H'Rut 2
2
H'Rut dôñ dai, pŏ Ƀô-ôh tăm hua
1Naômi hmâo yŏng dơi gah kơi ñu mơ̆ng phung Êli-malêk, a iâo ƀŏ ñu Ƀô-ôh, ñu mơnuih bơdr̂ŏng dăp bŭt ñu hiam. 2Pah anŭn H'Rut sô̆n-sat Mô-ăp, ñu pơhiăp hr̂ŏm Naômi, ñu laĭ: «Kâo nao dôñ dai pơ hua r̂ăng hŏ,#2:2 Klơi juăt Israel br̂ơi mơnuih hin dăp môt sô̆n-sat pơkŏn, dôñ dai mơ̆ng hua r̂ăng. An Lêwi 19:9-10; Juăt 24:19. jơ̆ laĭ hmâo mơnuih pă pap-dr̂ap kâo, kâo ti dôñ tui klon ñu.» Nŭn Naômi laĭ: «Nao wŏ, nă.» 3Ñu nao dôñ dai tui klon môt yuă pơ hua, hua nŭn, phŏ djơ̆ hua Ƀô-ôh, phung Êli-malêk. 4Pah anŭn, klăp Ƀô-ôh ñu biă r̂ai mơ̆ng plơi Ƀêthlêhĕm, ñu pơhiăp hr̂ŏm môt yuă dai, ñu laĭ: «Br̂ơi Yêhôwa dŏ hr̂ŏm gô-ih!» Gơñu til glaĭ: «Br̂ơi Yêhôwa pha br̂ơi ih klơi nŭk-nua mơ̆n!»#An Phŭn 26:3, 24. 5Jr̂ŏng nŭn Ƀô-ôh, ñu kơña đahkơi wai-lăng môt yuă dai, ñu laĭ: «Mŏ ne nă lơi?»#2:5 Mŏ ne nă lơi? Lơ «Mŏ ne lơi khua ñu?» 6Pô wai-lăng til glaĭ: «Ñu sô̆n-sat Mô-ăp r̂ai hr̂ŏm Naômi mơ̆ng čal Mô-ăp. 7Ñu dueh mơ̆ng mơi: “Br̂ơi kâo dôñ jĕ ƀôt dai tui klon môt yuă hŏ.” Nŭn ñu r̂ai dŏ pơ hua ne mơ̆ng guah tơl kal ne, ñu bơdơi dŏ ben pơ dŭp ha ƀiă đơč.»
8Jr̂ŏng nŭn Ƀô-ôh pơhiăp hr̂ŏm H'Rut, ñu laĭ: «Hmĭ kâo hŏ, mŏ bia! Ih anăm biă đuĕ mơ̆ng hua ne nao dôñ pơ hua r̂ăng pơkŏn ôh. Dŏ jĕ hr̂ŏm môt đahmơi ngă buă kâo ne ho. 9Br̂ơi ih sem tui klon gơñu tăm hua ne đơč, kâo khă môt đahkơi bĭ br̂ơi gơñu tui pơki ih ôh. Tơl ih hao ia, nao ñŭm ia mơ̆ng čeh môt đahkơi sŏ čr̂oh nŭn hŏ.» 10Nŭn H'Rut bon kô̆p kŏ tơl pơ kơnah, ñu laĭ: «Kâo đahmơi sô̆n-sat pơkŏn, yĕt ih pap-dr̂ap wai-lăng kâo nĕ?» 11Nŭn Ƀô-ôh til glaĭ: «Kâo hmĭ r̂ăng r̂ă tơgr̂ư̆ buă ih ngă hr̂ŏm khma ih, gơi kơi ih djai. Ih đuĕ lôi mơ̆ng mĭ ma ih dăp lŏn-ia ih, r̂ai dŏ hr̂ŏm nă plơi lan ih bĭ juăt thâo mơ̆ng blŭng hlâo. 12Kâo dueh mơ̆ng Yêhôwa br̂ơi glaĭ buă ih ngă, br̂ơi ih tô̆ dr̂ăm bơni tôm-tĕč mơ̆ng Yêhôwa, Yang Israel, yua ih mŭt r̂ai kơđap gah yô̆ čăng ñu.» 13H'Rut, ñu laĭ: «Ơ khua, kâo bơni ih lô, yua ih pap-dr̂ap br̂ơi kâo.#2:13 Kâo bơni ih lô yua ih pap-dr̂ap br̂ơi kâo lơ «Kâo dueh mơ̆ng ih pap-dr̂ap br̂ơi kâo wŏ.» Wŏt kâo bĭ djơ̆ đahmơi hlŭn ih, ih dŏ hiăp hiam pơpô̆ bŭt-tai kâo hla ti đahmơi hlŭn ih mơ̆n.»
