Къанун 18
18
Кашишзабазеги левитазеги кьолеб хирияб садакъа
1ГӀизраилалда Левийил наслуялъе, ай кашишзабазегун левитазе ракьазул бутӀаги ирсги букӀине гьечӀо. Гьезул бутӀа буго БЕТӀЕРГЬАНАСЕ кьолел хириял садакъабигун къурбаназдаса; гьездасан букӀина гьезие квен-тӀех. 2Левийил къавмалъе вацазда гьоркьоб бутӀа гьечӀо, щайгурелъул Живго БЕТӀЕРГЬАН вуго гьезие ирсалъул бакӀалда, Гьесул амруялда рекъон.
3Гьале кашишзабазе кьезе кколеб бутӀа: халкъалъ къурбаналъе хъурабщинаб боцӀудасаги гӀиядасаги гьезул ратӀаги, бетӀер-кӀалги, кванирукъги. 4Гьединго хӀалухъеналъул – бугӀа-ролъул, чагъиралъул, зайтуналъул нахул – тӀоцересел бутӀабиги, гӀиял тӀоцебе къунцӀараб квасги. 5БЕТӀЕРГЬАН Аллагьас киналго къавмазда гьоркьоса цохӀо гьеллъидал тӀаса рищарал, гьелги гьезул наслабиги кидаго БЕТӀЕРГЬАНАСДА цере чӀун, Гьесие хъулухъалъе рукӀине.
6ГӀизраилазул кинаб букӀаниги шагьаралда гӀумру гьабун чӀарав левит, жиндиего бокьараб мехалда, БЕТӀЕРГЬАНАС тӀаса бищараб мукъадасаб бакӀалде гочине бегьула. 7Гьесул ихтияр буго, БЕТӀЕРГЬАНАСЕ хъулухъалъе чӀарал жиндирго вацал левиталго гӀадин, гьениб БЕТӀЕРГЬАН Аллагьасе хъулухъ гьабун вукӀине. 8Гьев левитасе гьесул вацазда бащадаб сурсат кьезе ккола, жиндирго умумузул ирс бичун щвараб буголъи гьесул батаниги.
БатӀиял халкъазул гӀадатал
9БЕТӀЕРГЬАН Аллагьас нужее кьолеб ракьалде щвараб мехалда, нужеца гьенир ругел халкъазул къабихӀал гӀадатал росизе бегьуларо. 10Къурбан-бакӀалда нужер васал яги ясал цӀадул къурбанлъун гьаруге ва сихӀручагӀиги, палихъабиги, балъголъи бицунел ва цоги гьелда релълъараб жо гьабулел чагӀиги нужеда гьоркьор рукӀине риччаге. 11Нужеда гьоркьор рукӀине бегьуларо инсанасул гӀакълу хисизабулел сихӀручагӀи яги хваразул рухӀал рачӀинарулел ва батӀи-батӀиял рухӀазда кӀалъалел чагӀи. 12Гьединал ишал гьарулев щивав чи БЕТӀЕРГЬАНАСЕ рихарав вуго; гьел хъубал ишал сабаблъунин БЕТӀЕРГЬАН Аллагьас дол халкъал нужер берзукьан нахъе къотӀулел ругел. 13БЕТӀЕРГЬАН Аллагьасда цере рацӀцӀадго рукӀа!
БЕТӀЕРГЬАНАСУЛ тӀадегӀанав авараг
14Нужеца нахъе гъезе ругел халкъаз палихъабазухъги балъголъи бицунел чагӀазухъги гӀин тӀамула, амма нужеде БЕТӀЕРГЬАН Аллагьасул амру гьединаб гьечӀо. 15БЕТӀЕРГЬАН Аллагьас, дунго гӀадин, нужедаго гьоркьоса авараг вахъинавизе вуго нужее. Гьесухъ гӀенекке! 16Хоривалда, жамагӀаталъул данделъиялда, нужеца БЕТӀЕРГЬАН Аллагьасда гьарун букӀиндал: „БЕТӀЕРГЬАН Аллагьасул гьаракь рагӀизеги гьаб кутакаб цӀа бихьизеги биччаге нижеда, гурони ниж хвезехъин руго“, – ян.
17Ва БЕТӀЕРГЬАНАС дида абуна: „Гьез гьедин гьарулеб букӀин лъикӀ буго. 18Дица гьезие, мунго гӀадин, гьезда гьоркьоса авараг кьела ва гьесул кӀалдиб лъела гьезда абизе кколеб жо. Гьес бицина гьезда Дица амру гьабунщинаб. 19Гьев аварагги гьоркьов ккун Дица загьир гьарурал рагӀабазухъ гӀенеккичӀев чи Дицаго тамихӀалде цӀала. 20Амма Дир цӀаралдасан Дица амру гьабичӀеб жо бицарав, ялъуни батӀияв аллагьасул цӀаралдасан кӀалъалев авараг чӀвазе ккола.
21Дуда ракӀалда ккезе бегьула: ‘Кин дида лъалеб БЕТӀЕРГЬАНАСУЛ рагӀи гьеб гуреблъи?’ – ян. 22БЕТӀЕРГЬАНАСУЛ цӀаралдасан абураб жо лъугьинчӀони ва гьес абухъе ккечӀони, гьеб БЕТӀЕРГЬАНАСУЛ рагӀи гуро. Жиндиего бокьараб бицунев авараг вуго гьев, гьесукьа хӀинкъуге.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Къанун 18: АварАК
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© Институт перевода Библии, 2005-2023