Phŭn Blŭng 46
46
Bih-tih khŭl-khap sang-nŏ Yakô̆p nao pơ čal Êjĭp
1Jr̂ŏng nŭn Israel met-set bih-tih dr̂ăm-gơnăm ñu hmâo, nŭn ñu biă nao. Tơl ñu tr̂uh pơ ƀon Ƀie-sêƀa, nŭn ñu tô̆ čĭm-br̂ĭm ngă yang Ơi Adai, Yang ma ñu Isă.#An Phŭn 26:23-25. 2Mơ̆ng mlăm nŭn, Ơi Adai pơƀôh br̂ơi Israel, pah anŭn ñu pơhiăp laĭ: «Ơ Yakô̆p! Ơ Yakô̆p!» Yakô̆p til glaĭ: «Yĕt, Khua Yang? Kâo hmĭ boih.» 3Pah anŭn Ơi Adai laĭ: «Kâo Ơi Adai, Yang ma ih. Ih anăm huĭ ôh tr̂ŭn nao pơ čal Êjĭp,#An Phŭn 26:2. yua kâo ti ngă br̂ơi ih jr̂ŏng sô̆n-sat pr̂ŏng pơ anŭn.#An Phŭn 12:2. 4Kâo pô ti tr̂ŭn nao hr̂ŏm ih pơ čal Êjĭp. Dơdơi kơñ, kâo pô mơ̆n ti ba glaĭ ih dŏng.#An Phŭn 15:13-14. Tơl ih djai kơñ, ngan Yôsep yơh ti bloč br̂ơi săl ta ih.»
5Jr̂ŏng nŭn Yakô̆p biă mơ̆ng ƀon Ƀie-sêƀa. Môt nă Israel čơ ma gơñu,#46:5 Ma gơñu Hêbrơ laĭ «Yakô̆p ma gơñu.» dăp nă bơnai gơñu pô, mơ̆ng lơdeh seh Pharon br̂ơi r̂ai nŭn. 6Yakô̆p dăp bih-tih djuoi ñu nao pơ čal Êjĭp. Gơñu djă ba phung čĭm dăp bih-tih dr̂ăm-gơnăm gơñu hmâo mơ̆ng lŏn-ia Kanan, ba nao hr̂ŏm mơ̆n. 7Nĭng nŭn yơh, Yakô̆p djă ba nă đahkơi dăp nă đahmơi ñu, čo đahkơi dăp čo đahmơi ñu mơ̆n, bih-tih djuoi ñu nao hr̂ŏm ñu pơ čal Êjĭp soh yơh.
8Nă čo Israel tr̂ŭn nao pơ čal Êjĭp, Yakô̆p dăp môt nă đahkơi ñu, gơñu hmâo ƀŏ hla ne:
Ruƀên nă phŭn ñu. 9Nă đahkơi Ruƀên a iâo Hênô̆k, Palu, Hêsrô̆n, dăp Kơmi. 10Nă đahkơi Simien a iâo Yêmu-el, Yamin, Ôhăt, Yakĭn, Sôha, dăp Sôl. Gah Sôl, mĭ ñu đahmơi sô̆n-sat Kanan. 11Nă đahkơi Lêwi a iâo Kơsŭn, Kêhăt, dăp Mêrari. 12Nă đahkơi Yuđa a iâo Ơ, Ônăn, Sêla, Pêreh, dăp Sêrah (plai Ơ dăp Ônăn djai lôi mơ̆ng lŏn-ia Kanan). Nă đahkơi Pêreh a iâo Hêsrô̆n, dăp Hamŭl. 13Nă đahkơi Isakha a iâo Thôla, Puwa, Yôp,#46:13 Yôp hla hr̂ă mơ̆ng đim pơanah a čih laĭ «Yasô̆p.» An Yap 26:24; 1R̂oi 7:1. dăp Simrôn. 14Nă đahkơi Săpyulôn a iâo Sêrek, Êlôn, dăp Yaliel. 15Môt gơñu nŭn yơh nă đahkơi Lêa pơpôn br̂ơi Yakô̆p mơ̆ng ƀon Pađăn-ơram, dăp Đina nă đahmơi ñu mơ̆n. Bih-tih nă čo đahkơi dăp nă čo đahmơi ñu, hmâo klâo pluh klâo r̂ăng.
16Nă đahkơi Kat a iâo Sêphô̆n, Haki, Suni, Ehƀôn, Êri, Ơrôt, dăp Ơrêli. 17Nă đahkơi Êsơ a iâo Yimna, Yihwa, Yihwi, Ƀêrie, dăp Sêra adơi đahmơi gơñu. Nă đahkơi Ƀêrie a iâo Hêƀơ, dăp Malkiel. 18Môt gơñu nŭn yơh nă đahkơi Silpha, Silpha nŭn đahmơi hlŭn Laƀăn br̂ơi nao ngă hlŭn Lêa nă ñu. Bih-tih nă čo Silpha pơpôn br̂ơi Yakô̆p ne, hmâo pluh năm r̂ăng.