14Tơl mông ƀŏng huă, Ƀô-ôh pơhiăp hr̂ŏm H'Rut: «Ơ mŏ bia! Ih r̂ai ƀŏng nŭmpăng wŏ, br̂ơi ih čeo tăm ia săm ne.» Nŭn H'Rut, ñu dŏ ben gah môt yuă, Ƀô-ôh mă br̂aih a hna pha br̂ơi ñu, nŭn ñu ƀŏng tơl tr̂ơi, dŏ beh pơanah he mơ̆n. 15Pah H'Rut gŭ nao dôñ dŏng, Ƀô-ôh r̂ă br̂ơi môt đahkơi, ñu laĭ: «Br̂ơi ñu dôñ jĕ ƀôt dai ho, anăm laĭ ñu ôh, huĭ ñu mlâo. 16Ne dŏng, br̂ơi gô-ih suă dong dai pơanah tăm kơnă, čr̂oh br̂ơi ñu dôñ, anăm laĭ ñu ôh.»
17Ñu dôñ tăm hua nŭn, khă tơl jĕ klăm, jr̂ŏng nŭn ñu teh dai ôk ñu dôñ nŭn tơl biă br̂aih, ai-ñu hmâo ha i.#2:17 Ha i Hêbrơ laĭ «Ha Êpha,» br̂aih ha Êpha nŭn ai-ñu hmâo 13 kilô. 18Ñu tô̆ br̂aih ñu teh ba glaĭ pơ plơi, nŭn khma ñu ƀôh br̂aih nŭn, jr̂ŏng nŭn H'Rut mă đĭ br̂aih a hna beh mơ̆ng ñu ƀŏng, br̂ơi khma ñu. 19Khma ñu kơña: «R̂ơi ne ih dôñ dai pơ pă? Ƀon pă ih ngă buă? Kâo dueh mơ̆ng Yêhôwa pha br̂ơi pô hua nŭn klơi nŭk-nua, yua ñu pap-dr̂ap ih.» Nŭn ñu r̂ă br̂ơi khma ñu thâo mơ̆ng buă ñu ngă, ñu laĭ: «Đahkơi kâo ngă buă tăm hua nŭn, a iâo ƀŏ ñu Ƀô-ôh.» 20Naômi pơhiăp hr̂ŏm nă pơtâo ñu: «Br̂ơi Ƀô-ôh hmâo klơi nŭk-nua mơ̆ng Yêhôwa, yua ñu dŏ nŏng khăp-pap ngă hiam hr̂ŏm mơnuih hơdĭp, wŏt mơnuih djai he mơ̆n.»#An Lêwi 25:25. Naômi laĭ dŏng: «Ñu yŏng dơi jĕ ta, ñu găl song tô̆ ta.»#2:20 Naômi laĭ ñu găl song tô̆ ta ñu čiăng Ƀô-ôh song tô̆ kơnah ñu dăp r̂ăk-r̂em ñu hr̂ŏm nă pơtâo ñu mơ̆n. 21H'Rut sô̆n-sat Mô-ăp laĭ glaĭ: «Ñu pơhiăp hr̂ŏm kâo mơ̆n, ñu laĭ: “Br̂ơi ih dŏ hr̂ŏm môt đahmơi ngă buă kâo ne, khă tơl bih buă a yuă dai ƀơĭ.”» 22Naômi pơhiăp hr̂ŏm H'Rut nă pơtâo ñu: «Ô, hiam yơh nă, ih biă nao hr̂ŏm đahmơi ngă buă ñu, nŭn ih huai nao pơ hua r̂ăng pơkŏn dŏng, huĭ r̂ăng pơki ih.» 23Nŭn H'Rut dôñ dai jĕ môt đahmơi ngă buă Ƀô-ôh, khă tơl bih buă a yuă dai ôk dăp dai sali.#2:23 A yuă dai ôk dăp dai sali r̂ăng yuă dai ôk hlâo, dai sali dơdơi. A yuă dai dua nŭn, iă ti hmâo ha blan tŏng-kr̂ah. Pah anŭn ñu dŏ hr̂ŏm khma ñu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
H'Rut 2: JKB
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© 2024, Wycliffe Bible Translators, Inc.