Biă 6
6
Ơi Adai uăn ti pơklaih nă čo Israel
1 Yêhôwa pơhiăp hr̂ŏm Môsê: «Nêne ih ti ƀôh buă kâo ngă mơ̆ng Pharon. Yua mơ̆ng ngan kơtang myang kâo, Pharon ti br̂ơi nă plơi lan kâo biă đuĕ.#An Biă 3:20. Yua mơ̆ng ngan kơtang myang kâo, Pharon ti pơpŏl lôi gơñu biă đuĕ mơ̆ng čal ñu.»
2Ơi Adai pơhiăp hr̂ŏm Môsê dŏng: «Kâo yơh Yêhôwa. 3Pah ahlâo dih, kâo pơƀôh br̂ơi Abrahăm, Isă, dăp Yakô̆p ƀôh kâo, kâo br̂ơi gơñu iâo kâo Ơi Adai “Yang Kơtang Hloh,”#An Phŭn 17:1; 28:3; 35:11. plai ƀŏ kâo a iâo “Yêhôwa”#An Biă 3:13-15. kâo ka r̂ă br̂ơi gơñu thâo kr̂ăn ôh. 4Jr̂ŏng nŭn dŏng, kâo kă klơi uăn bơgop kâo hr̂ŏm gơñu, kâo laĭ kâo ti mop br̂ơi gơñu lŏn-ia Kanan, lŏn-ia gơñu dŏ dăng ahlâo dih.#An Phŭn 12:1-3, 7; 15:1-21; 17:1-27; 26:1-5; 35:10-12; 46:3-4. 5Ha tô̆ dŏng, kâo hmĭ klơi nă čo Israel kơmr̂ao, yua môt sô̆n-sat Êjĭp pơkhŏm gơñu ngă hlŭn, nŭn yơh kâo kơčăng mơ̆ng klơi uăn bơgop kâo kă hr̂ŏm môt ơi don gơñu.#An Biă 2:23-25. 6Nĭng nŭn yơh, br̂ơi ih nao r̂ă br̂ơi nă čo Israel:
“Kâo yơh Yêhôwa, kâo ti ba gô-ih biă mơ̆ng buă tr̂ă-tr̂ă môt sô̆n-sat Êjĭp pơkhŏm gô-ih ngă, dăp kâo ti pơklaih gô-ih mơ̆ng klơi gô-ih ngă hlŭn gơñu. Kâo ti yŏl đĭ ngan kâo tr̂ĕ kơđi dr̂ă-dr̂ă ngă pơkơnap gơñu, čiăng song tô̆ gô-ih. 7Kâo ti tô̆ gô-ih ngă nă plơi lan kâo, dăp kâo ti jr̂ŏng Yang gô-ih. Gô-ih ti thâo kr̂ăn laĭ, kâo yơh Yêhôwa Yang gô-ih,#An Phŭn 17:7-8; Biă 29:45-46. pô ba gô-ih biă đuĕ mơ̆ng buă tr̂ă-tr̂ă môt sô̆n-sat Êjĭp pơkhŏm gô-ih ngă. 8Nĭng nŭn yơh, kâo ti ba gô-ih mŭt nao tăm lŏn-ia kâo uăn laĭ ti br̂ơi Abrahăm, Isă, dăp Yakô̆p, kâo ti br̂ơi lŏn-ia nŭn jr̂ŏng dr̂ăm pơđŏk gô-ih. Kâo yơh Yêhôwa.”»
9Jr̂ŏng nŭn, Môsê r̂ă br̂ơi nă čo Israel tui boh hiăp nŭn, plai gơñu bĭ hmĭ Môsê ôh, yua bŭt gơñu bơngŏt-bơngañ mơ̆ng buă kơnap-tap gơñu ngă hlŭn.
10Pah anŭn Yêhôwa pơhiăp hr̂ŏm Môsê: 11«Nao r̂ă br̂ơi Pharon pơtao čal Êjĭp wŏ, čiăng ñu br̂ơi nă čo Israel biă đuĕ mơ̆ng čal ñu.» 12Plai Môsê til glaĭ pơ Yêhôwa, ñu laĭ: «Nă čo Israel bĭ hmĭ kâo ôh, ngă hiư̆m pă pơtao Pharon mơ̆ng hmĭ kâo, yua kâo mơnuih bĭ gan lơgơi pơhiăp hla ne?»#6:12 Mơnuih bĭ gan lơgơi pơhiăp hla ne Hêbrơ laĭ «Amăng bah kâo a bĭ tr̂ĕ klĭ.» An Biă 4:10-11. 13Jr̂ŏng nŭn Yêhôwa pơhiăp hr̂ŏm Môsê dua ñu Ơrô̆n, pơđơi gơñu nao pơ nă čo Israel, dăp nao pơ Pharon pơtao čal Êjĭp, čiăng Môsê dua ñu Ơrô̆n ba nă čo Israel biă mơ̆ng čal Êjĭp.
