Yohane 11
11
Lifwa lya Lazaro
1Lelo munu yumwe iyakemighwe Lazaro tsamtamu. Ayo yang'ali yokala Betaniya, kaye yake Mariya na dada yake Marita. 2Mariya ayuno tsakakala yuyula iyambakile Imndewa ghamafuta ighonung'ila mmaghulu, na kughabaghusa kwa tsimvili tsake, yuyo ilumbu wake Lazaro iyakalile mtamu. 3Apfo lumbu tsake wamtumila Yesu usenga, “Ghwe Mndewa, sale yako yumkunda koghula.” 4Yesu hayahulike apfi, kalonga, “Utamu auno si wa lifwa baye, ila ulawila kwa ajili ya utunitso wa Imlungu, ili Imwana wa Imlungu yatunitsighwe kubitila utamu auno.” 5Naye Yesu tsakawakunda Marita, na lumbu lyake, na Lazaro. 6Yesu hayahulike Lazaro koghula, kongetsa matsuwa meli gha ukukala ahala hayakalile. 7Kuya Yesu kawalongela wanafunzi wake, “Tukeni keli Yudeya.” 8Wanafunzi wake wamlongela, “Mlangulitsi, matsuwa chidogho ighabitile wapfilongotsi wa Wayahudi wang'ali wobama wakutowe na ghamabwe, heule ubama ughende ako keli?”
9Yesu kawedika, “Apfi imisi ng'aina masaa kumi na meli baye? Munu yang'anga nemisi ng'ekwala baye kwa apfila koghwona ghumwanga ghwa isi aino. 10Lekeni imunu yang'anga nechilo kekwala, kwa apfila kahela mwanga mghati mwake.” 11Kaghalonga agho, kuya kaghendelela kuwalongela, “Sale yetu Lazaro kawasa, lekeni nene noghenda nikamlamse.”
12Wanafunzi wake wamwidika, “Ghwemtwatsa, kama kawasa, katsohona.” 13Lekeni Yesu tsayang'ali yolonga imbuli ya ukufa kwa Lazaro, ila wawo wafikitsa kolonga imbuli ya ukuwasa tsinongo. 14Apfo lelo Yesu kawalongela mwatsimwatsi ghendo, “Lazaro kafa, 15lekeni kwaajili yenu nodeng'elela, kwaapfila sikalile kuko baye, ili mwemwe mtoghole. Lelo tukeni tumghendele.” 16Kuya Tomasi, iyakemighwe Basa, kawalongela wanafunzi wayaghe, “Na twetwe tukeni, ili tukafe hamwe naye.”
Yesu yuyo utsihiluko na ugima
17Yesu hayapfikile ako, kampfika Lazaro mala katsikighwa mkabuli matsuwa mane ighalutile. 18Ichijiji cha Betaniya tsachikala habehi na Yerusalemu, utali kama wa maili mbili; 19na Wayahudi wengi tsawatsa kuwakanza Marita na Mariya kwa ukufa kwa indughu yawo. 20Marita hayahulike Yesu kakutsa, kaghenda kunze kwitingana na Yesu, lekeni Mariya tsakasighala mng'anda. 21Marita kamlongela Yesu, “Ghwemtwatsa, ka ung'awile ahano, lumbu lyangu tsang'abamile kufa baye! 22Lekeni nomanya, hata sambi, ka chochose chaumlomba Imlungu katsokwing'a.”
23Yesu kamlongela, “Lumbu lyako katsotsihiluka.”
24Marita kamwidika, “Nomanya ka katsotsihiluka mna utsihiluko wa iwafile litsuwa lya utsighilo.”
25Yesu kamlongela, “Nene yuyo utsihiluko na ugima. Imunu iyonitoghola nene, hata yang'afa katsakuwa na ugima keli, 26na imunu wowose iyali mgima na kunitoghola nene ng'atsakufa ghendo baye. Pfihi alyo kwotoghola?” 27Marita kamwidika, “Ona, Ghwemtwatsa! Notoghola ka ghweghwe kwa Kiristu, Imwana wa Imlungu, ayula iyakutsa muisi.”
Yesu komlilila Lazaro
28Marita hayamalitse ukulonga apfo, kaghenda kamkema Mariya hawaliyeka, kamlongela, “Imlangulitsi kabaha, kokukema.” 29Mariya hayahulike alyo, kenuka himahima kamghendela Yesu. 30Naye Yesu kakala ng'ana yapfike mkaye baye, ila tsayang'ali bahala hayetingane na Marita. 31Wayahudi awala iwakalile mng'anda womkanza Mariya, hawamwonile Mariya kenuka himahima na kulawa kunze wamuwinza, wafikitsa yang'ali yoghenda kuna likabuli yakalile. 32Mariya hayapfikile hanu hayali Yesu na hayamwonile, keghwisa imwenyegho hana ghamaghulu ghake, kamlongela, “Ghwemtwatsa, ka ung'awile baha, lumbu lyangu ng'abamile yafe baye!” 33Yesu hayamwonile Mariya kolila, na Wayahudi iwatsile na Mariya nawo wolila, iloho yake ihutsunika na kaghanzika mmoyo mwwake. 34Yesu kawaghutsa, “Angu mmwikile kwani?”
