Biă 14
14
Bat găn Ia Sĭ Myah
1 Yêhôwa pơhiăp hr̂ŏm Môsê: 2«R̂ă br̂ơi nă čo Israel, čiăng gơñu bat dăl glaĭ, jr̂ŏng nŭn bơdŏng đĭ sang seng tŏng jĕ Piha-hirô̆t, dŏ plah-wah ƀon Mikđô̆l mơ̆ng ia sĭ, br̂ơi gô-ih bơdŏng đĭ sang seng tŏng jĕ hang ia sĭ gah năp ƀon Ƀal-sêphô̆n. 3Pharon ti pơhiăp laĭ: “Nă čo Israel wĕč-wŏl tăm čol nŭn yơh, čol dơdang kr̂ĭ lôi gơñu klĕp.” 4Kâo ti ngă br̂ơi Pharon găng bŭt,#An Biă 4:21. jr̂ŏng nŭn ñu ti čiă tui gô-ih, nŭn a ti i-bli klơi gơdr̂ih-gơdr̂ŏng kâo#An Biă 9:16. yua mơ̆ng Pharon dăp bih phung tơhan ñu, nŭn môt sô̆n-sat Êjĭp ti thâo kr̂ăn laĭ kâo yơh Yêhôwa.»#An Biă 6:2. Jr̂ŏng nŭn nă plơi lan Israel ngă tui nĭng nŭn.
5Tơl r̂ăng r̂ă br̂ơi pơtao čal Êjĭp laĭ, môt Israel đuĕ yơh, nŭn Pharon dăp môt khua ngă buă ñu pơlih bŭt-tai, dăp pơhiăp laĭ: «Yĕt ta ngă nĭng ne, dai poi br̂ơi môt Israel biă đuĕ mơ̆ng buă ngă hlŭn ta lĕ?» 6Nĭng nŭn yơh, Pharon met-set lơdeh blah-wang dăp jak môt tơhan biă nao hr̂ŏm ñu mơ̆n. 7Ñu r̂ih lơdeh blah-wang hiam hloh hmâo năm tuh, jr̂ŏng nŭn tô̆ bih lơdeh blah-wang pơkŏn dŏng tăm čal Êjĭp, tơgr̂ư̆ lơdeh nŭn hmâo khua tơhan soh-sel. 8Yêhôwa ngă br̂ơi Pharon pơtao čal Êjĭp găng bŭt,#An Biă 4:21. jr̂ŏng nŭn pơtao čiă tui nă čo Israel, plai nă čo Israel dŏng, gơñu khĭn biă đuĕ, huai huĭ yĕt ôh. 9Bih lơdeh blah-wang Pharon, dăp môt tơhan đĭ kŏ lơdeh blah-wang nŭn,#14:9 Môt tơhan đĭ kŏ lơdeh blah-wang nŭn lơ «Môt tơhan đĭ seh.» wŏt phung tơhan bat le, gơñu čiă tui nă čo Israel, hmao gơñu ti ƀon gơñu bơdŏng sang seng tŏng ti hang ia sĭ, jĕ Piha-hirô̆t, gah năp Ƀal-sêphô̆n.
10Pah Pharon tơl nao jĕ, nŭn nă čo Israel gơñu ep nao, nŭn gơñu ƀôh môt sô̆n-sat Êjĭp čiă tui klon gơñu, nŭn gơñu huĭ kơtang jat, jr̂ŏng nŭn gơñu iâo hơmr̂ač đĭ Yêhôwa. 11Gơñu pơhiăp hr̂ŏm Môsê: «Yua yĕt ih ba r̂ai mơi djai tăm čol dơdang hla ne lĕ? Hiư̆m, pơ čal Êjĭp bĭ hmâo ôh, kơnah dŏl? Yua yĕt ih ba mơi biă mơ̆ng čal Êjĭp? 12Hiư̆m, bĭ djơ̆ ôh? Mơi pơhiăp hr̂ŏm ih pơ čal Êjĭp, “Ih anăm wŏn-wai mơ̆ng mơi ôh, čr̂oh br̂ơi mơi dŏ ngă hlŭn môt sô̆n-sat Êjĭp wŏ”! Yua mơi ngă hlŭn môt sô̆n-sat Êjĭp, nŭn hiam hloh mơ̆ng mơi djai tăm čol dơdang hla ne.»#An Biă 5:21; 15:24; 17:2. 13Plai Môsê til glaĭ: «Anăm huĭ ôh, dŏ đŏng wŏ, ep klơi pơklaih Yêhôwa ti ngă br̂ơi gô-ih r̂ơi ne. Môt sô̆n-sat Êjĭp gô-ih ƀôh r̂ơi ne, kơñ gô-ih bĭ ƀôh gơñu dŏng tah. 14Yêhôwa ti bơblah tang br̂ơi gô-ih, gah gô-ih dŏng br̂ơi dŏ đŏng djăt đơč.»
