Biă 10
10
Klơi pơkơnap ti păn: Kơtop
1 Yêhôwa pơhiăp hr̂ŏm Môsê: «Br̂ơi ih nao pơ Pharon wŏ, yua kâo ngă br̂ơi ñu găng bŭt, dăp ngă br̂ơi môt khua ngă buă ñu găng bŭt mơ̆n, yua kâo čiăng ngă klơi myang mơsêh kâo ti năp môt gơñu, čiăng gơñu ƀôh jel. 2Nŭn gô-ih ti r̂ă r̂oi br̂ơi nă gô-ih dăp čo gô-ih dơdơi kơñ, mơ̆ng buă kâo ngŏl čal Êjĭp, dăp tơgr̂ư̆ klơi myang mơsêh kâo ngă br̂ơi môt gơñu ƀôh, čiăng bih gô-ih thâo kr̂ăn laĭ, kâo yơh Yêhôwa.»
3Nŭn yơh, Môsê dua ñu Ơrô̆n nao pơ Pharon, dăp pơhiăp laĭ:
«Ne yơh klơi pơhiăp Yêhôwa Yang môt sô̆n-sat Hêbrơ, ñu laĭ:
“Ih dŏ bĭ phom dŏ gah yô̆ kâo dơ̆ pă dŏng? Br̂ơi nă plơi lan kâo biă nao wŏ, čiăng gơñu ngă buă kâo. 4Jơ̆ laĭ ih bĭ phom br̂ơi nă plơi lan kâo biă nao ôh, r̂ơi gla kâo ti ba r̂ai phung kơtop tăm čal ih. 5Ñu ti r̂ai gom lôi jŏp-jang čal, tơl ep kơnah bĭ thâo ƀôh dŏng tah, jr̂ŏng nŭn ñu ti ƀŏng lôi nŏ yĕt-yĕt dŏ glaĭ mơ̆ng plel bơr̂ăm lôi ahlâo,#An Biă 9:32. ñu ti ƀŏng bơbih lôi kơyâo čă br̂ơi gô-ih pơ čol mơ̆n. 6Ñu ti mŭt r̂ai bŏ tăm sang ih, sang môt khua ngă buă ih, dăp bih sang môt sô̆n-sat Êjĭp he mơ̆n. Buă ne ma gô-ih dăp ơi yă gô-ih bĭ juăt ƀôh hla ne ôh, tô̆ mơ̆ng r̂ơi gơñu dŏ tăm čal ne khă tơl r̂ĭm r̂ơi ne.”»
Jr̂ŏng nŭn Môsê wih r̂ŏng biă đuĕ mơ̆ng Pharon.
7Jr̂ŏng nŭn môt khua ngă buă Pharon pơhiăp hr̂ŏm Pharon: «Hiư̆m, ta dŏ čr̂oh pô ne kă đong ta dơ̆ pă dŏng? Br̂ơi gơñu#10:7 Gơñu lơ «Môt đahkơi.» biă nao ngă buă Yêhôwa yang gơñu wŏ. Hiư̆m, ih ka thâo kr̂ăn ôh, čal Êjĭp ta ne r̂ăm bih blao boih?» 8Nĭng nŭn yơh, r̂ăng ba Môsê dua ñu Ơrô̆n wŏt glaĭ pơ Pharon, jr̂ŏng nŭn Pharon pơhiăp laĭ: «Nao wŏ, br̂ơi nao ngă buă Yêhôwa yang gô-ih wŏ! Lơi pơanah ti nao?» 9Môsê til glaĭ: «Mơi ti nao dăp tha dăp muai, dăp nă đahkơi dăp nă đahmơi, dăp phung triw phung be phung mo he mơ̆n, yua mơi ti ngă Yang Yêhôwa dăp ƀŏng mơñŭm.» 10Pharon pơhiăp hr̂ŏm gơñu: «Kâo bĭ br̂ơi nă bơnai nă neh gô-ih biă nao hr̂ŏm gô-ih ôh, wŏt kâo bĭ dueh mơ̆ng Yêhôwa dŏ hr̂ŏm gô-ih le, yua kâo thâo kr̂ăn laĭ gô-ih khư̆t set yơh. 11Kâo bĭ br̂ơi nĭng nŭn ôh. Kâo br̂ơi gô-ih biă nao ngă buă Yêhôwa kăn môt đahkơi đơč, yua gô-ih dueh nĭng nŭn.» Jr̂ŏng nŭn, r̂ăng pơpŏl lôi gơñu biă đuĕ mơ̆ng Pharon.