Wamwidika, “Ghwemtwatsa, itsa ulole.”
35Yesu kalila. 36Kuya Wayahudi walonga, “Loleni pfayamkundile!”
37Lekeni wanu wangi welongela, “Ayula iyamhonyile imunu chipofu, ng'adahile pfihi ukumtenda na ayuno yaleke ukufa?”
Yesu komtsihilula Lazaro
38Yesu, aku koghanzika keli mna ghumoyo ghwake, kaghenda mbaka kuna likabuli. Likabuli alyo tsalikala pango lidiwiighwe na libwe. 39Yesu kawalaghitsa, “Lighubuleni libwe!” Marita, lumbu wa imunu iyafile kamwidika, “Ghwemtwatsa, ng'ambe konung'a! Mana tangu hayatsikighwe leloli tsuwa lya kane.”
40Yesu kamlongela, “Pfihi sikulongele baye ka ung'atoghola kutsakwona utunitso wa Imlungu?” 41Apfo walighubula libwe. Kuya Yesu kenula tsinenge kalola kuchanya kalonga, “Baba, nolonga mighede kwaapfila kunihulika. 42Nomanya kuwa ghweghwe matsuwa ghose konihulika, lekeni nilonga apfino kwaajili ya iwanu iwemile ahano, ili watoghole ka ghweghwe kunituma.” 43Hayamalitse ukulonga apfino, kakemelela kwa litsi kulu, “Lazaro, utse akuno kunze!” 44Naye imunu ayula iyafile kalawa kunze, ghamoko na ghamaghulu ghake ghohighwa na isanda, na ichihanga chake chohighwa na chitambala.
Yesu kawalongela, “Mdoholeni mumleke yoke.”
Wayahudi wobama kumkoma Yesu
(Mat 26:1-5; Malk 14:1-2; Luk 22:1-2)
45Apfo Wayahudi wengi iwaghendile kumwangila Mariya, na kughona aghala ghayatendile Yesu, wamtoghola. 46Lekeni wanu wangi waghenda kwa Mafarisayo wawalongela aghala ghayatendile Yesu. 47Kuya Mafarisayo na iwatambika wakulu wakema mtingano ghwa Libalatsa lya Wayahudi, weghutsa, “Tutendatse lelo? Imunu ayuno kotenda miujitsa mingi. 48Tung'amleka yaghendelele, iwanu wose watsomtoghola, kuya iwakulu wa Waroma watsakutsa kusola Ing'anda yetu ya ukulombela na litaifa lyetu.”
49Kuya yumwe wawo, iyakemighwe Kayafa, iyakalile Mtambika mkulu wa ghumwaka aghula, kalonga, “Mwemwe mwawabotsi! 50Apfi ng'ammanyile baye ka afatsali munu yumwe yafe kwaajili ya iwanu, kuliko litaifa lyose lihinyighwe?” 51Lekeni tsag'alongile alyo kwa kubama imwenyegho baye, ila kwaapfila tsakakala mtambika mkulu mna ghumwaka aghula, katabili kama Yesu katsakufa kwaajili ya litaifa alyo, 52wala si kwaajili ya litaifa alyo liliyeka baye, ila pfipfila kuwaghala hanu hamwe iwana wa Imlungu iwapwililike wawe wamwe. 53Apfo kulawa litsuwa alila iwakulu wa Wayahudi weka mipango ya kumkoma. 54Apfo Yesu ng'aghendile mwatsimwatsi baye haghati ha iwanu wa Yudeya, ila kalawa ako kaghenda habehi na kunyika, kuna ichijiji ichikemighwe Efuraimu, kakala kuko na wanafunzi wake.
55Ichihungo cha pasaka ya Wayahudi hachipfikile habehi, wanu wengi wagheluka Yerusalemu ili wadeghesighwe ng'ana Ipasaka ipfike. 56Wang'ali wombama Yesu, na hawemile mna lihekalu wang'ali weghutsa, “Mkwonatse? Apfi ng'atsakutsa baye kuna lchihungo?” 57Lekeni iwatambika wakulu na Mafarisayo walapfa laghitso munu wowose iyomanya kwayali Yesu, yalonge, ili wamghoghe.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yohane 11: LBV
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Pioneer Bible Translators and The Word For The World
Laghano Lya Sambi Kwe Iwanu Wose ಬಗ್ಗೆ ಇನ್ನಷ್ಟು ತಿಳಿಯಿರಿ
