Къанун 19
19
Лъутуншагьарал
(Тар. 35:6-34; Къан. 4:41-43; Егьош. 20:1-9)
1БЕТӀЕРГЬАН Аллагьас нужее кьолеб бугеб ракьалдаса халкъалги нахъе къотӀараб, нужеца гьеб ракьги кверде босараб ва гьезул шагьараздеги минабаздеги нуж рахъараб мехалъ, 2-3гьеб БЕТӀЕРГЬАН Аллагьас нужее кьураб ракь лъабиде бикье ва щибаб бутӀаялда цо-цо шагьар тӀаса бище – кинабниги лъабго шагьар. Цинги гьел шагьаразухъе нух гьабе ва биччанте БЕТӀЕРГЬАН Аллагьас нужее кьураб ракьалда тохлъукье чи чӀварав инсан гьениве лъутизе.
4Лъидего рокьукълъи-ццин гьечӀого, тохлъукье чи чӀван вугони, гьединав чиясул ихтияр буго жиндирго гӀумру хвасар гьабизелъун гьел шагьаразде лъутизе. 5Масала, пуланав чи гьалмагъгун цадахъ рохьове цӀул гьабизе ун вугони, ва гьес цӀуладе хьвагӀараб гӀощтӀодаса тохлъукьего бортараб бегӀераб маххги щун гьесул гьалмагъ хвани, гьев чи гьеб лъабабго шагьаралъул цоялъуве лъутизе бегьула, жиндирго гӀумру цӀунизелъун. 6Амма гьеб шагьар цӀакъго рикӀкӀада бугони, къисас босулес гьесда хадувги гӀунтӀун, ццидакье гьев чӀвазе рес буго. Гьединав чийин абуни, чӀвазе мустахӀикъав гьечӀо, чӀварасдехун гьесул ццин букӀинчӀелъул. 7Гьединлъидалин дица дуда лъазабураб лъабго шагьар батӀа гьабеян.
8БЕТӀЕРГЬАН Аллагьас нужер умумузе рагӀи кьуна нужер ракьал гӀатӀид гьарилин. Нужер умумузе кьелин гьедарал ракьал Гьес нужее кьезе руго, 9жакъа дица загьир гьарурал Гьесул амраби мухӀканго тӀуразаруни, БЕТӀЕРГЬАН Аллагь нужее хиралъани ва Гьесул къануназда рекъараб гӀумруги гьабуни. Гьебмехалъ гьеб лъабабго шагьаралде тӀаде жеги лъабго шагьар тӀаса бище. 10Гьедин гьабе, БЕТӀЕРГЬАН Аллагьас нужее ирсалъе кьураб ракьалда гӀайибго гьечӀеб би гӀодобе тӀечӀого букӀине ва гьеб бидул гӀайибияллъун нужго ккечӀого рукӀине гӀоло.
11Амма лъицаниги гьалмагъасдехун ццинги рекӀелъ хьихьун, гьесие гъоркьчӀел гьабуни ва, тӀадги речӀчӀун гьевги чӀван, живго гьел шагьаразул цоялде лъутани, 12гьев чӀвадарухъанас гӀумру гьабулеб шагьаралъул кӀудияз гьесда хадур чагӀи ритӀизе ккола, гьев гьениса нахъе вачине. Цинги гьев кьезе ккола бидул къисас босулесул кверде, гьес чӀвазе вукӀине. 13Гьесда гурхӀуге. ГӀайиб гьечӀого гӀодобе тӀураб бидул мунагьалдаса ГӀизраил цӀуне, нужеего лъикӀ букӀине.
14Мадугьаласулгун бугеб гӀорхъи киданиги добегӀан цӀаге, щайгурелъул гьеб буго нужер умумуз лъураб, БЕТӀЕРГЬАН Аллагьас нужее кьурал ракьазул гӀорхъи.
НугӀзал
15Пуланав чияс гьабураб квешлъи-такъсиралъе диванханаялда хӀукму къотӀизе ккани, цохӀо чиясул нугӀлъи гӀоларо. Кинаб гӀайиб чиясде гӀунтӀизабулеб бугониги, гьеб тасдикъ гьабула кӀиго яги лъабго чиясул нугӀлъиялдалъун.
16Нагагь цониги чияс гьересияб нугӀлъиги гьабун, цогидав гӀайибиявлъун ккезавулев вугони, 17гьев кӀиявго чи БЕТӀЕРГЬАНАСДА цеве вачине ккола – гьенир ругел кашишзабазгун диванчагӀаз хӀукму къотӀизе. 18ДиванчагӀаз гьеб ишалъул мухӀканго цӀех-рех гьабизе ккола, ва гьев чияс, гьересияб нугӀлъиги гьабун, жиндирго халкъцоясда бугьтан лъун букӀин тӀатани, 19гьес цогидасе гьабизехъин букӀараб жо гьесие жиндиего гьабизе ккола. Гьединаб квешлъи нужедаго гьоркьоб биччаге. 20Гьеб рагӀидал киналго хӀинкъила ва тӀокӀалъ гьединаб хӀалихьалъи нужеда гьоркьоб лъицаниги гьабиларо. 21ГурхӀел гьабуге гьединав чиясда! ГӀумруялъухъ – гӀумру, бералъухъ – бер, гӀусалъухъ – гӀус, квералъухъ – квер, бохалъухъ – бох.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Къанун 19: АварАК
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© Институт перевода Библии, 2005-2023