Maruko 1
1
palenak za vati na semasuwap i Yohanē
(Matay 3.1-12; Luka 3.1-18; Yohanē 1.19-28)
1Alrak na Viruwa i itras#1.1 ulra pidaya na awatranan lulun iniyan za <<Alrak na Viruwa i itras>>., i Yēsu Kiristo tu fukuing maw kemani kemirakaz. 2na patralritralri i Isaya kazu kanantu valray venavalray:
marengay na Viruwa i itras:
na'uwi a, pakarun ku kananku pakarunan;
kazu i ngawayan kannu i intaw, pudalan kannu.
3ulra a trau 'emuway'uy marengay i alalas:
muramawan kani Luzu penadang kanantu dadalan,
temulre'ay papatezelr nantu kakawangan na dalan!
4tatena' kemazu, mupana i alalas i Yohanē, semasuwap kana trau, pawnung palenak venavati#1.4 <<tatena' kemazu, mupana i alalas i Yohanē, semasuwap kana trau, pawnung palenak venavati>> ulra pidaya na awatranan lulun vinavalray za <<na semasuwap i Yohanē tatena' kemazu mupana i alalas, palenak venavati>>.: <<uwasalr pakavekal i inmu, kisuwap, na Viruwa i itras lalapus kananmu pinamelriyan.>> 5na zinekalranan kemay i Yodaya makaiyaiyan zi peniya i Yērusalem zuwa kani Yohanē i ngawayan. pakanumaw kanantu pinamelriyan nazu; zi i Yohanē kazu i Yorudan kana zinanuman semuwap kanazu.
6i Yohanē mikavang kana humulr na rakuda, milunain za kalritr; na inaekan maw na kakeras zi na kawalruwan. 7marengay pakalrazam i intaw: <<na zazuwa i likuzan kaninku izu na sasa mu maraayawayawan kaninku lra za sazu, arusay nu mihenuhun ku melapus kanantu kuse mu 'azi ku kirepa'uwa. 8ku suwapay mu za zanum, mawmu tu i suwapay mu za Vangesar Lu'em i intaw.>>
i Yēsu kisuwap zi kilralrimaw
(Matay 3.13--4.11; Luka 3.21-22; 4.1-13)
9melavat za 'azi sawariyan, i Yēsu zuwa kemay i Galili i Nazalē, i Yohanē kazu i Yorudan kana zinanuman semuwap kantaw. 10i Yēsu kemay kana zanum mukaitrasan mu mena'u za mutruwalr lra na lingatr, na Vangesar Lu'em kamawan kana tutur mulusu kazu kanantu zazek. 11ulra a lrengaw kemay i itras mulusu, marengay: <<ninku kinalraman na Alrak i inu, misaharan ku kannu.>>
12na Vangesar Lu'em payas hemelrahelr kani Yēsu mukuwa i alalas. 13i intaw kazu i kazu za makapetelr wariyan, kilralrimaw kana satang; kazu kurekasa kana dobuc i alalas, mawmu ulra na tēnsi temara kantaw.
i Yēsu demaulr kana apat na kiyavulraw
(Matay 4.12-22; Luka 4.14-15; 5.1-11)
14a muimeng i Yohanē i likuzan mu, i Yēsu mukuwa i Galili, venavati palenak kanantu fukuing na Viruwa i itras. 15marengay i intaw: <<penauwa lra na wari, uri ula'esi lra tu kanatal na Viruwa i itras! uwasalr pakavekal i inmu, pakutatena' miturus kana fukuing.>>
16i Yēsu kemakawang makangaydiran i Galili kana danaw, mena'u za zazuwa na kivavulraw kazu kana danaw i itras temavukulr, maw i Simon zi i waditaw na ma'inayan i Antēlē. 17marengay i Yēsu kanazu: <<alamu kurelrang kaninku! ku kamawanaw mu kana kivavulraw za aelak za trau.>> 18payas meretra' kana tavukulr nazu, kurelrang lra kani Yēsu.
19masalr kemakawang za 'azi adawilr, i Yēsu mena'u kanantu alrak ni Zēbēdē i Yakob zi i waditaw na ma'inayan i Yohanē; kazu i itras kana tamina temuwalre'ay kana tavukulr. 20i Yēsu a demaulr kanazu, zi tu vilinaw i temamataw zi nantu pakarunan i itras kana tamina nazu, kurelrang lra kani Yēsu.
a sasa na kipalrar na trau
(Luka 4.31-37)
21zuwa kana kazekalran i Kabēnum nazu; a meredek na katalaulepan na wari, i Yēsu musavak i waazukan ruma' panadam kana trau. 22na kinger kanantu ipanadam ni Yēsu na trau ziya mu salaw maherareher, 'alrana tu ipanadam mu salaw mikezang, 'azi maresan kanantu sinsi kana Sēsiyo.
