Yohane 16

1“Yesu kaghendelela kulonga, “Niwalongela aghano ghose ili mleke ukumlema Imlungu. 2Mtsowingighwa mna ghamasinagogi; na ichipindi chakutsa chila mnu iyatsowakoma katsofikitsa komlapfila nambiko Imlungu. 3Na iwanu watsomtendelani aghano kwaapfila ng'awammanyile Baba wala nene. 4Lekeni nimlongelani aghano, ili ichipindi acho hachitsakutsa mkumbuke kuwa tsaniwalongela.

Ing'onde ya Iloho Yelile

“Siwalongele aghano kulawa mwanduso kwaapfila tsanahamwe namwe.

5“Lekeni sambi nene noghenda kwa ayula iyanitumile, na haduhu munu iyonighutsa, ‘Ughenda kwani?’ 6Ila kwaapfila niwalongela aghano, imimoyo yenu imema ihutsuni. 7Lekeni nowalongela kweli ghendo, pfinogha kuna mwemwe nene mbuke, kwaapfila kama sikuka baye, Imwapfitsi ng'atsomtsilani baye. Lekeni ning'oka, ayo nitsomghalilani. 8Naye hayatsakutsa, katsohindaghitsa kuna imimoyo ya iwanu wa isi kwa tsimbuli tsa inzambi, na tsimbuli tsa ukutenda ihaki, na tsimbuli tsa ukuhigha kwa Imlungu. 9Mna tsimbuli tsa inzambi, kwaapfila ng'awonitoghola nene baye; 10Mna tsimbuli tsa ihaki, kwaapfila nene noghenda kwa Baba, wala ng'ammbona keli baye, 11na mna tsimbuli tsa ukuhigha, kwaapfila imkulu wa isi aino mala kahighighwa.

12“Hata sambi ning'ali na mbuli nyingi tsa kumlongelani, lekeni ng'amdaha kutsidudumila baye. 13Lekeni hayatsakutsa Iloho wa kweli, yeye katsowalongotsa muumanye ukweli wose; kwa apfila ng'atsolonga ighali ghake imwenyegho baye, ila katsolonga aghala ghayohulika; na aghala ighakutsa nagho katsowalongela. 14Yeye katsonitunya nene, kwaapfila katsosola mna ighali ghangu na kuwalongela mwemwe. 15Ghose ghayali nagho Baba ghakwangu. Acho chicho ichinitendile niwalongele, ' katsosola mna ighali ghangu na kuwalongela mwemwe'.

Hutsuni na Ndeng'elelo

16“Ching'ali chipindi chidodo ng'amtsombona baye, kuya chipindi chidodo keli hambele mtsombona.”

17Wangi mna iwanafunzi wake weghutsa, “Angu mbuli yachi aino iyolonga, “Ching'ali chipindi chidodo ng'amtsombona baye, kuya chipindi chidodo keli hambele mtsombona?” Na lingi, ‘Kwaapfila noghenda kwa Baba?’ 18Waghendelela kwighutsa, “Mana yake choni hayolonga, 'Ching'ali chipindi chidodo’? Ng'atumanya baye yolonga mbuli yachi.”

19Yesu kamanya kuwa wabama kumghutsa, apfo kawalongela, “Pfihi mweghutsa tsamana yangu choni hanilongile, ‘Ching'ali chipindi chidodo ng'amtsombona keli, kuya chipindi chidodo keli hambele mtsombona’? 20Nowalongela kweli ghendo, mwemwe mtsolila na kudomboketsa, lekeni isi itsodeng'elela. Mwemwe mtsohutsunika, lekeni ihutsuni yenu itsoghaluka kuwa ndeng'elelo. 21Ipinga hayakweleka, kana hutsuni kwaapfila ichipindi chake cha ukudununzika chipfika, lekeni imwana yang'oneka, ng'okumbuka keli baye akula ukudununzika, kwa ajili ya indeng'elelo iyali nayo kwaapfila mwana koneka muisi. 22Na mwemwe pfipfila, sambi apfino mna hutsuni, lekeni nitsomwonani keli, namwe mtsodeng'elela, na indeng'elelo yenu kuduhu imunu iyodaha kuwaboka.

23“Na mna litsuwa alyo ng'amtsonilomba chinu chochose baye. Nowalongela ghendo, chinu chochose chamumlomba Baba katsomwing'ani kwa litaghwa lyangu. 24Mbaka sambi ng'amna mlombe chinu chochose baye kwa litaghwa lyangu. Lelo mlombe, namwe mtsobokela, ili indeng'elo yenu iwe ng'ulu ghendo.

Yesu kaihuma isi

25“Aghano nimlongelani kwa mitsungu, lekeni ichipindi chakutsa sitsolonga namwe kwa mitsungu baye, ila nitsolonga namwe mwatsimwatsi tsimbuli tsa Aba wangu. 26Mna litsuwa alyo mtsolomba kwa litaghwa lyangu, wala siwalongela kuwa nene nitsowalombela kwa Baba; 27mana Baba imwenyegho komkundani, kwaapfila mwemwe mnikunda nene na mtoghola kuwa nilawa kwa Imlungu. 28Nilawa kwa Baba, nitsa muisi; kuya noileka isi, nakuya kwa Baba.”

29Kuya iwanafunzi wake walonga, “Afatsali, sambi lelo kolonga mwatsimwatsi, bila mitsungu. 30Lelo twomanya kama ghweghwe kwomanya ghose, wala ng'ubama mbaka munu yakughutse baye. Ichinu achino chotutenda tutoghole kama ghweghwe kulawa kwa Imlungu.”

31Yesu kawedika, “Pfihi sambi mwotoghola?” 32Mlole, chipindi chakutsa, na tiyari chipfika, mwemwe wose mtsopwililika, chila munu kakuka ukaye yake, na nene mtsonileka niliyeka. Lekeni siliyeka baye, kwaapfila Baba kahamwe na nene. 33“Nimlongelani aghano ili mkale tseghamba mghati mwangu. Muisi aino mtsodununzika; lekeni mwighangamitse, nene niihuma isi.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Yohane 16: LBV

ಹೈಲೈಟ್ ಮಾಡಿ

ಕಾಪಿ

ತಾಳೆಮಾಡಿ

ಹಂಚಿಕೊಳ್ಳಿ