Yohane 9
9
Yesu komhonya imunu iyelekighwe chifita
1Yesu hayang'ali yoluta, kamwona munu chifita kulawa ukwelekighwa kwake. 2Wanafunzi wake wamghutsa, “Mlangulitsi, yuhi iyatendile nzambi, mbaka imunu ayuno yelekighwe chifita, imunu ayuno au iwamweleke?”
3Yesu kawedika, “Si imunu ayuno, wala iwamweleke baye iwatendile nzambi, lekeni ilawila apfino ili tsisang'ano tsa Imlungu tsoneke mna ugima wake. 4Twobamighwa kusang'ana tsing'onde tsa ayula iyanitumile hakung'ali misi. Chilo chakutsa ng'akutsakuwa na munu iyodaha kusang'ana baye. 5Hanili muisi, nene na ghumwanga ghwa isi.”
6Hayamalitse ukulonga apfo, kabwalula ghamate mna lidongo, kapfulugha kododo kwa ghamate aghala, kambaka ichifita mna tsinenge, 7kamlongela, “Ghenda ukehopfughe kuna litsimbu lya Siloamu” (Siloamu mana yake “Iyatumighwe”). Apfo imunu ayula koka kaghenda kwihopfugha, kuya koya aku kakona.
8Iwanu iwang'ali wokala naye habehi, na iwanu iwamwonile hayang'ali yolomba weghutsa, “Apfi ayuno si imunu ayula iyang'ali yolomba baye?”
9Wamwenga walonga, “Ayuno yeye,” wangi walonga, “Ayuno si yeye baye, ila keghala naye.” Lekeni imwenyegho kalonga, “Nene yuyo yaning'ali nilomba.”
10Apfo wamghutsa, “Apfi tsinenge tsako tsifumbulighwetsa?”
11Naye kawedika, “Imunu ayula iyokemighwa Yesu kapfulugha kododo kanibakatsa mna tsinenge, kanilongela nighende Siloamu nikanawe. Apfo nighenda, ninawa, na baho nidaha ukwona.”
12Wamghutsa, “Yalikwani imunu ayo?”
Kawedika, “himanye.”
Mafarisayo womghutsa imunu iyahonyighwe
13Kuya wamghala kwa Mafarisayo imunu ayula iyakalile chifita aho mwanduso. 14Na litsuwa alila Yesu hayapfulughe likododo na kumhonya imunu chifita tsalikala Litsuwa lya Sabato. 15Apfo Mafarisayo nawo wamghutsa imunu ayo pfayadahile ukwona. Naye kawalongela, “Kanibakatsa kododo mna tsienge tsangu, ninawa, na sambi nakwona.”
16Mafarisayo wamwenga walonga, “Imunu ayuno ng'alawile kwa Imlungu baye, kwaapfila ng'olikinda baye Litsuwa lya Sabato.”
Lekeni wanu wangi waghutsa, “Apfi imunu yana tsinzambi yodahatse kutenda pfihulo kama apfino?” Apfo halawila mpfulughiko, weghola. 17Kuya wamghutsa keli imunu ayula chifita, “Ghweghwe umlongatse imunu ayo iyakuhonyile tsinenge?” Naye kawedika, “Kanabii.”
18Lekeni iwakulu wa Wayahudi ng'awatoghole baye ka imunu ayo tsachifita na kadaha ukwona, mbaka wawakema aba na mai wa imunu ayo. 19Wawaghutsa, “Apfi ayuno yuyo imwanenu, yamlonga kelekighwa chifita, lelo yadahiletsa ukwona?” 20Aba wake na mai wake wawedika, “Twomanya kama ayuno mwanetu, na tsakelekighwa chifita, 21lekeni pfayadahile ukwona ng'atummanyile baye, wala imunu iyamhonyile tsinenge twetwe ng'atummanyile ka! Mghutseni yeye, ayu mbala mgima, kodaha kwilongela imwenyegho!” 22Aba wake na mai wake walonga apfo kwaapfila wang'ali wowapfuka iwakulu wa Wayahudi, kwaapfila tsawalonga munu wowose iyolonga kama Yesu yuyo Kiristu katsowingighwa mna lisinagogi. 23Kwa ajili ya alyo aba na mai wake walonga, “Ayu mbala mgima, mghutseni yeye.” 24Wamkema keli imunu ayo tsaiyakalile chipofu, wamlongela, “Mwing'e utunitso Imulungu, ulongese! Twetwe twomanya kama imunu ayuno iyakuhonyile kana nzambi.” 25Imunu ayo kawedika, “Kama imunu ayuno kana nzambi au kahela nzambi nene simanya ka!. Chinu chimwe chanimanya, tsanikala nachipofu, lekeni sambi nakona!” 26Kuya wamghutsa imunu ayo, “Angu yakutendele choni? Yakufumbuletsa tsinenge?”
27Imunu ayo kawedika, “Tsanimlongelani lekeni ng'amtegheletse baye. Heule mbama kuhulika keli? Pfihi namwe mwobama muwe wanafunzi wake?”
28Baho wamligha, walonga, “Ghweghwe kwa mwanafunzi wake imunu ayuno! Lekeni twetwe twa wanafunzi wa Musa! 29Twetwe twomanya kughwa Imlungu tsakalonga na Musa, lekeni imunu ayuno, ng'atumanyile baye kwayolawila kwani!” 30Imunu yula kawedika, “Leke baye, nene mwonikangawatsa! Ng'ammanyile baye kwani kwayolawila, aku nene kanihonya tsinenge! 31Twomanya ka Imulungu ng'omhulikitsa imunu yana inzambi baye, lekeni imunu iyompfuka na kutenda chayobama ayo komhulikitsa. 32Kulawa isi haiumbighwe ng'ana ilongighwe ka kuna munu wowose kamhonetsa imunu iyelekighwe chipofu. 33Tsa ka imunu ayuno ng'alawie kwa Imlungu, ng'abamile kudaha kusang'ana chochose baye!” 34Nawo wamwidika, “Ghweghwe kwelekighwa mna inzambi ghendo, udahatse kutulangulitsa twetwe?” Apfo wamuwinga kalawa kunze.
Upofu wa ghumoyo
35Yesu kahulika ka tsakawingighwa kunze, naye hayamwonile kamghutsa, “Pfihi ghweghwe kwomtoghola Imwana wa Imunu?” 36Imunu ayo kamghutsa, “Ghwemtwatsa, apfi imunu ayo nani? Nongele nimtoghole!” 37Yesu kamwidika, “Mala kumwona! Ayo yulonga naye ye yuyo.” 38Imunu ayo kamwidika, “Ghwemtwatsa, notoghola,” kuya kamwinamila.
39Yesu kalonga, “Nene nitsa muisi amno kwa ajili ya ukuhigha, ili awala iwali pfipofu wone, na awala iwakona wawe pfipofua.” 40Mafarisayo wangi iwakalile hamwse na Yesu wamhulika hayalongile apfo, wamghutsa, “Apfi kwolonga na twetwe twa pfipofu?” 41Yesu kawedika, “Mng'awile mwa pfipofu, ng'ambamile kuwa na nzambi baye; lekeni kwaapfila mwolonga mwakona, inzambi yenu yokala namwe.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yohane 9: LBV
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Pioneer Bible Translators and The Word For The World
Laghano Lya Sambi Kwe Iwanu Wose ಬಗ್ಗೆ ಇನ್ನಷ್ಟು ತಿಳಿಯಿರಿ