23a azu mu, i waazukan ruma' i savak ulra a sasa kipalrar na trau, 'emuy'uy marengay i intaw: 24<<na Nazalē i Yēsu, kemuda zi meraringiz u kaniyam? zuwa u tremepuwa kaniyam ziyamaw? malrazam ku za i eman u; maw u na kinavangesar kana Viruwa i itras!>>
25semeratr i Yēsu kana palrar: <<apapeng, kadika upana kemay kanantu zazek kanini na trau!>>
26na palrar tu pararutrengaw pakirev izu na trau, tamuni 'emuy'uy, zi muveruk kanizu na trau. 27pasalaw maherareher mapiya, zi mazayazayar marengay: <<kemuda ini na lremak awa? tatena' za 'azi ziyan mikiningeran na pauwayan! maruwaruwa i intaw mikezang demikes kana palrar, zi na palrar mukinger kantaw!>>
28kemazu mu, tu ngadan ni Yēsu dika mupalenak lra kani Galili na pinidare'an.
i Yēsu paka'inava za kazuwan na kuwaaleng na trau
(Matay 8.14-17; Luka 4.38-41)
29muveruk kana waazukan ruma' nazu, mukuwa kanantu ruma' ni Simon zi i Antēlē; zi marelrang mukuwa i Yakob zi i Yohanē. 30penauwa zemelretr i tainataw tu 'azin ni Simon, mi'ezeng i sa'esa'; a meredek i Yēsu, zi marengay kanantu kuwalengan kani Yēsu nazu. 31i Yēsu mukuwa mena'uwa kantaw, kemezeng kanantu lima, paparahan kantaw. zi mulusu lra tu vi'asan, kemazu zi marahan temara kanazu.
32a karaurauv, a muwatenep na kadaw mu, ulra kazuwan na trau tu pilralrangaw na mikuwalengan ziya zi na kipalrar na trau mukuwa kani Yēsu i ngawayan; 33na zinekalranan mapiya i kazekalran mu zuwa lra, muwazuk kana sulray i ngawayan. 34i Yēsu paka'inava kana kazuwan na mikuwalengan za marekamelrimelri na trau, zi venawi za sazu na palrar. 'azi paparengay kana palrar, 'alrana malrazam nazu za maw i eman i intaw.
palenak za vati i Galili
(Luka 4.42-44)
35kazuwa wari a semavalr, 'azi ziyan 'idenan, zi marahan i Yēsu, muwaday kana ruma', mukuwa za saya a mudawilr na kinazuwan, kazu i kazu kiyanun. 36i Simon zi nantu lralrang mupatraran mukuwa miya'a kantaw; 37atrevung lra, zi marengay nazu: <<maaya' mapapiya kannu!>>
38marengay i Yēsu: <<kayta i dalrep kana zekalr a, zi 'azi ku ka'azi kazu kanazu na kinazuwan palenak za vati, 'alrana maw ini nanku iyazuwa tu pauwayan.>>
39kemazu mu, i Yēsu paketrepay kemakawang i Galili, kazu kana saya saya na waazukan ruma' palenak za vati, pawnung venawi kana palrar.
i Yēsu paka'inava kana malripay na trau
(Matay 8.1-4; Luka 5.12-16)
40ulra a sasa malripay na trau zuwa kani Yēsu i ngawayan, malrituzu kiyami kantaw, marengay: <<nu muwai u mu, maruwa u pakakirungetr kaninku.>>
41i Yēsu purelraman lra i anger#1.41 <<purelraman i anger>> zuma ulra pidaya na awatranan lulun vinavalray za <<salaw 'ilremes tu anger>>., pupana za lima demikes kantaw, marengay: <<muwai ku, mukirungetr u lra!>> 42na lripay i zazek kantaw mu payas muwaday kantaw, mukirungetr lra i intaw. 43i Yēsu payas puveruk kantaw, zi kemaaluzun temuru, 44marengay: <<amanan marengay kana trau ziyan; parepayas uwa kirepana'u kana rahan, pakinsayu kantaw, zi iturusi nantu kuret ni Mosē semunan patavang, uwasay kana trau za mukirungetr u lra.>>
45mawmu a mupatraran ini na trau mu, marengay makaiyaiyan ziya kanini na lremak, kemazu ziyanay i Yēsu 'azi lra maruwa musavak i kazekalran, kemazu lra kazu i panayan kana kazekalran za mudawilr a kinazuwan; na zinekalranan kemazu 'azi mamelri kemay iyaiyan zuwa miya'a kantaw.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Maruko 1: TPN
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© The Bible Society in Taiwan, 2023