12Jr̂ŏng nŭn Yêhôwa pơhiăp hr̂ŏm Môsê: «Br̂ơi ih yŏl đĭ ngan ih ngŏ čal Êjĭp, čiăng phung kơtop r̂ai bŏ mơ̆ng čal Êjĭp, dăp ƀŏng bơbih lôi djăm mr̂ơ̆k djăm mr̂ôñ dŏ glaĭ mơ̆ng plel bơr̂ăm lôi ahlâo.» 13Nŭn yơh, Môsê yŏl đĭ gai jr̂a ngŏ čal Êjĭp, nŭn Yêhôwa ngă br̂ơi hmâo angĭn r̂ai mơ̆ng ping gah ngŏ, bă nao pơ čal nŭn ha r̂ơi ha mlăm. Tơl dih guah r̂ơi dơdơi dŏng, angĭn nŭn bă r̂ai phung kơtop. 14Phung kơtop đĭ r̂ai bŏ mơ̆ng čal Êjĭp, jr̂ŏng nŭn găm jŏp-jang mơ̆ng kơnah čal Êjĭp, hmâo lô jat, tô̆ mơ̆ng blŭng bĭ hmâo hla nŭn ôh, wŏt gah năp dŏng bĭ hmâo hla nŭn le. 15Nŭn ñu gom lôi jŏp-jang kơnah nŭn tăm-djĭk, ñu ƀŏng bơbih lôi djăm mr̂ơ̆k djăm mr̂ôñ tăm čal nŭn, dăp bih boh kơyâo dŏ glaĭ mơ̆ng plel bơr̂ăm, tơl bĭ hmâo hla da ha gŏl dŏ glaĭ mơ̆ng phŭn kơyâo lơ djăm mr̂ơ̆k djăm mr̂ôñ tăm čal Êjĭp ôh. 16Pah anŭn Pharon iâo Môsê dua ñu Ơrô̆n br̂ơi r̂ai tăñ, jr̂ŏng nŭn pơhiăp laĭ: «Kâo ngă glaĭ mơ̆ng Yêhôwa yang gô-ih, dăp ngă glaĭ hr̂ŏm gô-ih he mơ̆n. 17Klaih lôi klơi glaĭ kâo ha wŏt ne đơč, iâo-laĭ dueh alôm mơ̆ng Yêhôwa yang gô-ih he, čiăng ñu mă lôi klơi djai ne mơ̆ng kâo.» 18Nŭn Môsê biă đuĕ mơ̆ng Pharon, nao iâo-laĭ dueh alôm mơ̆ng Yêhôwa. 19Jr̂ŏng nŭn Yêhôwa ngă br̂ơi hmâo angĭn kơtang bă đĭ mơ̆ng ping gah yô̆ dŏng, ba nao phung kơtop lĕ tăm Ia Sĭ Myah#10:19 Ia Sĭ Myah lơ «Ia sĭ sup» (čiăng laĭ «Ia sĭ phŭn čiăng»). goh blao, wŏt ha dr̂ơi bĭ dŏ glaĭ le tăm čal Êjĭp. 20Plai Yêhôwa ngă br̂ơi Pharon găng bŭt, nŭn Pharon bĭ phom br̂ơi nă čo Israel biă nao ôh.#An Biă 4:21.
Klơi pơkơnap ti duapăn: Klơi kơnăm-hyeng
21Yêhôwa pơhiăp hr̂ŏm Môsê: «Br̂ơi ih yŏl đĭ ngan ih pơ adai, čiăng hmâo klơi kơnăm-hyeng gom lôi čal Êjĭp, klơi kơnăm-hyeng nŭn kơtang jat tơl r̂ăng lơwa pĭ-pô̆.» 22Nŭn yơh, Môsê yŏl đĭ ngan ñu pơ adai, nŭn hmâo klơi kơnăm-hyeng kleng-kĕt gom lôi bŏ tăm čal Êjĭp klâo r̂ơi. 23Gơñu ep nao r̂ai gŏp gơñu bĭ thâo ƀôh ôh, mơ̆ng klâo r̂ơi nŭn bĭ hmâo lơi thâo gŭ đuĕ mơ̆ng ƀon ñu dŏ ôh, plai nă čo Israel dŏng, bih gơñu hmâo klơi đaih mơ̆ng ƀon gơñu dŏ.#An Biă 8:22. 24Pah anŭn Pharon iâo r̂ai Môsê, jr̂ŏng nŭn pơhiăp laĭ: «Nao ngă buă Yêhôwa wŏ, čr̂oh glaĭ ha tô̆ phung triw phung be dăp phung mo gô-ih đơč, nă bơnai nă neh gô-ih kâo br̂ơi nao hr̂ŏm gô-ih mơ̆n.» 25Plai Môsê laĭ glaĭ: «Ih pô yơh ti pha br̂ơi mơi čĭm-br̂ĭm čr̂oh ngă yang Yêhôwa Yang mơi, dăp čĭm-br̂ĭm ti ngă yang čuh lôi bih blao he mơ̆n, 26plai phung čĭm mơi pô, mơi ti djă ba nao mơ̆n, mă ha tô̆ kơkâo ñu bĭ br̂ơi dŏ glaĭ le, yua mơi ti r̂ih tô̆ pơanah mơ̆ng phung čĭm nŭn ngă buă Yêhôwa Yang môt mơi. Tơl mơi tr̂uh pơ anŭn ƀơĭ, mơi mơ̆ng thâo kr̂ăn laĭ čĭm pă mơi ti tô̆ ngă buă Yêhôwa.» 27Plai dŏng, Yêhôwa ngă br̂ơi Pharon găng bŭt, nŭn Pharon bĭ phom br̂ơi gơñu biă nao ôh.#An Biă 4:21. 28Pharon pơhiăp hr̂ŏm Môsê: «Đuĕ mơ̆ng kâo wŏ! Lơwăng hŏ, ih anăm r̂ai ƀôh ƀŏ kâo dŏng tah, r̂ơi pă ih ƀôh ƀŏ kâo, r̂ơi nŭn ih ti djai he yơh.» 29Môsê til glaĭ: «Ih pơhiăp nŭn djơ̆ yơh! Kâo bĭ ƀôh ƀŏ ih dŏng tah.»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Biă 10: JKB
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© 2024, Wycliffe Bible Translators, Inc.