̌wû̌, ta̤phû̌ta̤li̤ ta kòyò pṳ̂̌꤮ tapwa̤ htǒonu, a sò̌phlǒ ǒyṳ̂ kè̌shuǐshû̌ na̤cè̌ ta Cǒmara dǔlṳhtò̌ a phû̌mǔphû̌khû toǒ pě.

Pa sî̌yabò ta̤bǒlò̤ htǒotoǒnu, a kookasha ǐbò ata̤sha htě asǒsǒta mamǔ phû̌ǒ phusha dě a yi̤kǒnu pě. A kookasha to̤ lǒkhope khònò̤.