19Nă đahkơi Račel bơnai Yakô̆p a iâo Yôsep, dăp Ƀênyamin. 20Ahnăt pơpôn br̂ơi Yôsep nă đahkơi dua r̂ăng mơ̆ng čal Êjĭp, a iâo gơñu Manasê, dăp Êbraĕm. Ahnăt nă đahmơi Pôti-phêra, pô ngă yang mơ̆ng plơi Ôn.#An Phŭn 41:50-52. 21Nă đahkơi Ƀênyamin a iâo Ƀêla, Ƀêkơ, Ahƀêl, Kêra, Naman, Êhi, Ruh, Muphim, Huphim, dăp Ơt. 22Môt gơñu nŭn yơh nă čo Račel pơpôn br̂ơi Yakô̆p, bih-tih gơñu hmâo pluh pă r̂ăng.
23Nă đahkơi Đăn a iâo Husim. 24Nă đahkơi Nepthali a iâo Yasiel, Kuni, Yêsơ, dăp Silĭm. 25Môt gơñu nŭn yơh nă đahkơi Ƀilha, Ƀilha nŭn đahmơi hlŭn Laƀăn br̂ơi nao ngă hlŭn Račel nă ñu. Bih-tih nă čo Ƀilha pơpôn br̂ơi Yakô̆p ne, hmâo juh r̂ăng.
26Bih nă čo Yakô̆p tr̂ŭn nao pơ čal Êjĭp hr̂ŏm ñu, hmâo năm pluh năm r̂ăng, bĭ yap hr̂ŏm nă pơtâo đahmơi Yakô̆p ôh. 27Nă đahkơi a pơpôn br̂ơi Yôsep mơ̆ng čal Êjĭp, hmâo dua r̂ăng mơ̆n. Nĭng nŭn yơh, bih-tih khŭl-khap sang-nŏ Yakô̆p nao pơ čal Êjĭp, hmâo juh pluh r̂ăng.
Yakô̆p nao dŏ pơ ƀon Kôsen
28Jr̂ŏng nŭn Yakô̆p pơđơi Yuđa nao pơ Yôsep hlâo, čiăng kơña glan nao pơ ƀon Kôsen. Tơl gơñu tr̂uh nao pơ Kôsen boih, 29nŭn Yôsep met-set lơdeh seh a yua blah-wang, đĭ nao hăp tô̆ Israel ma ñu pơ Kôsen. Tơl ñu ƀôh ma ñu boih, ñu kuôp tơkoi ma ñu, jr̂ŏng nŭn hia wĭ. 30Jr̂ŏng nŭn Israel pơhiăp hr̂ŏm Yôsep: «Nêne jơ̆ kâo djai, găl yơh, yua kâo ƀôh ƀŏ ih, ih dŏ nŏng dŏ dĭp dơdi mơ̆n!» 31Jr̂ŏng nŭn Yôsep pơhiăp hr̂ŏm yŏng dơi ñu dăp bih khŭl-khap sang-nŏ ma ñu: «Kâo ti đĭ nao pơ Pharon, nŭn kâo ti r̂ă thâo ñu hla ne: “Yŏng dơi kâo, dăp khŭl-khap sang-nŏ ma kâo, gơñu r̂ai mơ̆ng lŏn-ia Kanan tơl r̂ai pơ kâo boih. 32Buă gơñu ngă, ha tô̆ čiă triw čiă be čiă mo, nŭn yơh gơñu djă ba phung čĭm gơñu, wŏt bih-tih nŏ yĕt-yĕt gơñu hmâo, gơñu ba r̂ai hr̂ŏm mơ̆n.” 33Tơl Pharon iâo nao môt gô-ih, dăp kơña, “Buă yĕt gô-ih ngă?” 34Nŭn br̂ơi gô-ih laĭ glaĭ hla ne: “Môt mơi hlŭn ih, mơi mơnuih čiă triw čiă be, tô̆ mơ̆ng mơi dŏ muai khă tơl kal ne, hla ti môt ơi mơi juăt ngă mơ̆ng đim mơ̆n.” Nĭng nŭn yơh Pharon ti br̂ơi môt gô-ih dŏ mơ̆ng ƀon Kôsen ne, yua môt sô̆n-sat Êjĭp kŏm bĭ khĭn dŏ hr̂ŏm mơnuih čiă triw ôh.»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Phŭn Blŭng 46: JKB
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© 2024, Wycliffe Bible Translators, Inc.