MUKANDA WAMUCHIALI WA TIMOTEU 3
3
1Alioze nyingika chino, ha matangwa a kusula kumuku kapwa miaka yikalu. 2Mumu atu kumakapwa akwa kulifwila ene, akwa kufwila mbongo, akwa kulizata, akwa kulizelula, akwa kushililika, keshi kwononoka kuli yisemi jo, akwa kaleleso, akwa luchisa, 3keshi zango lia atu, keshi kuhutuka, yilamikiji, keshi kusúla, asasu, keshi kufwila yipema, 4akwa kuhandukulula, akwa kulipupula, akwa kulifuza, akwa kufwila kuwaha hi Zambi ko. 5Kusoloka cha uwayilo kali nacho, alioze kakulikata tachi jawo: kuli wano nawa kondoloka. 6Hakachi ko kwali waze akuliomba nikunjila mu mazuwo, akatwale ku ufunge mapwo a kuhepuka, a kulemewa ni milonga, kanahunguka ku usolo weka ni weka. 7Kakulilongesa matangwa eswe, alioze nilimwe tangwa keshi kuheta ku chinyingi cha umwenemwene. 8Chizechene ngwe Yane ni Yambwe alimikine ni Mose, chocho wano nawa kakulimika ni umwenemwene; atu a kupiha mu kunyonga cho, yisáshili ha kutwala ku Ufulielo. 9Alioze kechi kasenya kulutwe nawa; mumu uzuzuke wo kumuukasoloka kuli atu eswe, chizechene ngwe uzuzuke wa waze nawa wasolokele.
10Alioze hiunakaula kulongesa chami, ni kwenda chami, ni upale wami, ni Ufulielo wami, ni uhomboloji wami, ni zango liami, ni kunyongonona chami, 11ni yihungumiona, ni lamba, lize lianguwanyine mu Andiakia, mu Ikoniu, mu Lesetra; yihungumiona yize nanyongonwene nayo; ni Mwene wangupulwile ku yeswe. 12Ewa, ni waze eswe mazanga kwenda ni uwayilo muli Kristu Yesu kumakamona yihungumiona. 13Alioze yingulungulu ni akwa kwonga kumakapiha kuhiana, nikupiangula, nikupianguka. 14Alioze yena, nyongonona mu yuma yize hiunalilongesa, ni yize hiunayisela chinyingi, se unanyingika yoze wakulongeseleyo; 15ngwe chize ku ukemba we hiunanyingika je sona jisandu jize jinahase kukufumba mana mukuzuka ulamwino ku Ufulielo uze uli muli Kristu Yesu. 16Yisoneko yeswe hanayihwimi kuli Zambi, neyo kuyakutumbuka ha kulongesa, ni ha kukumika, ni ha kululika, ni ha kufumba mu ululi: 17hanga mutu wa Zambi akapwe mukwa kujama wakuteta liakulu yitanga yeswe yipema.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MUKANDA WAMUCHIALI WA TIMOTEU 3: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.