Ihāia 61 - 인기 성경 구절

공유

Kei runga i ahau te Wairua o te Ariki, o Ihowā; nā Ihowā nei hoki ahau i whakawahi hei kauwhau i te rongo pai ki te hunga māhaki. Kua ungā mai ahau e ia ki te takai i te hunga ngākau marū, ki te kauwhau ki ngā whakarau kia haere noa, ki ngā herehere, kua tuwhera te whare herehere; kia karangatia te tau manako mai o Ihowā, te rā rapu utu o tō tātou Atua; kia whakamārietia te hunga katoa e tangi ana; kia whakatakotoria he tikanga mō te hunga katoa o Hiona e tangi ana, kia whakaputaia kētia ō rātou pungarehu hei ātaahua, te tangihanga, hei hinu koa, te wairua pōuri hei kākahu whakamoemiti; ā, ka kīia rātou he rākau nā te tika, he mea whakatō nā Ihowā, kia whai korōria ai ia.

Mō tō koutou whakamā e rua ngā whakautu; mō te numinumi kau ka koa rātou ki tā rātou wāhi; āe rā, i tō rātou whenua ka haere rua mai ngā mea mā rātou, ka mau tonu hoki tō rātou koa.

Ka nui tōku koa ki a Ihowā, ka whakamanamana tōku wairua ki tōku Atua. Kua whakakākahuria hoki ahau e ia ki ngā kākahu o te whakaoranga, ropia mai ana e ia te tika ki ahau hei koroka; ka rite ki tā te tāne mārena hou e kōpare nei i te whakapaipai ki a ia, ki tā te wahine mārena hou whakapaipai i a ia ki āna mea whakapaipai.

Ka hangā anō e rātou ngā wāhi kua ururuatia noatia ake, ka ara i a rātou ngā wāhi kua kore rawa i mua, ka whakahoutia e rātou ngā pā kua ururuatia, ngā mea kua kore i ērā whakatupuranga noa atu.

Ka rite hoki ki tā te whenua e mea nei i tōna tupu kia kōkiri ake, ki tā te kāri e mea nei i ngā mea kua whakatōkia ki reira kia tupu, ka pēnā anō tā te Ariki, tā Ihowā, ka meinga e ia te tika me te whakamoemiti kia tupu ki te aroaro o ngā iwi katoa.

Ko koutou ia ka kīia ko ngā tohunga a Ihowā, ka kīia koutou ko ngā minita a tō tātou Atua; ko ngā taonga o ngā tauiwi hei kai mā koutou, ko tō rātou korōria hei whakamanamana mā koutou.

“E aroha ana hoki ahau, a Ihowā, ki te whakawā, e kino ana ki te pāhua, ki te whakahaere hē. Ka hoatu anō e ahau i runga i te pono tā rātou i mahi ai, ka whakaritea he kawenata mau tonu ki a rātou.