Tô̆ mơ̆ng Israel tr̂uh pơ Ơrô̆n dua ñu Môsê
14Ne yơh phŭn kŏ sang gơñu.
Ruƀên nă phŭn Israel.#An Phŭn 29:32. Nă đahkơi Ruƀên, hmâo Hênô̆k, Palu, Hêsrô̆n, dăp Kơmi. Gơñu nŭn yơh khŭl-khap r̂ai mơ̆ng Ruƀên.
15Nă đahkơi Simien:#An Phŭn 29:33. Hmâo Yêmu-el, Yamin, Ôhăt, Yakĭn, Sôha, dăp Sôl, plai Sôl mĭ ñu sô̆n-sat Kanan. Gơñu nŭn yơh khŭl-khap r̂ai mơ̆ng Simien.
16Ne yơh nă čo Lêwi#An Phŭn 29:34. tui tam klơi a čih čr̂oh ƀŏ gơñu: Hmâo Kơsŭn, Kêhăt, dăp Mêrari. (Ayŭ Lêwi bih-tih hmâo 137 thŭn.) 17Nă đahkơi Kơsŭn: Hmâo Lĭpni dua ñu Simai, dăp khŭl-khap gơñu ha r̂ăng ha r̂ăng mơ̆n. 18Nă đahkơi Kêhăt: Hmâo Ămram, Yitsa, Hêbrô̆n, dăp Usiel. (Ayŭ Kêhăt bih-tih hmâo 133 thŭn.) 19Nă đahkơi Mêrari: Hmâo Mahli dua ñu Musi. Gơñu nŭn yơh khŭl-khap r̂ai mơ̆ng Lêwi tui tam klơi a čih čr̂oh mơ̆ng gơñu.
20Ămram dŏ Yŭkĕƀĕt adơi đahmơi ma ñu, jr̂ŏng nŭn Yŭkĕƀĕt pơpôn r̂ai Ơrô̆n dua ñu Môsê.#An Biă 2:1-2. (Ayŭ Ămram bih-tih hmâo 137 thŭn.) 21Nă đahkơi Yitsa: Hmâo Kôra, Nêphêk, dăp Sikri. 22Nă đahkơi Usiel: Hmâo Misael, El-saphan, dăp Sittri.
23Ơrô̆n dŏ Êli-sêƀa adơi Nasôn, dua yŏng dơi gơñu nă Ami-nađăp,#An Rut 4:19-20; Mat 1:4. jr̂ŏng nŭn Êli-sêƀa pơpôn br̂ơi Ơrô̆n nă đahkơi: Hmâo Nađap dăp Aƀihu,#An Biă 24:1; 28:1; Lêwi 10:1-2. Êliesa#An Yap 3:32; Juăt 10:6. dăp Ithama. 24Nă đahkơi Kôra: Hmâo Ahsie, El-kana, dăp Êƀiesăp. Gơñu nŭn yơh khŭl-khap r̂ai mơ̆ng Kôra.
25Êliesa nă đahkơi Ơrô̆n, ñu tô̆ nă đahmơi Puthiel ha r̂ăng ngă bơnai ñu, jr̂ŏng nŭn bơnai ñu pơpôn br̂ơi ñu nă đahkơi ha r̂ăng a iâo ƀŏ ñu Phinihah.#An Yap 25:7-13; 31:6.
Gơñu nŭn yơh phŭn kŏ sang r̂ai mơ̆ng Lêwi, dăp khŭl-khap gơñu ha r̂ăng ha r̂ăng mơ̆n.
26Ơrô̆n dua ñu Môsê ne yơh, Yêhôwa pơđơi gơñu, «Ba nă čo Israel biă mơ̆ng čal Êjĭp, pĕn-phung-pĕn-phung hla ti môt tơhan.» 27Gơñu dua r̂ăng ne yơh, pơhiăp hr̂ŏm Pharon pơtao čal Êjĭp, čiăng ba nă čo Israel biă mơ̆ng čal Êjĭp, Môsê dua ñu Ơrô̆n ne yơh.
Môsê dua ñu Ơrô̆n ngă tui klơi Ơi Adai pơtă
28Mơ̆ng r̂ơi Yêhôwa pơhiăp hr̂ŏm Môsê mơ̆ng čal Êjĭp, 29ñu pơhiăp hr̂ŏm Môsê: «Kâo yơh Yêhôwa, br̂ơi ih r̂ă br̂ơi Pharon pơtao čal Êjĭp tơgr̂ư̆ klơi kâo pơtă br̂ơi ih.» 30Plai Môsê til glaĭ pơ Yêhôwa: «Kâo mơnuih bĭ gan lơgơi pơhiăp,#6:30 Mơnuih bĭ gan lơgơi pơhiăp Hêbrơ laĭ «Amăng bah kâo a bĭ tr̂ĕ klĭ.» An Biă 6:12. ngă hiư̆m pă Pharon mơ̆ng hmĭ kâo lĕ?»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Biă 6: JKB
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© 2024, Wycliffe Bible Translators, Inc.