MUKANDA WAMUCHIALI WA TIMOTEU 1
1
1Yami Paulu, postolo wa Yesu Kristu ku upale wa Zambi, nikulita ni chilakenyo cha mwono uze uli muli Kristu Yesu,
2Kuli Timoteu, mwanami ngunamuzange chikolo:
Vumbi, ni keke, ni sambukila ya kuli Zambi Tata ni Kristu Yesu Mwene wetu.
3Kakusakwila kuli Zambi, yoze nakumulingila chize kuli akaka, ni mbunge yipema, ngwe nakukuvulwoka ha kuliumba chami, ufuku ni mwalwa, nikulitwamina nichimwe. 4Nakwivwa usona kukumona, ha kwiwuluka masoji je, hanga ngukazale tò ni uwahililo; 5ha kwiwuluka Ufulielo uze kuushi ulembekese, uze uli muli yena; uze wene watwamine hatangu muli kakenu Loye, ni muli noko Uhise mba ngunakunuka ngwami, Watwama muli yena nawa. 6Ha chikuma chino ngunakwiwulula ukawunge chawana cha Zambi, chize chili muli yena ku kusayika cha moko jami. 7Mumu Zambi katuhele Spiritu ya mwongo; alioze ya tachi, ni zango, ni mana.
8Kashika kanda ukevwa sonyi ha Shindakenyo ya Mwene wetu, chipwe hali yami funge yenyi: alioze nyongonona ni utunu ndusu mu yipi hamwe ni sango lipema, nikulita ni tachi ja Zambi; 9yoze hanatulamwina, hanatutambika ni kutambika chisandu, hi nikulita ni yitanga yetu ko, alioze nikulita ni upale wenyi mwene ni vumbi lienyi, lize atuhele shimbu miaka kanda yipwa. 10Alioze haliapwila hanalisolola ku usolokelo wa Chilamwina chetu Yesu Kristu, yoze hanamanununa kufwa, hananeha ku pangu mwono kupola chakuhi mu sango lipema. 11Ku lino hanangusela mukwa kwambujola, ni postolo, ni longeshi ya akwa mavungu. 12Ha chikuma chino nawa, nakwivwa lamba lia yino yuma; alioze chishi kwivwa sonyi; mumu ngunanyingika yoze hingunamufuliela; ngunakunuka ngwami, Kanahase kufunga chize hingunamukunjika ndo tangwa lize. 13Lalaminya ku cheseko cha maliji angunu aze hiunevu kuli yami, ni Ufulielo ni zango, yize yili muli Kristu Yesu. 14Chize chuma chipema akukunjikilecho, funga ku tachi ja Spiritu Musandu, yoze wakutwama muli yetu.
15Unanyingika chino, ngwami, Waze eswe ali mu Eshia hanakondoloka kuli yami; hakachi ko Fwijelu ni Hemojene. 16Mwene akevwe keke hali akwa zuwo lia Onesefworu: mumu wanguhuzulwile kanji, kevwileko sonyi ha lenge liami. 17Alioze muze apwile mu Roma, wangufupile ni mbunge yeswe, ndo wanguwanyine. 18(Mwene akamwehe kuwana keke kuli Mwene ha tangwa lize;) ni uvumbiko wunji upwa haha wanguvumbikile nawo mu Efwesu, yena kuunanyingika kanawa.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MUKANDA WAMUCHIALI WA TIMOTEU 1: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.