A-NGALASHIA 5
5
1Manenu ngú kashika mu utuswilo uze Kristu hanatutusula nawo, kanda nukakwachika cheka nawa ni kanga ya undungo.
2Talenu, yami Paulu, ngunambe kuli yenu ngwami, Kachi munutambula ungalami, Kristu kechi kunufumbula nichimwe. 3Ewa, ngunashindakenya cheka nawa kuli mweswe matambula ungalami, ngwami, Kumapwa mukwa kongo mukulinga shimbi yeswe. 4Hinwaliteta kuli Kristu, yenu nunazange akanusambise ni shimbi; hinwakatuka ku vumbi. 5Mumu yetu ku tachi ja Spiritu ku Ufulielo tunatwaminyina kutalatala cha ululi. 6Mumu muli Kristu, chipwe ungalami kuushi ni ulemu, chipwe ulima, ka; alioze Ufulielo uze unalingi ku zango. 7Nwazombokele kanawa; iya wanukwikile kwononoka ku umwenemwene? 8Kukununa chino kuchakatukile kuli yoze wakunutambika. 9Futunwiso yikepe muyifutunwisa mwaha weswe. 10Ngunalikolela kuli yenu muli Mwene, ngwami, Kunuchi kapwa ni kunyonga chikwo nichimwe: ni yoze wakunupikala kumakambata uhiso wenyi, apwe mweswawo. 11Alioze yami, mandumbu, kachi nguchili nikwambujola ungalami, kuchi te nguchili nikumona yihungumiona? Kachi chocho kevwe, chitalingiso cha kulusu ya Kristu chinahu. 12Ngunazange kachi waze akunupinjisa akaliteteho.
13Mumu anutambikile, mandumbu, nukatusuke; chino wika, kanda nukalumuna kutusuka chenu kaliongelo ka kulingila musunya, alioze ku zango lilingilenu umwe ni mukwo. 14Mumu shimbi yeswe yinamanunuka mu liji limuwika, ngwo, Ukazange mwenyembo we ngwe unalizange yena mwene. 15Alioze kachi munulisuma nikuliwumbula umwe ni mukwo, kanyamenu kuchina munuluka.
16Alioze ngwami, Endenu muli Spiritu, mba kunuchi kamanununa usolo wa musunya. 17Mumu musunya kuwakulimika ni Spiritu, ni Spiritu kakulimika ni musunya; mumu yino yuma kuyakulimika chimwe ni chikwo, kunukwika ku yuma yize nunazange kulinga. 18Mumu kachi Spiritu manusongwela, hi nuli kushi lia shimbi ko. 19Achi, yitanga ya musunya yinasoloka, yenayo yino: ni utanji, ni luchisa, hi upangala, 20ni kukombelela mahamba, ni kupanda, ni kole, ni vunda, ni ukwa, ni ufwatulo, ni kulipula, ni kulimanangana, ni kulihandununa, 21ni lufwachinda, ni ungalwe, ni kuzengewa, ni kuhungumuka ni yipi, ni yuma ya kulifwa ni yino; ha kutwala ku yiyo, ngunanwambulwila Shimbu-kanda, chizechene ngwe nanwambulwilile kulu, ngwami, Waze akulingalinga yuma ngwe yino kechi kahinga wanangana wa Zambi. 22Alioze mihuko ya Spiritu, zango, ni uwahililo, ni sambukila, ni kulihumikiza, ni utu, ni upeme, ni kushishika, 23ni kushimbika, ni kusúla; kulimika ni yuma ngwe yino shimbi yakuhi niyimwe. 24Alioze atu a Kristu, hanahachila ha kulusu musunya ni kusasaminya chawo ni usolo wawo.
25Kachi tuli ni mwono muli Spiritu twendenu nawa muli Spiritu. 26Kanda tuzanga uhenya wamokomoko, kanda tulihia umwe ni mukwo, kanda tupwa ni lufwachinda umwe kuli mukwo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
A-NGALASHIA 5: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.