15Pah anŭn Yêhôwa pơhiăp hr̂ŏm Môsê: «Yĕt ih iâo hơmr̂ač đĭ kâo? Pơđơi nă čo Israel bat nao pơ năp wŏ. 16Yŏl đĭ wŏ gai jr̂a mơ̆ng ngan ih ngŏ ia sĭ, čiăng kah lôi ia dua gah, nŭn nă čo Israel mơ̆ng thâo găn ia sĭ bat mơ̆ng kơnah thu. 17Jr̂ŏng nŭn kâo ti ngă br̂ơi môt sô̆n-sat Êjĭp găng bŭt,#An Biă 4:21. čiăng gơñu mŭt tui klon gô-ih, nĭng nŭn yơh, a ti pơ-i-bli klơi gơdr̂ih-gơdr̂ŏng kâo,#An Biă 9:16. yua mơ̆ng Pharon dăp bih phung tơhan ñu, dăp lơdeh blah-wang ñu, wŏt môt tơhan đĭ kŏ lơdeh blah-wang ñu he mơ̆n. 18Pah r̂ăng pơ-i-bli klơi gơdr̂ih-gơdr̂ŏng kâo, yua mơ̆ng Pharon, dăp lơdeh blah-wang ñu, wŏt môt tơhan đĭ kŏ lơdeh blah-wang ñu, pah anŭn, môt sô̆n-sat Êjĭp ti thâo kr̂ăn laĭ, kâo yơh Yêhôwa.»#An Biă 6:2.
19Pah anŭn ling-jang Ơi Adai juăt ba glan môt Israel, ñu wŏt glaĭ dŏ dơdơi môt gơñu dŏng, dăp kơthŭl gơnăm#An Biă 13:21. biă đuĕ mơ̆ng gah năp gơñu, wŏt glaĭ dŏ dơdơi gơñu mơ̆n. 20Gơnăm nŭn dŏ plah-wah môt tơhan Êjĭp, mơ̆ng môt tơhan Israel, ngă br̂ơi ha gah kơnăm, ha gah dŏng đaih, nŭn môt tơhan dua gah nŭn bĭ thâo nao jĕ gŏp gơñu ôh, bih ha mlăm nŭn.
21Môsê yŏl đĭ ngan ñu ngŏ ia sĭ, jr̂ŏng nŭn Yêhôwa ba r̂ai angĭn mơ̆ng ping gah ngŏ thit kơtang bih ha mlăm, čiăng kah lôi ia sĭ, ngă br̂ơi ia sĭ jr̂ŏng hĕ kơnah thu. Nĭng nŭn yơh, ia pơklah lôi dua gah. 22Nă čo Israel găn ia sĭ bat mơ̆ng kơnah thu, yua ia dŏ dua gah gơñu hla ti dăp. 23Môt Êjĭp čiă tui klon gơñu, tr̂ŭn nao tăm ia sĭ mơ̆n, dăp tơgr̂ư̆ seh Pharon, dăp lơdeh blah-wang ñu, wŏt môt tơhan đĭ kŏ lơdeh blah-wang ñu he mơ̆n. 24Tơl jiăm ti đaih, Yêhôwa dŏ nŏng dŏ mơ̆ng kơthŭl gơnăm glah phui, nŭn ñu ep tr̂ŭn môt tơhan Êjĭp, jr̂ŏng nŭn ñu ngă br̂ơi môt gơñu huĭ br̂al-ngal. 25Yêhôwa ngă br̂ơi kô̆ng lơdeh gơñu kơblŏt lôi, ngă br̂ơi gơñu nao pơ năp kơnap-tap. Nŭn môt Êjĭp laĭ: «Nah ta đuĕ mơ̆ng môt sô̆n-sat Israel nah, yua Yêhôwa bơblah mơ̆ng môt sô̆n-sat Êjĭp ta, tang br̂ơi gơñu yơh.»
Môt Êjĭp ƀlŭng ia djai bih
26Yêhôwa pơhiăp hr̂ŏm Môsê: «Yŏl đĭ ngan ih ngŏ ia sĭ wŏ, čiăng ia sĭ lŏk glaĭ lip lôi môt sô̆n-sat Êjĭp, dăp lơdeh blah-wang gơñu, wŏt môt tơhan đĭ kŏ lơdeh blah-wang gơñu mơ̆n.» 27Nŭn yơh, sêng-ƀr̂êng mơ̆ng guah, Môsê yŏl đĭ ngan ñu ngŏ ia sĭ, nŭn ia sĭ lŏk glaĭ hla ti hađăp. Môt sô̆n-sat Êjĭp gơñu tă đuĕ mơ̆ng ia bĭ hmao ôh. Hla nŭn yơh, Yêhôwa hơlŏk lôi bih gơñu tŏng-kr̂ah ia sĭ. 28Ia lŏk glaĭ lip lôi bih-tih lơdeh blah-wang Pharon, dăp môt tơhan đĭ kŏ lơdeh blah-wang ñu mơ̆n. Phung tơhan Pharon čiă tui nă čo Israel nŭn djai bih blao, wŏt ha r̂ăng bĭ dŏ dĭp le. 29Plai nă čo Israel dŏng, gơñu găn ia sĭ bat mơ̆ng kơnah thu, yua ia dŏ dua gah gơñu hla ti dăp.
30Hla nŭn yơh, Yêhôwa pơklaih môt Israel mơ̆ng r̂ơi nŭn,#An Biă 6:6. br̂ơi klaih mơ̆ng ngan môt sô̆n-sat Êjĭp. Môt Israel ƀôh tâo tơhan Êjĭp dŏ ngŏ čĭ r̂ok hang ia sĭ. 31Tơl môt Israel ƀôh buă kơtang myang Yêhôwa#An Biă 9:16. ngă mơ̆ng môt sô̆n-sat Êjĭp, nŭn gơñu huĭ pơpô̆ Yêhôwa, wŏt gơñu ngư̆ Yêhôwa dăp Môsê pô ngă buă Yêhôwa mơ̆n.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Biă 14: JKB
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© 2024, Wycliffe Bible Translators, Inc.